ITHOMO RĨA 34

Tũngĩonania Atĩa atĩ nĩ Twendete Jehova?

THAAKA

Hihi nĩ ũiguĩte ta ũkuhĩrĩirie Ngai makĩria kuuma rĩrĩa waambĩrĩirie kwĩruta Bibilia? No wende gũthiĩ na mbere gwĩkĩra hinya ũrata waku hamwe nake? Angĩkorũo no wende, ririkana atĩ o ũrĩa Jehova arĩonaga wendo waku harĩ we ũkĩongerereka, noguo arĩkwendaga makĩria na agakũrũmbũyia. Ũngĩmuonia atĩa atĩ nĩ ũmwendete?

1. Tuonagia Jehova atĩa atĩ nĩ tũmwendete?

Tuonagia Jehova atĩ nĩ tũmwendete na njĩra ya kũmwathĩkĩra. (Thoma 1 Johana 5:3.) Ndaringagĩrĩria mũndũ o na ũmwe amwathĩkĩre. No aheete o ũmwe witũ mweke wa gũthuura kana nĩ ekũmwathĩkĩra kana ndekũmwathĩkĩra. Ekĩte ũguo nĩkĩ? Tondũ endaga “[tũmwathĩkĩre] kuuma ngoro-inĩ.” (Aroma 6:17) Ũguo nĩ kuuga atĩ endaga tũmwathĩkĩre tondũ nĩ tũmwendete, no ti tondũ wa kũringĩrĩrio. Gĩcunjĩ gĩa 3 na gĩa 4 kĩa ibuku rĩrĩ nĩ gĩgũgũteithia kũmenya ũrĩa ũngĩonania wendo waku harĩ Jehova na njĩra ya gwĩka maũndũ marĩa mamũkenagia na gwĩthema marĩa matamũkenagia.

2. Nĩ kĩĩ kĩngĩtũma ũkorũo ũrĩ ũndũ mũritũ kuonania wendo witũ harĩ Jehova?

“Mũndũ ũrĩa mũthingu acemanagia na moritũ maingĩ.” (Thaburi 34:19) Ithuothe nĩ tũhĩtagia tondũ tũtirĩ akinyanĩru. Na ningĩ no tũcemanie na mathĩna ma kĩĩmbeca, wagi wa kĩhooto, na moritũ mangĩ. Rĩrĩa tũrahiũrania na moritũ, no tũigue tũkĩritũhĩrũo nĩ gwĩka ũrĩa Jehova endaga, tondũ maita maingĩ no ũkorũo ũrĩ ũndũ mũhũthũ kwaga gwathĩkĩra Jehova. No rĩrĩa wathĩkĩra Jehova ũrĩ na wĩhokeku, wonanagia atĩ nĩ ũmwendete gũkĩra kĩndũ kĩngĩ o gĩothe. Ningĩ nĩ wonanagia atĩ nĩ ũkoragwo ũrĩ mwĩhokeku harĩ we. Nake nĩ arĩkoragwo arĩ mwĩhokeku harĩ wee, na gũtirĩ hĩndĩ agaagũtiga.—Thoma Thaburi 4:3.

THUTHURIA MAKĨRIA

Reke tũthuthurie tuone kĩrĩa gĩtũmaga Jehova akene rĩrĩa twamwathĩkĩra, na kĩrĩa kĩngĩtũteithia gũtũũra tũrĩ ehokeku harĩ we.

3. Thitango ĩrakũhutia

Kũringana na ibuku rĩa Ayubu, Shaitani ooimĩririe thitango kwerekera Ayubu na kwerekera andũ othe arĩa mendaga gũtungatĩra Jehova. Thomai Ayubu 1:1, 6–2:10, mũcoke mwarĩrĩrie ciũria ici:

Kũringana na Shaitani-rĩ, Ayubu aathĩkagĩra Jehova nĩkĩ?—Rora Ayubu 1:9-11.
Shaitani ooigire atĩa igũrũ rĩgiĩ andũ othe, nginya wee?—Rora Ayubu 2:4.

Thomai Ayubu 27:5b, mũcoke mwarĩrĩrie kĩũria gĩkĩ:

Ayubu oonanirie atĩa atĩ nĩ eendete Jehova kuuma ngoro?

Ayubu oonanirie atĩ nĩ eendete Jehova na njĩra ya gũtũũra arĩ mwĩhokeku harĩ we

Tuonanagia atĩ nĩ twendete Jehova na njĩra ya gũtũũra tũrĩ ehokeku harĩ we

4. Kenagia ngoro ya Jehova

Thomai Thimo 27:11, mũcoke mwarĩrĩrie ciũria ici:

Jehova aiguaga atĩa rĩrĩa wonania ũũgĩ na njĩra ya kũmwathĩkĩra? Ũngiuga ũguo nĩkĩ?

5. No ũtũũre ũrĩ mwĩhokeku harĩ Jehova

Kwenda Jehova nĩ gũtũtindĩkaga kwĩra andũ arĩa angĩ ũhoro wake. Wĩhokeku witũ harĩ we nĩ ũtũtindĩkaga gwĩka ũguo o na rĩrĩa atarĩ ũndũ mũhũthũ. Mwĩrorerei VIDEO ĩno, mũcoke mwarĩrĩrie ciũria iria irũmĩrĩire.

VIDEO: Tetera Wĩtĩkio Waku o na Wokĩrĩrũo (5:09)

Hihi nĩ ũritũhagĩrũo kwĩra andũ arĩa angĩ ũhoro wĩgiĩ Jehova?
Kũringana na video ĩyo-rĩ, nĩ kĩĩ gĩateithirie Grayson gũtooria guoya ũrĩa aarĩ naguo?

Nĩ ũndũ mũhũthũ gũtũũria wĩhokeku witũ harĩ Jehova angĩkorũo nĩ twendete maũndũ marĩa endete na tũgathũũra marĩa athũire. Thomai Thaburi 97:10, mũcoke mwarĩrĩrie ciũria ici:

Kũringana na maũndũ marĩa wĩrutĩte-rĩ, nĩ maũndũ ta marĩkũ Jehova endete? Nĩ maũndũ ta marĩkũ athũire?
Nĩ kĩĩ kĩngĩgũteithia kwenda maũndũ marĩa mega na gũthũũra marĩa moru?

6. Nĩ tũgunĩkaga rĩrĩa twathĩkĩra Jehova

Gwathĩkĩra Jehova nĩguo ũndũ ũrĩa mwega biũ hĩndĩ ciothe. Thomai Isaia 48:17, 18, mũcoke mwarĩrĩrie ciũria ici:

Hihi nĩ ũkuona ta tũngĩkorũo na ma atĩ hingo ciothe Jehova nĩ amenyaga ũndũ ũrĩa mwega biũ na ithuĩ? Ũngiuga ũguo nĩkĩ?
Ũgunĩkĩte atĩa nĩ kwĩruta Bibilia na ũhoro wĩgiĩ Jehova, Ngai ũrĩa wa ma?

MŨNDŨ NO ORIE: “Hihi ciĩko ciakwa no itũme Ngai akene?”