ITHOMO RĨA 16

Nĩ Maũndũ Marĩkũ Jesu Eekire Rĩrĩa Aarĩ Gũkũ Thĩ?

THAAKA

Andũ aingĩ meciragia ũhoro wa Jesu arĩ gakenge, arĩ mũnabii mũũgĩ, kana agĩkua acuurĩtio mũtĩ-inĩ. No hihi no twĩrute maũndũ mangĩ mamwĩgiĩ tũngĩthuthuria ũtũũro wake rĩrĩa aarĩ gũkũ thĩ? Ithomo-inĩ rĩrĩ, tũkwarĩrĩria maũndũ mamwe ma bata marĩa Jesu eekire, na ũrĩa ũngĩgunĩka kuumana namo.

1. Nĩ wĩra ũrĩkũ warĩ wa bata mũno harĩ Jesu?

Wĩra ũrĩa warĩ wa bata mũno harĩ Jesu nĩ “[kũhunjia] ũhoro ũrĩa mwega wa Ũthamaki wa Ngai.” (Thoma Luka 4:43.) Aahunjagia ũhoro mwega wa atĩ Ngai nĩ akaarehe ũthamaki, kana thirikari, ĩrĩa ĩkaaniinĩra andũ mathĩna mothe. a Jesu aahunjirie na kĩyo ndũmĩrĩri ĩyo ya gwĩkĩra ngoro kwa ihinda rĩa mĩaka ĩtatũ na nuthu.—Mathayo 9:35.

2. Jesu aaringaga ciama nĩkĩ?

Bibilia nĩ ĩtaarĩirie “mawĩko ma hinya, maũndũ ma magegania na ciama iria Ngai aaringire . . . kũgerera harĩ [Jesu].” (Atũmwo 2:22) Ngai aaheire Jesu hinya wa gwatha rĩera, kũhũnia andũ ngiri nyingĩ, kũhonia arĩa arwaru, o na nginya kũriũkia arĩa makuĩte. (Mathayo 8:23-27; 14:15-21; Mariko 6:56; Luka 7:11-17) Ciama icio Jesu aaringire nĩ cioonanirie wega atĩ aatũmĩtwo nĩ Ngai. Ningĩ nĩ cioonanirie atĩ Jehova nĩ arĩ hinya wa kũniina mathĩna maitũ mothe.

3. Tũngĩĩruta atĩa kuumana na mũtũũrĩre wa Jesu?

Jesu aathĩkagĩra Jehova maũndũ-inĩ mothe. (Thoma Johana 8:29.) O na gũtuĩka nĩ aakararagio, Jesu aathĩkĩire Ithe arĩ na wĩhokeku o nginya rĩrĩa aakuire. Nĩ oonanirie atĩ andũ no mahote gũtungatĩra Ngai o na makĩhiũranagia na moritũ. Kwoguo Jesu nĩ aatũtigĩire “kĩonereria nĩguo [twĩrutanagĩrie] biũ kũrũmĩrĩra makinya make.”—1 Petero 2:21.

THUTHURIA MAKĨRIA

Reke tũthuthurie ũrĩa Jesu aahunjagia ũhoro ũrĩa mwega na ũrĩa aaringire ciama.

4. Jesu nĩ aahunjagia ũhoro ũrĩa mwega

Jesu aathiaga magũrũ kilomita nyingĩ agereire barabara cia tĩĩri akĩhunjia ũhoro ũrĩa mwega kũrĩ andũ aingĩ o ũrĩa angĩahotire. Thomai Luka 8:1, mũcoke mwarĩrĩrie ciũria ici:

Hihi Jesu aahunjagĩria o andũ arĩa mookaga harĩ we kũmũthikĩrĩria?
Jesu eekĩraga kĩyo atĩa nĩguo akinyĩre andũ?

Ngai nĩ aarathĩte atĩ Mesia nĩ angĩkahunjia ũhoro mwega. Thomai Isaia 61:1, 2, mũcoke mwarĩrĩrie ciũria ici:

Jesu aahingirie ũrathi ũcio atĩa?
Hihi nĩ ũkuona ta andũ marabatara kũheo ũhoro ũcio mwega ũmũthĩ?

5. Jesu nĩ aarutanire maũndũ ma bata

Makĩria ma kũhunjia ũhoro mwega wĩgiĩ Ũthamaki wa Ngai, Jesu nĩ aarutanire maũndũ tũngĩhũthĩra ũtũũro-inĩ. Ngerekano imwe nĩ cionanĩtio Mahunjio-inĩ Make ma Kĩrĩma-inĩ. Thomai Mathayo 6:14, 34 na 7:12, mũcoke mwarĩrĩrie ciũria ici:

Nĩ ũtaaro ũrĩkũ Jesu aaheanire mĩhari-inĩ ĩyo?
Hihi nĩ ũkuona ta ũtaaro ũcio ũngĩtũteithia ũmũthĩ?

6. Jesu nĩ aaringaga ciama

Jehova nĩ aaheire Jesu hinya wa kũringa ciama nyingĩ. Nĩguo muone ngerekano ĩmwe, thomai Mariko 5:25-34 kana mwĩrorere VIDEO ĩno, mũcoke mwarĩrĩrie ciũria iria irũmĩrĩire.

VIDEO: Jesu Kũhonia Mũtumia Warĩ Mũrwaru (5:10)

Kũringana na video ĩyo-rĩ, nĩ ũndũ ũrĩkũ mũtumia ũcio warĩ mũrwaru eetĩkĩtie?
Nĩ ũndũ ũrĩkũ wagũkenia wĩgiĩ kĩama kĩu?

Thomai Johana 5:36, mũcoke mwarĩrĩrie kĩũria gĩkĩ:

Ciama iria Jesu aaringire ‘ciarutire ũira’ ũrĩkũ ũmwĩgiĩ?

Hihi nĩ ũĩ?

Maũndũ maingĩ marĩa tũũĩ megiĩ Jesu moimĩte mabuku-inĩ mana ma Bibilia marĩa metagwo Injiri, nĩmo Mathayo, Mariko, Luka, na Johana. O mwandĩki nĩ agwetete maũndũ ngũrani megiĩ Jesu. Rĩrĩa twathoma mabuku macio mana, nĩ tũtaũkagĩrũo wega nĩ ũtũũro wa Jesu.

MATHAYO

nĩwe waandĩkire Injiri yake mbere. Nĩ ĩtaarĩirie morutani ma Jesu, na makĩria maũndũ marĩa Jesu aarutanire igũrũ rĩgiĩ Ũthamaki wa Ngai.
MARIKO

nĩwe waandĩkire Injiri ĩrĩa nguhĩ mũno. Nĩ ĩtaarĩirie maũndũ maingĩ ma gũcanjamũra.
LUKA

arĩrĩirie makĩria ũhoro wa mahoya na ũrĩa Jesu aarũmbũyanagia na atumia.
JOHANA

ataarĩirie maũndũ maingĩ marĩa Jesu aaririe na arata ake a hakuhĩ o hamwe na andũ angĩ, ũndũ ũrĩa ũtũteithagia kũmenya Jesu aarĩ mũndũ wa mũthemba ũrĩkũ.