ITHOMO RĨA 60
Thiĩ na Mbere Gũkũra Kĩĩroho
Kũgerera wĩruti ũyũ wa Bibilia, nĩ wĩrutĩte maũndũ maingĩ megiĩ Jehova. Maũndũ marĩa wĩrutĩte nĩ matũmĩte ũmwende mũno ũũ atĩ no kũhoteke nĩ ũmwĩyamũrĩire na ũkabatithio. Angĩkorũo ndwĩkĩte ũguo, no kũhoteke nĩ ũreciria gwĩka ũguo ica ikuhĩ. No mũndũ ndatigaga gũkũra kĩĩroho aabatithio. No ũtũũre ũkuhagĩrĩria Jehova tene na tene. Ũngĩka ũguo atĩa?
1. Wagĩrĩirũo gũthiĩ na mbere gwĩkĩra hinya ũrata waku na Jehova nĩkĩ?
No nginya twĩrutanĩrie biũ gũthiĩ na mbere gwĩkĩra hinya ũrata witũ hamwe na Jehova. Nĩkĩ? “Nĩgetha tũtikanoime njĩra-inĩ” yake. (Ahibirania 2:1) Nĩ kĩĩ kĩngĩtũteithia tũthiĩ na mbere gũtungatĩra Jehova tũrĩ ehokeku? Twagĩrĩirũo gũthiĩ na mbere kũhunjia tũrĩ na kĩyo na tũgacaria njĩra ingĩ cia gũtungatĩra Ngai witũ na gĩkĩro kĩnene makĩria. (Thoma Afilipi 3:16.) Gũtungatĩra Jehova nĩguo ũtũũro ũrĩa mwega makĩria!—Thaburi 84:10.
2. Nĩ atĩa ũngĩ wagĩrĩirũo gũthiĩ na mbere gwĩka?
O na gũtuĩka nĩ kũrĩkia ũrarĩkia wĩruti ũyũ wa Bibilia, ũtũũro waku ũrĩ Mũkristiano no ũgũthiĩ na mbere. Bibilia yugaga atĩ nĩ tũrabatara “[kwĩhumba] ũmũndũ mwerũ.” (Aefeso 4:23, 24) Wathiĩ na mbere kwĩruta Kiugo kĩa Ngai na gũthiaga mĩcemanio ya kĩũngano, nĩ ũrĩĩrutaga maũndũ merũ megiĩ Jehova na ngumo ciake. Caragia njĩra cia kwĩgerekania na ngumo ciake o na makĩria ũtũũro-inĩ waku. Thiĩ na mbere gwĩka mogarũrũku o mothe mangĩbatarania nĩguo ũkenie Jehova.
3. Jehova egũgũteithia atĩa gũkũra kĩĩroho?
Bibilia yugaga ũũ: “Ngai . . . we mwene nĩ ekũrĩkia kũmũmenyeria. Nĩ egũtũma mũrũme, nĩ ekũmwĩkĩra hinya, na nĩ egũtũma mwĩhande wega.” (1 Petero 5:10) Ithuothe nĩ tũcemanagia na magerio. No Jehova nĩ atũheaga kĩrĩa tũrabatara nĩguo tũhote kũregana namo. (Thaburi 139:23, 24) Nĩ eranĩire atĩ nĩ arĩkũheaga wendi na ũhoti wa kũmũtungatĩra ũrĩ mwĩhokeku.—Thoma Afilipi 2:13.
THUTHURIA MAKĨRIA
Reke tũthuthurie tuone ũrĩa ũngĩthiĩ na mbere gũkũra kĩĩroho, na ũrĩa Jehova arĩkũrathimaga.
4. Thiĩ na mbere kwaranagĩria na Mũrata waku ũrĩa wa hakuhĩ
Mahoya na wĩruti wa Bibilia nĩ cigũteithĩtie gũtuĩka mũrata wa Jehova. Maũndũ macio mangĩgũteithia atĩa kũmũkuhĩrĩria o na makĩria?
Thomai Thaburi 62:8, mũcoke mwarĩrĩrie kĩũria gĩkĩ:
-
Ũngĩagagĩria mahoya maku atĩa nĩguo wĩkĩre hinya ũrata waku hamwe na Jehova?
Thomai Thaburi 1:2 na kohoro ka magũrũ-inĩ, mũcoke mwarĩrĩrie kĩũria gĩkĩ:
-
Ũngĩagagĩria wĩruti waku wa Bibilia atĩa nĩguo wĩkĩre hinya ũrata waku hamwe na Jehova?
Ũngĩka atĩa nĩguo ũgunĩkage biũ kuumana na wĩruti waku mwene? Nĩguo muone maũndũ mamwe mũndũ angĩka, mwĩrorerei VIDEO ĩno, mũcoke mwarĩrĩrie ciũria iria irũmĩrĩire.
-
Nĩ maũndũ marĩkũ magwetetwo video-inĩ ĩyo ũngĩhũthĩra?
-
Nĩ maũndũ marĩkũ ũngĩenda kwĩruta igũrũ rĩamo?
5. Wĩigĩre mĩoroto ya kĩĩroho
Kwĩigĩra mĩoroto ũtungata-inĩ wa Jehova nĩ kũrĩgũteithagia gũthiĩ na mbere gũkũra kĩĩroho. Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.
-
Kũringana na video ĩyo-rĩ, Cameron aagunĩkire atĩa nĩ ũndũ wa kwĩigĩra mĩoroto ya kĩĩroho?
Ti mũndũ wothe ũngĩhota gũthamĩra bũrũri ũngĩ nĩguo akahunjie. O na kũrĩ ũguo, ithuothe no twĩigĩre mĩoroto tũngĩhota gũkinyĩra. Thomai Thimo 21:5, mũcoke mwarĩrĩrie mĩoroto ĩrĩa ũngĩenda kwĩigĩra . . .
-
kĩũngano-inĩ.
-
ũtungata-inĩ.
Ũtaaro ũrĩa ũrĩ mũhari-inĩ ũcio ũngĩgũteithia atĩa gũkinyĩra mĩoroto yaku?
Mĩoroto ũngĩgeria gũkinyĩra
-
Kwagagĩria mahoya maku.
-
Gũthoma Bibilia ĩrĩ yothe.
-
Kwĩrutanĩria kũmenya andũ othe kĩũngano-inĩ kĩanyu.
-
Kwambĩrĩria kwĩruta Bibilia na mũndũ.
-
Gũtungata ũrĩ painia wa gũteithĩrĩria kana painia wa hĩndĩ ciothe.
-
Angĩkorũo ũrĩ mũrũ wa Ithe witũ, kwĩrutanĩria gũtuĩka ndungata ya kĩũngano.
6. Kenera Ũtũũro Tene na Tene!
Thomai Thaburi 22:26, mũcoke mwarĩrĩrie kĩũria gĩkĩ:
-
Ũngĩka atĩa nĩguo ũkenere ũtũũro rĩu na tene na tene?
ŨRĨA TWERUTA
Thiĩ na mbere gwĩkĩra hinya ũrata waku hamwe na Jehova na kwĩigĩra mĩoroto ya kĩĩroho. Weka ũguo, no ũkenere ũtũũro tene na tene!
Ciũria cia gũcokera
-
Nĩ kĩĩ kĩngĩtũma ũkorũo na ũũma atĩ Jehova nĩ arĩgũteithagia kũmũtungatĩra ũrĩ mwĩhokeku?
-
Ũngĩkĩra hinya atĩa ũrata waku hamwe na Jehova?
-
Mĩoroto ya kĩĩroho ĩngĩgũteithia atĩa gũkũra kĩĩroho?
RIKĨRA
Nĩ ũndũ ũrĩkũ Jehova onaga ũrĩ wa bata makĩria, nĩ gĩĩko kĩmwe kĩa mwanya gĩa kuonania wĩrutĩri witũ harĩ we-ĩ kana nĩ gũtũũra tũrĩ ehokeku ũtũũro-inĩ witũ wothe?
O na ndungata njĩhokeku ya Jehova no yũrũo nĩ gĩkeno. Rora wone ũrĩa mũndũ angĩgĩa na gĩkeno rĩngĩ.
Nĩ kĩĩ kĩngĩgũteithia kwĩigĩra mĩoroto ya kĩĩroho na kũmĩkinyĩra?
“Hũthĩra Mĩoroto ya Kĩĩroho Kũgoocithia Mũũmbi Waku” (w04 07/15)
Ũgima wa kĩĩroho nĩ wa bata nĩkĩ, na ũngĩka atĩa nĩguo ũgĩe naguo?
“Wĩrutanĩrie Gũkinyĩra Ũgima—‘Mũthenya Ũrĩa Mũnene wa Jehova ũrĩ Hakuhĩ’” (w09 05/15)
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
