Jesu nĩwe Mũtwe wa kĩũngano gĩa Gĩkristiano. (Aefeso 5:23) Ũmũthĩ, Jesu arĩ mũthamaki kũrĩa igũrũ, atongoragia arũmĩrĩri ake gũkũ thĩ kũgerera “ngombo ĩrĩa njĩhokeku na njũgĩ.” (Thoma Mathayo 24:45.) Tondũ “ngombo” ĩyo yaamũrirũo nĩ Jesu Kristo, nĩ ĩkoragwo na ũnene wa gĩkĩro kĩna. O na kũrĩ ũguo, ngombo ĩyo no mũhaka yathĩkagĩre Kristo na ĩtungatagĩre ariũ a Ithe na Kristo. Ngombo ĩyo nũũ? Ĩtũrũmbũyagia atĩa?

1. “Ngombo ĩrĩa njĩhokeku na njũgĩ” nũũ?

Hingo ciothe Jehova akoretwo akĩhũthĩra mũndũ ũmwe kana gakundi kanini ka andũ kũheana ũtongoria kũrĩ andũ ake. (Malaki 2:7; Ahibirania 1:1) Thutha wa Jesu gũkua, atũmwo na athuri arĩa maarĩ thĩinĩ wa Jerusalemu nĩo mooire ũtongoria ũcio. (Atũmwo 15:2) Na njĩra o ta ĩyo, ũmũthĩ gakundi kanini ka athuri, nĩo Kĩama Kĩrĩa Gĩtongoragia kĩa Aira a Jehova, nĩo maheanaga irio cia kĩĩroho na magatongoria wĩra-inĩ wa kũhunjia. Gakundi kau nĩko “ngombo ĩrĩa njĩhokeku na njũgĩ, ĩrĩa [Jesu] aamũrire.” (Mathayo 24:45a) Athuri othe a Kĩama Kĩrĩa Gĩtongoragia nĩ Akristiano aitĩrĩrie maguta arĩa makoragwo na kĩĩrĩgĩrĩro gĩa gũgaathana hamwe na Kristo Ũthamaki-inĩ wake wa igũrũ rĩrĩa makaarĩkia ũtũũro wao wa gũkũ thĩ.

2. Ngombo ĩrĩa njĩhokeku ĩheanaga irio irĩkũ cia kĩĩroho?

Jesu ooigire atĩ ngombo ĩyo “[ĩngĩkaheaga Akristiano arĩa angĩ] irio ihinda rĩrĩa rĩagĩrĩire.” (Mathayo 24:45b) O ta ũrĩa irio iria tũrĩaga itũteithagia gũkorũo na hinya na ũgima mwega wa mwĩrĩ, no taguo irio cia kĩĩroho, nĩcio ũrutani wa Kiugo kĩa Ngai, itũheaga hinya ũrĩa tũrabatara nĩguo tũikare tũrĩ ehokeku harĩ Jehova na tũhote kũhingia wĩra ũrĩa Jesu atũheete. (1 Timotheo 4:6) Twamũkagĩra irio icio cia kĩĩroho kũgerera mĩcemanio, igomano, o hamwe na mabuku marĩa maragĩrĩria Bibilia na video iria itũteithagia gũtaũkĩrũo nĩ wendi wa Ngai na gwĩkĩra hinya ũrata witũ hamwe nake.

 THUTHURIA MAKĨRIA

3. No mũhaka andũ a Jehova makoragwo na mũbango mwega

Kĩama Kĩrĩa Gĩtongoragia nĩkĩo kĩbangaga wĩra wa Aira a Jehova kĩrĩ rungu rwa ũtongoria wa Jesu. Mũbango o ta ũcio nĩguo warũmagĩrĩrũo nĩ Akristiano a karine ya mbere. Mwĩrorerei VIDEO ĩno.

Thomai 1 Akorintho 14:33, 40, mũcoke mwarĩrĩrie kĩũria gĩkĩ:

• Mĩhari ĩyo ĩronania atĩa atĩ Jehova nĩ endaga Aira ake makoragwo na mũbango mwega?

4. Ngombo ĩrĩa njĩhokeku nĩyo ĩbangaga wĩra witũ wa kũhunjia

Wĩra wa kũhunjia nĩguo warĩ wa bata makĩria harĩ Akristiano a karine ya mbere. Thomai Atũmwo 8:14, 25, mũcoke mwarĩrĩrie ciũria ici:

• Nĩa maaheanaga ũtongoragia wĩgiĩ wĩra wa kũhunjia hĩndĩ ya Akristiano a karine ya mbere?

• Petero na Johana maaiyũkirie atĩa ũtongoria wa atũmwo arĩa angĩ?

Wĩra wa kũhunjia nĩguo wĩra ũrĩa wa bata mũno ũbangagwo nĩ Kĩama Kĩrĩa Gĩtongoragia. Mwĩrorerei VIDEO ĩno.

 Jesu nĩ aatĩtĩrithirie ũrĩa wĩra wa kũhunjia ũrĩ wa bata. Thomai Mariko 13:10, mũcoke mwarĩrĩrie ciũria ici:

• Nĩ kĩĩ gĩtũmaga Kĩama Kĩrĩa Gĩtongoragia kĩone wĩra wa kũhunjia ũrĩ wa bata mũno?

• Tũbataraga “ngombo ĩrĩa njĩhokeku na njũgĩ” ĩbange wĩra wa kũhunjia thĩinĩ wa thĩ yothe nĩkĩ?

5. Ngombo ĩrĩa njĩhokeku nĩ ĩheanaga ũtongoria

Kĩama Kĩrĩa Gĩtongoragia nĩkĩo kĩheanaga ũtongoria kũrĩ Akristiano thĩinĩ wa thĩ yothe. Kĩmenyaga atĩa ũtongoria ũrĩa kĩagĩrĩirũo kũheana? Ta wĩcirie ũrĩa kĩama kĩrĩa gĩatongoragia hĩndĩ ya Akristiano a karine ya mbere gĩekaga ũguo. Thomai Atũmwo 15:1, 2, mũcoke mwarĩrĩrie ciũria ici:

• Nĩ ũndũ ũrĩkũ watũmĩte kũgĩe na ngarari harĩ Akristiano amwe a karine ya mbere?

• Paulo, Baranaba, hamwe na andũ angĩ maathiire gwetha ũtongoria kuuma kũrĩ a?

Thomai Atũmwo 15:12-18, 23-29, mũcoke mwarĩrĩrie kĩũria gĩkĩ:

• Kĩama kĩrĩa gĩatongoragia hĩndĩ ya karine ya mbere gĩekire atĩa gĩtanatua itua nĩguo kĩgĩe na ũtongoria wa Ngai ũhoro-inĩ ũcio?—Rora mũhari wa 12, 15, na 28.

Thomai Atũmwo 15:30, 31 na 16:4, 5, mũcoke mwarĩrĩrie ciũria ici:

• Akristiano a karine ya mbere maaiyũkirie atĩa ũtongoria ũrĩa maaheirũo nĩ kĩama kĩrĩa gĩatongoragia?

• Jehova aamarathimire atĩa nĩ ũndũ wa gwathĩka?

Thomai 2 Timotheo 3:16 na Jakubu 1:5, mũcoke mwarĩrĩrie kĩũria gĩkĩ:

• Kĩama Kĩrĩa Gĩtongoragia gĩcaragia ũtongoria kũ gĩgĩtua matua ũmũthĩ?

 ŨRĨA TWERUTA

Kĩama Kĩrĩa Gĩtongoragia nĩkĩo “ngombo ĩrĩa njĩhokeku na njũgĩ” ĩrĩa yaamũrirũo nĩ Kristo. Nĩkĩo kĩheanaga ũtongoria na irio cia kĩĩroho kũrĩ Akristiano thĩinĩ wa thĩ yothe.

Ciũria cia gũcokera

• Nũũ waamũrire “ngombo ĩrĩa njĩhokeku na njũgĩ”?

• Kĩama Kĩrĩa Gĩtongoragia gĩtũrũmbũyagia atĩa?

• Hihi nĩ wĩtĩkĩtie atĩ Kĩama Kĩrĩa Gĩtongoragia nĩkĩo “ngombo ĩrĩa njĩhokeku na njũgĩ”?