ITHOMO RĨA 31
Ũthamaki wa Ngai nĩ Kĩĩ?
Ndũmĩrĩri ĩrĩa ya bata makĩria thĩinĩ wa Bibilia ĩkoragwo ĩhutanĩtie na Ũthamaki wa Ngai. Jehova akaahũthĩra Ũthamaki ũcio kũhingia muoroto ũrĩa aarĩ naguo kĩambĩrĩria-inĩ wa gũtua thĩ ĩno Paradiso. Ũthamaki ũcio nĩ kĩĩ? Tũmenyaga atĩa atĩ nĩ ũrathana ihinda-inĩ rĩrĩ? Nĩ maũndũ marĩkũ ũhingĩtie? Na nĩ maũndũ marĩkũ ũkaahingia ihinda-inĩ rĩũkĩte? Ciũria icio nĩ igũcokio ithomo-inĩ rĩrĩ na mathomo-inĩ merĩ marĩa marũmĩrĩire.
1. Ũthamaki wa Ngai nĩ kĩĩ, na Mũthamaki waguo nũũ?
Ũthamaki ũcio nĩ thirikari ĩhandĩtwo nĩ Jehova Ngai. Mũthamaki waguo nĩ Jesu Kristo, na athanaga arĩ igũrũ. (Mathayo 4:17; Johana 18:36) Bibilia yugaga ũũ ũhoro-inĩ wĩgiĩ Jesu: ‘Agaathana arĩ Mũthamaki tene na tene.’ (Luka 1:32, 33) Jesu arĩ Mũthamaki wa Ũthamaki wa Ngai, agaathaga andũ othe gũkũ thĩ.
2. Nĩa magaathana hamwe na Jesu?
Jesu ndagaathana arĩ wiki. “Andũ kuuma mĩhĩrĩga-inĩ yothe na thiomi na ikundi cia andũ na ndũrĩrĩ” nĩ magaathana “marĩ athamaki igũrũ rĩa thĩ.” (Kũguũrĩrio 5:9, 10) Nĩ andũ aigana magaathana hamwe na Kristo? Kuuma hĩndĩ ĩrĩa Jesu aarĩ gũkũ thĩ, Akristiano milioni nyingĩ nĩ matuĩkĩte arũmĩrĩri ake. O na kũrĩ ũguo, no andũ 144,000 magaathiĩ igũrũ nĩguo magaathane hamwe na Jesu. (Thoma Kũguũrĩrio 14:1-4.) Akristiano acio angĩ othe magaatuĩka raia a Ũthamaki ũcio gũkũ thĩ.—Thaburi 37:29.
3. Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari cia andũ?
O na rĩrĩa atongoria a gũkũ thĩ marerutanĩria gwĩka maũndũ mega, matikoragwo na hinya wa gwĩka maũndũ marĩa mothe mangĩenda. Na atongoria arĩa macokaga ithenya rĩao no makorũo marĩ na mwĩyendo na matekwenda gũteithia andũ. No gũtirĩ mũndũ ũngĩ ũgaacoka ithenya rĩa Jesu, Mũtongoria wa Ũthamaki wa Ngai. Ngai nĩ “[ahandĩte] ũthamaki ũrĩa gũtarĩ hĩndĩ ũkaanangwo.” (Danieli 2:44) Jesu agaathana igũrũ rĩa thĩ yothe, na ndagaakoragwo na mũthutũkanio. We nĩ arĩ wendo, nĩ mũtugi, nĩ arũmagĩrĩra kĩhooto, na nĩ akaaruta andũ kũrũmbũyania na njĩra o ta ĩyo ya wendo, ũtugi, na kĩhooto.—Thoma Isaia 11:9.
THUTHURIA MAKĨRIA
Reke tũthuthurie tuone nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari o yothe ya andũ.
4. Thirikari ĩrĩ hinya nĩ ĩgaathana thĩinĩ wa thĩ yothe
Jesu Kristo arĩ na hinya mũnene wa gwathana gũkĩra mũtongoria ũngĩ o wothe ũrĩ wathana. Thomai Mathayo 28:18, mũcoke mwarĩrĩrie kĩũria gĩkĩ:
-
Nĩ na njĩra ĩrĩkũ wathani wa Jesu ũrĩ mũnene gũkĩra wa mũtongoria ũngĩ o wothe wa gũkũ thĩ?
Thirikari cia andũ ti cia gũtũũra, na o ĩmwe yacio yathanaga thĩinĩ wa gacunjĩ kanini ga thĩ. Ĩ naguo Ũthamaki wa Ngai? Thomai Danieli 7:14, mũcoke mwarĩrĩrie ciũria ici:
-
Nĩkĩ nĩ ũndũ mwega atĩ Ũthamaki wa Ngai “ndũkaaniinwo”?
-
Nĩkĩ nĩ ũndũ mwega atĩ ũgaathana thĩinĩ wa thĩ yothe?
5. Thirikari cia andũ ciagĩrĩire kweherio
Ũthamaki wa Ngai ũkeeheria thirikari cia andũ na wathane ithenya rĩacio nĩkĩ? Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Nĩ mathĩna marĩkũ marehetwo nĩ wathani wa andũ?
Thomai Kohelethu 8:9, mũcoke mwarĩrĩrie ciũria ici:
-
Hihi nĩ ũkuona ta Ũthamaki wa Ngai wagĩrĩire kweheria thirikari cia andũ na wathane ithenya rĩacio? Ũngiuga ũguo nĩkĩ?
6. Ũthamaki wa Ngai ũrĩ na aathani mataũkagĩrũo nĩ ithuĩ
Tondũ Mũthamaki witũ, Jesu, anatũũra gũkũ thĩ arĩ mũndũ, no ahote “gũtũiguĩra tha maũndũ-inĩ marĩa twagĩte hinya.” (Ahibirania 4:15) Arũme na atumia ehokeku 144,000 arĩa magaathana hamwe na Jesu mathuurĩtwo nĩ Jehova “kuuma mĩhĩrĩga-inĩ yothe na thiomi na ikundi cia andũ na ndũrĩrĩ.”—Kũguũrĩrio 5:9.
-
Hihi nĩ ũrona arĩ ũndũ mwega gũkorũo atĩ Jesu na arĩa othe magaathana nake nĩ moĩ ũrĩa ũtũũro wa andũ gũkũ thĩ ũkoragwo ũhaana? Ũngiuga ũguo nĩkĩ?
Jehova nĩ athuurĩte arũme na atumia kuuma ndũrĩrĩ-inĩ ciothe nĩguo magaathana hamwe na Jesu
7. Ũthamaki wa Ngai ũkoragwo na mawatho mega makĩria
Thirikari ithondekaga mawatho irĩ na muoroto wa gũteithia na kũgitĩra raia a cio. O na Ũthamaki wa Ngai nĩ ũkoragwo na mawatho marĩa raia aguo magĩrĩirũo kũrũmĩrĩra. Thomai 1 Akorintho 6:9-11, mũcoke mwarĩrĩrie ciũria ici:
-
Ũgwĩciria thĩ ĩgaakorũo ĩhaana atĩa rĩrĩa andũ othe magaakorũo magĩathĩkĩra mawatho ma Ngai megiĩ mĩtugo? a
-
Nĩ ũkuona ta Jehova arĩ na kĩhooto gĩa kwĩrĩgĩrĩra raia a Ũthamaki ũcio marũmĩrĩre mawatho macio? Ũngiuga ũguo nĩkĩ?
-
Nĩ kĩĩ kĩronania atĩ andũ arĩa matathĩkagĩra mawatho macio no magarũrũke?—Rora mũhari wa 11.
Thirikari nĩ ithondekaga mawatho nĩguo igitĩre na iteithie raia a cio. Ũthamaki wa Ngai ũkoragwo na mawatho mega o na makĩria ma kũgitĩra na gũteithia raia a guo
ANDŨ AMWE MOIGAGA: “Ũthamaki wa Ngai ũrĩ ngoro-inĩ yakwa.”
-
Wee ũngiuga atĩa?
ŨRĨA TWERUTA
Ũthamaki wa Ngai nĩ thirikari ya biũ ĩkoragwo igũrũ na ĩgaathana thĩinĩ wa thĩ yothe.
Ciũria cia gũcokera
-
Nĩa magaathana thĩinĩ wa Ũthamaki wa Ngai?
-
Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari o yothe ya andũ?
-
Jehova erĩgagĩrĩra raia a Ũthamaki wake meke atĩa?
RIKĨRA
Thoma wone ũrĩa Jesu aarutanire igũrũ rĩgiĩ kũrĩa Ũthamaki ũcio ũkoragwo.
“Hihi Ũthamaki wa Ngai Ũrĩ Ngoro-inĩ ya Mũndũ?” (Gĩcunjĩ thĩinĩ wa jw.org/ki)
Nĩ kĩĩ gĩtũmaga Aira a Jehova mone atĩ gũkorũo marĩ ehokeku harĩ Ũthamaki wa Ngai nĩ kwa bata makĩria gũkĩra gũkorũo marĩ ehokeku harĩ thirikari cia andũ?
Thuthuria wone ũrĩa Bibilia ĩrutanaga igũrũ rĩgiĩ arĩa 144,000 Jehova athuurĩte nĩguo magaathana hamwe na Jesu.
Nĩ kĩĩ gĩateithirie mũtumia ũmwe warĩ njera gũkorũo na ma atĩ no Ngai tu ũngĩrehe kĩhooto thĩinĩ wa thĩ?
a Mawatho mamwe megiĩ mĩtugo nĩ makaarĩrĩrio thĩinĩ wa Gĩcunjĩ gĩa 3.
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
