Thikũ ikũmi thutha wa Jesu kwambata igũrũ, arutwo nĩ maaitĩrĩrio roho mũtheru hĩndĩ ya Pentekoste, ũndũ ũcio ũkĩonania na ma atĩ Jesu aarĩ igũrũ. Na ũira ũngĩ makĩria nĩ ũngĩonekire. Kahinda kanini mbere ya mũrutwo Stefano kũhũũrũo na mahiga nĩ ũndũ wa kũhunjia arĩ na wĩhokeku, oigire ũũ: “Atĩrĩ, ndĩrona igũrũ rĩhingũkĩte na Mũrũ wa mũndũ arũgamĩte guoko-inĩ kwa ũrĩo kwa Ngai.”​—Atũmwo 7:56.

Jesu arĩ kũu igũrũ na Ithe, nĩ harĩ ũndũ angĩetereire ũrĩa warathĩtwo Kiugo-inĩ kĩa Ngai. Daudi aandĩkire ũũ atongoretio nĩ roho: ‘Jehova nĩerire mwathani wakwa Jesu atĩrĩ, Ikara thĩ guoko-inĩ gwakwa kwa ũrĩo, kinya ngatũma thũ ciaku ituĩke gaturũa ka makinya maku.’ Thutha wa ihinda rĩa gweterera gũthira, nĩ ‘angĩgathana arĩ o gatagatĩ ga thũ ciake.’ (Thaburi 110:​1, 2) No nĩ ũndũ ũrĩkũ Jesu angĩgakorũo agĩka arĩ igũrũ o etereire ihinda rĩa kuoera thũ ciake ikinya rĩkinye?

Hĩndĩ ya Pentekoste ya mwaka wa 33, kĩũngano gĩa Gĩkristiano nĩ kĩambĩrĩirie. Jesu arĩ o kũu igũrũ, akĩambĩrĩria gwathana igũrũ rĩa arutwo ake aitĩrĩrie maguta. (Akolosai 1:13) Akĩmatongoria wĩra-inĩ wa kũhunjia na akĩmahaarĩria nĩ ũndũ wa wĩra ũrĩa mangĩkaruta thutha-inĩ. Wĩra ũrĩkũ? Arĩa mangĩatũũrire marĩ ehokeku nginya gũkua, thutha-inĩ nĩ mangĩkariũkio na matungate marĩ athamaki hamwe na Jesu Ũthamaki-inĩ.

Ũmwe wa arĩa mangĩgatungata marĩ athamaki nĩ Saulu, ũrĩa woĩkaine ta Paulo na rĩĩtwa rĩake rĩa Kĩroma. Aarĩ Mũyahudi wakoretwo agĩtetera Watho wa Ngai na kĩyo, no nĩ aahĩtithĩtio mũno nĩ atongoria a ndini a Kĩyahudi nginya akĩnyita mbaru Stefano ahũũrũo na mahiga. Thutha ũcio, “arĩ o na marũrũ maingĩ na akĩendaga kũũraga arutwo a Mwathani,” akĩnyita njĩra erekeire Dameski. Aahetwo rũtha nĩ Kaiafa Mũthĩnjĩri-Ngai ũrĩa Mũnene anyite arutwo a Jesu na amacokie Jerusalemu. (Atũmwo 7:58; 9:1) No Saulu arĩ o njĩra-inĩ, ũtheri mũnene ũkĩmũmũrĩka na akĩgwa thĩ.

Mũgambo wa mũndũ ũtoonekaga ũkiuga: “Saulu, Saulu, ũranyarira nĩkĩ?” Saulu akĩũria:  “Nĩ we ũ, Mwathani?” Agĩcokerio atĩrĩ: “Nĩ niĩ Jesu ũrĩa ũranyarira.”​—Atũmwo 9:​4, 5.

Jesu akĩĩra Saulu athiĩ Dameski na eterere aheo ũhoro makĩria, ĩndĩ no nginya angĩatwarirũo itũũra-inĩ rĩu tondũ ndoonaga nĩ ũndũ wa gũtumumario nĩ ũtheri ũcio. Kĩoneki-inĩ kĩngĩ, Jesu akiumĩrĩra mũrutwo wake ũmwe waikaraga Dameski wetagwo Anania. Jesu akĩĩrĩra Anania kũrĩa egũthiĩ gũkora Saulu. Anania nĩ eetigagĩra gũthiĩ, no Jesu akĩmũmĩrĩria akĩmwĩra: “Mũndũ ũcio nĩ ndĩmũthuurĩte atuĩke wa gũtwara rĩĩtwa rĩakwa kũrĩ ndũrĩrĩ, na kũrĩ athamaki, o na kũrĩ ciana cia Isiraeli.” Saulu akĩhota kuona rĩngĩ, na “akĩambĩrĩria kũhunjia thĩinĩ wa thunagogi ũhoro wĩgiĩ Jesu, atĩ nĩwe Mũrũ wa Ngai” arĩ o kũu Dameski.​—Atũmwo 9:​15, 20.

Magĩteithĩrĩrio nĩ Jesu, Paulo na ahunjia angĩ magĩtwarithia na mbere wĩra wa kũhunjia ũrĩa Jesu aambĩrĩirie. Ngai akĩmarathima na njĩra nene. Mĩaka ta 25 thutha wa Paulo kuumĩrĩrũo nĩ Jesu njĩra-inĩ agĩthiĩ Dameski, aandĩkire atĩ ũhoro ũrĩa mwega nĩ ‘wahunjĩtio kũndũ guothe thĩinĩ wa thĩ.’​—Akolosai 1:23.

Mĩaka mĩingĩ thutha-inĩ, Jesu nĩ aaheire Johana, mũtũmwo ũrĩa eendete cioneki nyingĩ iria ikoragwo ibuku-inĩ rĩa Kũguũrĩrio. Kũgerera cioneki icio, Johana nĩ ta aatũũrire nginya akĩona Jesu agĩcoka arĩ Mũthamaki. (Johana 21:22) ‘Kũgerera roho mũtheru, Johana nĩ eekorire arĩ thĩinĩ wa mũthenya wa Mwathani.’ (Kũguũrĩrio 1:10) Ihinda rĩu rĩngĩgakorũo rĩrĩ rĩrĩkũ?

Ũrathi ũrĩa ũrĩ Bibilia-inĩ wonanagia atĩ “mũthenya wa Mwathani” wambĩrĩirie mahinda-inĩ maya. Mwaka-inĩ wa 1914, Mbaara ya Mbere ya Thĩ ĩkĩambĩrĩria. Mĩaka ĩrĩa ĩrũmĩrĩire kuuma hĩndĩ ĩyo ĩkoretwo na mbaara nyingĩ makĩria, mĩrimũ, ng’aragu, ithingithia, na maũndũ mangĩ maronania kũhinga gwa “kĩmenyithia” kĩrĩa Jesu aaheire atũmwo ake kĩgiĩ “gũkorũo kuo” gwake na “ithirĩro.” (Mathayo 24:​3, 7, 8, 14) Rĩu ũhoro mwega wa Ũthamaki ndũrahunjio o gĩcigo-inĩ kĩrĩa gĩaathanangwo nĩ Roma, ĩndĩ ũrahunjio thĩ yothe.

Johana aatongoririo nĩ roho gũtaarĩria ũndũ ũcio akiuga: “Rĩu Ngai nĩ areheire andũ ũhonokio na hinya wake nĩ ũguũrĩtio na Ũthamaki wake ũkahandwo na wathani wa Kristo wake ũkambĩrĩria.” (Kũguũrĩrio 12:10) Kwoguo Ũthamaki wa Ngai, ũrĩa Jesu aahunjagia ũhoro waguo, rĩu nĩ ũrathana!

Ũcio nĩ ũhoro mwega mũno harĩ arũmĩrĩri othe ehokeku a Jesu. No mekĩrũo ngoro nĩ ciugo ici cia Johana: “Nĩ ũndũ ũcio-rĩ, gĩkenei igũrũ rĩrĩ o na inyuĩ mũikaraga kuo! Kaĩ thĩ o na iria irĩ na haaro-ĩ, tondũ Mũcukani nĩ aharũrũkĩte kũrĩ inyuĩ arĩ na marũrũ manene, akĩmenyaga atĩ arĩ na ihinda inini.”​—Kũguũrĩrio 12:12.

Kwoguo, rĩu Jesu ndaikarĩte guoko-inĩ kwa ũrĩo gwa Ithe etereire. Arathana arĩ Mũthamaki, na ica ikuhĩ nĩ ekweheria thũ ciake ciothe. (Ahibirania 10:​12, 13) Nĩ maũndũ marĩkũ mega marĩ mbere itũ?