Kũrĩ wee Mũhunjia wa Ũthamaki:

Ta hũũra mbica ũrĩ ũmwe wa atũmwo, mũrũgamĩte Kĩrĩma-inĩ kĩa Mĩtamaiyũ. Jesu akamuumĩrĩra. Arĩ hakuhĩ kwambata igũrũ, akamwĩra ũũ: “Nĩ mũkaamũkĩra hinya rĩrĩa roho mũtheru ũgooka igũrũ rĩanyu, na nĩ mũgaatuĩka aira akwa thĩinĩ wa Jerusalemu, Judea guothe, Samaria, o nginya ituri ciothe cia thĩ.” (Atũm. 1:8) Hihi ũngĩiyũkia ũndũ ũcio atĩa?

Wahota kũigua ũritũhĩirũo mũno nĩ wĩra ũcio. No wĩyũrie, ‘Tũngĩhota atĩa kũhunjia “nginya ituri ciothe cia thĩ” na tũrĩ o gĩkundi kĩnini?’ No ũririkane ciugo ici Jesu aaugire ũtukũ wa mũico atanakua: “Ngombo ti nene gũkĩra mwathi wayo. Angĩkorũo nĩ manyarirĩte niĩ, nĩ makaamũnyarira o na inyuĩ; angĩkorũo nĩ mathĩkĩire kiugo gĩakwa, nĩ magaathĩkĩra kĩanyu o nakĩo. No makaamwĩka maũndũ macio mothe moru nĩ ũndũ wa rĩĩtwa rĩakwa, tondũ matiũĩ Ũrĩa wandũmire.” (Joh. 15:20, 21) Thutha wa gwĩcũrania ciugo icio wahota kwĩyũria, ‘Ingĩka atĩa nĩguo ndute ũira kĩhinyio o na ngĩkararagio kana ngĩnyariragwo?’

O na ithuĩ no twĩyũrie ciũria ta icio, tondũ tũrĩ Aira a Jehova, nĩ tũheetwo wĩra wa kũruta ũira kĩhinyio kũrĩ “ndũrĩrĩ-inĩ ciothe,” nginya “ituri ciothe cia thĩ.” (Mat. 28:19, 20) Hihi tũngĩhingia atĩa wĩra ũcio makĩria rĩrĩa andũ maratũkararia?

Ibuku rĩa Atũmwo rĩkoragwo na ũhoro wa gũcanjamũra wĩgiĩ ũrĩa atũmwo na Akristiano arĩa angĩ a karine ya mbere maahotire kũruta wĩra wa kũhunjia magĩteithĩrĩrio nĩ Jehova. Ibuku rĩrĩ nĩ rĩgũgũteithia gũthuthuria ũhoro ũcio, na kuona ũrĩa Akristiano acio maacanjamũkaga mona ũrĩa wĩra wa kũhunjia wakũraga na ihenya. Nĩ ũkũgegio nĩ maũndũ marĩa mothe Akristiano a karine ya mbere maahaanaine na a mahinda maya. Nĩ ũkuona atĩ maũndũ macio matihutanĩtie tu na wĩra ũrĩa tũrutaga no nĩ nginya ũrĩa tũbangĩtwo nĩguo tũrute wĩra ũcio. Gwĩcũrania ũhoro ũcio no gũgũteithie gũkorũo na ma biũ atĩ Jehova Ngai nĩwe ũratongoria gĩcunjĩ gĩa gũkũ thĩ kĩa ithondeka rĩake.

Tũrehoka na tũkahoya atĩ gũthuthuria ibuku rĩa Atũmwo nĩ gũgũgũteithia gũkorũo na ma biũ atĩ Jehova nĩ arĩgũteithagia na atĩ roho wake mũtheru nĩ ũrĩkũheaga hinya wa gũkirĩrĩria. Ibuku rĩrĩ rĩrogwĩkĩra ngoro gũthiĩ na mbere ‘kũruta ũira kĩhinyio’ wĩgiĩ Ũthamaki wa Ngai na gũteithia arĩa angĩ kũgerera njĩra-inĩ ya muoyo.—Atũm. 28:23; 1 Tim. 4:16.