Mũthenya wa mũgwanja arĩ guo wa mũthia wa Gĩathĩ gĩa Ithũnũ, Jesu arĩ harĩa haigagwo mathandũkũ ma mĩhothi hekarũ-inĩ akĩrutana. (Johana 8:20; Luka 21:1) No kũhoteke nĩ mwena ũrĩa atumia maikaraga, harĩa andũ mathiaga kũrutĩra mĩhothi yao.

Ũtukũ hĩndĩ ya gĩkũngũĩro, mwena ũcio wa hekarũ nĩ wakagio matawa. Harĩ na mĩtĩ ĩna mĩnene ya kũigĩrĩrũo matawa, na o ũmwe waguo ũrĩ na ibũyũ inya nene ciyũire maguta. Matawa macio marĩ na ũtheri mũingĩ ũrahota kũmũrĩka kũndũ kũnene. Jesu rĩu akagweta ũndũ ũngĩririkania athikĩrĩria acio ũhoro wĩgiĩ ũtheri ũcio akoiga: “Nĩ niĩ ũtheri wa thĩ. Mũndũ o wothe ũrĩnũmagĩrĩra ndarĩ hĩndĩ agaathiĩra nduma-inĩ, no arĩkoragwo na ũtheri wa muoyo.”​—Johana 8:12.

Afarisai makaregana na ciugo icio cia Jesu makoiga: “Wee ũrutaga ũira waku mwene; ũira waku ti wa ma.” Nake Jesu akamacokeria: “O na angĩkorũo ndutaga ũira wakwa mwene, ũira wakwa nĩ wa ma tondũ nĩ njũĩ kũrĩa ndoimire na kũrĩa ndĩrathiĩ. No inyuĩ mũtiũĩ kũrĩa ndoimire na kũrĩa ndĩrathiĩ.” Akongerera ũũ: “Watho-inĩ wanyu nĩ kwandĩke ũũ: ‘Ũira wa andũ erĩ nĩ wa ma.’ Niĩ ndutaga ũira wakwa mwene, na Awa ũrĩa wandũmire o nake nĩ arutaga ũira igũrũ rĩakwa.”​—Johana 8:​13-18.

Tondũ Afarisai matirenda gwĩtĩkĩra ciugo ciake makamũũria: “Thoguo arĩ kũ?” Jesu akamacokeria ĩmwe kwa ĩmwe akameera: “Inyuĩ mũtinjũĩ na mũtiũĩ Awa. Korũo nĩ mũnjũĩ, nĩ mũngĩũĩ Awa o nake.” (Johana 8:19) O na gũtuĩka Afarisai marenda Jesu anyitwo, gũtirĩ o na ũmwe ũreka ũguo.

Jesu agacokera ciugo ici oigĩte hau kabere: “Niĩ nĩ ngũthiĩ, na nĩ mũkaanjaria, no mũgaakua o na mehia manyu. Kũrĩa ndĩrathiĩ, mũtingĩhota gũka.” Ayahudi acio makaga gũtaũkĩrũo o  na hanini nĩ ciugo ciake makambĩrĩria kuuga: “Kaĩ arabanga kwĩyũraga? Tondũ aroiga, ‘Kũrĩa ndĩrathiĩ, mũtingĩhota gũka.’” Matirataũkĩrũo nĩ ũrĩa Jesu aroiga tondũ matiũĩ kũrĩa oimire. Nake akameera ũũ: “Inyuĩ mũrĩ a thĩ; niĩ ndĩ wa igũrũ. Inyuĩ muumĩte gũkũ thĩ; niĩ ndiumĩte gũkũ thĩ.”​—Johana 8:​21-23.

Jesu araria ũhoro wa ũtũũro wake kũrĩa igũrũ atanoka gũkũ thĩ, na ũhoro wake gũkorũo arĩ Mesia kana Kristo, o we atongoria acio a ndini matarakũũrana. Nĩ ũndũ ũcio makamũũria ũũ na kĩnyũrũri kĩnene: “Wee nĩwe ũ?”​—Johana 8:25.

O na makĩmũregaga na kũmũũkĩrĩra, Jesu akamacokeria akameera: “O na ndĩraria na inyuĩ nĩkĩ?” Akerekeria meciria mao harĩ Ithe na agataarĩria kĩrĩa kĩngĩtũma Ayahudi acio mathikĩrĩrie Mũrũwe, akoiga: “Ũrĩa wandũmire nĩ wa ma, na maũndũ marĩa ndaiguire kuuma kũrĩ we nĩmo ndĩraria gũkũ thĩ.”​—Johana 8:​25, 26.

Jesu agacoka akonania atĩ nĩ ehokete Ithe, ũndũ ũrĩa Ayahudi acio matekaga akoiga: “Mwarĩkia gũcuuria Mũrũ wa mũndũ, hĩndĩ ĩyo nĩ mũkaamenya atĩ nĩ niĩ we na atĩ gũtirĩ ũndũ njĩkaga ndĩĩrĩte niĩ mwene; no njaragia maũndũ maya o ta ũrĩa Awa aandutire. Nake Ũrĩa wandũmire arĩ hamwe na niĩ; ndandiganĩirie ndĩ nyiki, nĩ gũkorũo hingo ciothe njĩkaga maũndũ marĩa mamũkenagia.”​—Johana 8:​28, 29.

O na kũrĩ ũguo, Ayahudi amwe nĩ metĩkĩtie Jesu, kwoguo akameera: “Mũngĩtũũra kiugo-inĩ gĩakwa, mũgũkorũo mũrĩ arutwo akwa kũna, na nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.”​—Johana 8:31, 32.

Angĩ nao makaigua ũhoro ũcio wa gũkũũrũo ũkombo-inĩ ũrĩ mũgeni. Makaregana naguo makoiga: “Ithuĩ tũrĩ rũciaro rwa Iburahimu na tũtirĩ twakorũo twĩ ngombo cia mũndũ o na ũrĩkũ. Nĩ kĩĩ gĩagĩtũma uuge, ‘Nĩ tũgũkũũrũo ũkombo-inĩ’?” Ayahudi nĩ moĩ atĩ kũrĩ hĩndĩ manakorũo magĩathwo nĩ mabũrũri mangĩ, ĩndĩ no mararega gwĩtwo ngombo. No Jesu akameera atĩ o na rĩu o nĩ ngombo, akoiga: “Ngũmwĩra atĩrĩ o ma o ma, mũndũ o wothe wĩhagia, nĩ ngombo ya mehia.”​—Johana 8:​33, 34.

Kũrega gwĩtĩkĩra atĩ o nĩ ngombo cia mehia nĩ kũratũma Ayahudi acio makorũo ũgwati-inĩ. Jesu agataarĩria ũũ: “Ngombo ndĩtũũraga kwa mwathi wayo tene na tene; no mũrũ wake atũũraga kuo tene na tene.” (Johana 8:35) Ngombo ndĩkoragwo ĩkĩĩrĩgĩrĩra kũheo igai, na no ĩingatwo hĩndĩ o yothe. Mwana ũrĩa tu ũciarĩirũo mũciĩ kana akarererũo kuo nĩwe ũtũũraga “tene na tene,” ũguo nĩ kuuga hĩndĩ ĩrĩa yothe arĩ muoyo.

Nĩ ũndũ ũcio, ma ĩgiĩ Mũriũ nĩyo ma ĩrĩa ĩkũũraga andũ kuuma mehia-inĩ marĩa marehaga gĩkuũ tene na tene. Jesu akoiga ũũ: “Mũriũ angĩgũkũũra ũkombo-inĩ, ũgũkorũo kũna ũrĩ mũkũũre.”​—Johana 8:36.