ITHOMO RĨA 55
Teithagĩrĩria Kĩũngano Kĩanyu
Thĩinĩ wa thĩ yothe, andũ milioni nyingĩ nĩ marathathaiya Jehova makenete marĩ thĩinĩ wa ciũngano ngiri nyingĩ. Nĩ makoragwo na ngatho nyingĩ nĩ ũndũ wa ũrutani na ũtongoria ũrĩa maheagwo, na kwoguo magateithĩrĩria kĩũngano na njĩra nyingĩ meyendeire. Hihi ũguo nĩguo ũiguaga kwerekera kĩũngano kĩanyu?
1. Ũngĩhũthĩra mahinda na hinya waku na njĩra ta irĩkũ gũteithĩrĩria kĩũngano?
Ithuothe no tũhote gũteithĩrĩria kĩũngano. Kwa ngerekano-rĩ, hihi nĩ kũrĩ andũ amwe kĩũngano-inĩ kĩanyu akũrũ kana arwaru? No ũmateithĩrĩrie gũthiĩ mĩcemanio? Kana hihi no ũmateithĩrĩrie maũndũ-inĩ mangĩ, ta gũthiĩ nduka kana mawĩra ma nyũmba? (Thoma Jakubu 1:27.) Ningĩ no twĩrutĩre gũteithĩrĩria gũtheria na kũmenyerera Nyũmba itũ ya Ũthamaki. Gũtirĩ mũndũ ũtũtindĩkagĩrĩria gwĩka maũndũ ta macio, no wendo witũ harĩ Ngai na harĩ aarĩ na ariũ a Ithe witũ nĩguo ũtũtindĩkaga ‘kwĩrutĩra twĩyendeire.’—Thaburi 110:3.
Aira a Jehova arĩa abatithie no mateithĩrĩrie kĩũngano na njĩra ingĩ nyingĩ. Ariũ a Ithe witũ arĩa mahingĩtie ithimi cia Kĩĩmaandĩko no mateithĩrĩrie kĩũngano marĩ ndungata cia kĩũngano, na thutha wa ihinda, marĩ athuri a kĩũngano. Aarĩ na ariũ a Ithe witũ no manyite mbaru makĩria wĩra wa kũhunjia na njĩra ya gũtungata marĩ mapainia. Angĩ nao no merutĩre gũteithĩrĩria gwaka kũndũ gwa gũthathaĩria kana gũthaamĩra kũndũ kĩũngano kĩrabatara gũteithĩrĩrio na njĩra ingĩ.
2. Tũngĩhũthĩra atĩa indo citũ gũteithĩrĩria kĩũngano?
No “[tũtĩithie] Jehova na indo [citũ] cia goro.” (Thimo 3:9) Tuonaga ũrĩ mweke wa mwanya kũhotha mbeca na indo ingĩ nĩguo tũteithĩrĩrie kĩũngano gitũ na wĩra wa kũhunjia wa thĩ yothe. (Thoma 2 Akorintho 9:7.) Ningĩ mĩhothi itũ nĩ ĩhũthagĩrũo gũteithĩrĩria kũrĩa kũrĩ na icanjama. Andũ aingĩ nĩ mathuuraga ‘kũigaga kĩndũ’ kaingĩ kĩrĩ gĩa kũhotha. (Thoma 1 Akorintho 16:2.) No ũikie mũhothi waku mathandũkũ-inĩ ma mĩhothi marĩa makoragwo Nyũmba-inĩ cia Ũthamaki kana ũhothe kũgerera website thĩinĩ wa donate.pr418.com. Jehova nĩ atũheete mweke wa kũhũthĩra indo citũ cia kĩĩmwĩrĩ kũmuonia atĩ nĩ tũmwendete.
THUTHURIA MAKĨRIA
Reke tuone njĩra imwe tũngĩteithĩrĩria kĩũngano nacio.
3. No tũhũthĩre indo citũ cia kĩĩmwĩrĩ
Jehova na Jesu mendete mũndũ ũheanaga akenete. Kwa ngerekano, Jesu nĩ aagaathĩrĩirie mũtumia ũmwe wa ndigwa ũrĩa werutanĩirie kũruta mũhothi, o na gũtuĩka aarĩ mũthĩni. Thomai Luka 21:1-4, mũcoke mwarĩrĩrie ciũria ici:
-
Hihi nĩ tũrabatara kũhotha mbeca nyingĩ nĩguo tũkenie Jehova?
-
Jehova na Jesu maiguaga atĩa rĩrĩa twahotha twĩyendeire?
Nĩguo muone ũrĩa mĩhothi itũ ĩhũthĩkaga, mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Mĩhothi itũ ĩhũthagĩrũo atĩa kũguna ciũngano thĩinĩ wa thĩ yothe?
4. No twĩrutĩre gũteithĩrĩria
Mahinda-inĩ ma Bibilia, athathaiya a Jehova nĩ meerutanagĩria mũno kũmenyerera kũrĩa maathathayagĩria. Ĩndĩ ũndũ ũcio nĩ wahutĩtie makĩria ma o kũhotha mbeca. Thomai 2 Maũndũ ma Matukũ ma Tene 34:9-11, mũcoke mwarĩrĩrie kĩũria gĩkĩ:
-
O Mũisiraeli aateithagĩrĩria atĩa kũmenyerera nyũmba ya Jehova, ĩrĩa yarĩ handũ hao ha gũthathaĩria?
Nĩguo muone ũrĩa Aira a Jehova marũmagĩrĩra kĩonereria kĩu kĩa Aisiraeli, mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Nĩkĩ nĩ ũndũ wa bata kũigaga Nyũmba itũ ya Ũthamaki ĩrĩ theru na ĩmenyereirũo?
-
Ũngĩteithĩrĩria na njĩra ta irĩkũ?
5. Ariũ a Ithe witũ no merutanĩrie gũkinyĩra mĩeke kĩũngano-inĩ
Maandĩko nĩ mekĩraga arũme Akristiano ngoro merutanĩrie nĩguo meke ũrĩa wothe mangĩhota gũteithĩrĩria kĩũngano. Nĩguo muone ngerekano ĩmwe, mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Kũringana na video ĩyo-rĩ, Ryan eerutanĩirie atĩa nĩguo ateithĩrĩrie kĩũngano makĩria?
Bibilia nĩ ĩtaaragĩria maũndũ marĩa ariũ a Ithe witũ magĩrĩirũo kũhingia nĩguo magĩrĩre gũtungata marĩ ndungata cia kĩũngano kana athuri a kĩũngano. Thomai 1 Timotheo 3:1-13, mũcoke mwarĩrĩrie ciũria ici:
-
Ariũ a Ithe witũ arĩa merutanagĩria nĩguo matuĩke ndungata cia kĩũngano kana athuri a kĩũngano merĩgagĩrĩrũo kũhingia maũndũ marĩkũ?
-
Famĩlĩ ciao ciĩrĩgagĩrĩrũo gũkorũo ihaana atĩa?—Rora mũhari wa 4 na 11.
-
Rĩrĩa ariũ a Ithe witũ merutanĩria kũhingia maũndũ macio-rĩ, andũ othe kĩũngano-inĩ magunĩkaga atĩa?
MŨNDŨ NO ORIE: “Aira a Jehova marutaga kũ mbeca cia gũtwarithia wĩra wao na mbere?”
-
Wee ũngĩcokia atĩa?
ŨRĨA TWERUTA
Jehova nĩ akenaga mũno nĩ ũndũ wa kĩyo gitũ gĩa gũteithĩrĩria kĩũngano na mahinda maitũ, hinya witũ, na indo citũ cia kĩĩmwĩrĩ.
Ciũria cia gũcokera
-
Tũngĩhũthĩra atĩa mahinda maitũ na hinya witũ gũteithĩrĩria kĩũngano?
-
Tũngĩhũthĩra atĩa indo citũ cia kĩĩmwĩrĩ gũteithĩrĩria kĩũngano?
-
Ũngĩenda gũteithĩrĩria kĩũngano na njĩra ta irĩkũ?
RIKĨRA
Thoma wone nĩkĩ athathaiya a Ngai rĩu matibataraga kũruta gĩcunjĩ gĩa ikũmi.
“Bibilia Yugaga Atĩa Igũrũ Rĩgiĩ Kũruta Gĩcunjĩ gĩa Ikũmi?” (Gĩcunjĩ thĩinĩ wa jw.org/ki)
Bibilia nĩ ĩhete ariũ a Ithe witũ mawĩra matiganĩte. Mwarĩ wa Ithe witũ agĩrĩirũo gwĩka atĩa angĩbatara kũruta mawĩra macio?
“Gũtaũkĩrũo nĩ Mũbango wa Ũtongoria Kĩũngano-inĩ” (Mũrangĩri, Febrũarĩ 2021)
Wĩrorere wone Aira a Jehova amwe arĩa monanagia ũcamba na makeima na njĩra nene nĩgetha matwarĩre aarĩ na ariũ a Ithe witũ mabuku.
Thoma wone kũrĩa tũrutaga mbeca cia gũtwarithia wĩra witũ na mbere ngũrani na mathondeka mangĩ ma kĩĩndini.
“Aira a Jehova Marutaga Kũ Mbeca cia Gũtwarithia Wĩra Wao na Mbere?” (Gĩcunjĩ thĩinĩ wa jw.org/ki)
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
