1. Nũũ wagĩrĩirũo gũtwĩra njĩra ĩrĩa yagĩrĩire ya gũthathaiya Ngai?

NDINI nyingĩ ciugaga atĩ nĩ irutanaga ũhoro wa ma wĩgiĩ Ngai. No ũguo tiguo kũrĩ tondũ ndini irutanaga maũndũ ngũrani mũno megiĩ Ngai nũũ na ũrĩa twagĩrĩirũo kũmũthathaiya. Tũngĩmenya atĩa njĩra ĩrĩa yagĩrĩire ya gũthathaiya Ngai? Jehova nowe tu ũngĩtwĩra ũrĩa twagĩrĩirũo kũmũthathaiya.

2. Ũngĩmenya atĩa njĩra ĩrĩa yagĩrĩire ya gũthathaiya Ngai?

² Jehova nĩ atũheete Bibilia nĩguo tũmenye njĩra ĩrĩa yagĩrĩire ya kũmũthathaiya. Kwoguo wĩrute Bibilia, na Jehova nĩ egũgũteithia nĩguo ũgunĩke kuumana na morutani make tondũ nĩ akũrũmbũyagia mũno.—Isaia 48:17.

3. Nĩ ũndũ ũrĩkũ Ngai endaga twĩke?

³ Andũ amwe moigaga atĩ Ngai onaga ndini ciothe irĩ njega, no ũguo tiguo Jesu aatũrutire. Ooigire ũũ: “Ti mũndũ o wothe ũnjĩtaga, ‘Mwathani, Mwathani,’ ũkaaingĩra Ũthamaki-inĩ wa igũrũ, no nĩ ũrĩa wĩkaga wendi wa Ithe witũ.” Kwoguo nĩ twagĩrĩirũo kũmenya wendi wa Ngai nĩ ũrĩkũ, tũcoke tũwĩke. Ũndũ ũcio nĩ wagĩrĩirũo kuoywo na ũritũ tondũ Jesu aaringithanirie andũ acio matathĩkagĩra Ngai na andũ arĩa ‘mekaga maũndũ ma uuni-watho.’—Mathayo 7:21-23.

4. Jesu ooigire atĩa igũrũ rĩgiĩ gwĩka wendi wa Ngai?

⁴ Jesu ooigire atĩ nĩ tũrĩcemanagia na moritũ rĩrĩa tũrenda gwĩka wendi wa Ngai. Ooigire ũũ: “Tonyerai mũromo ũrĩa mũceke, tondũ mũromo nĩ mwariĩ na njĩra  ĩrĩa ĩkinyagia andũ harĩ kũniinwo nĩ njariĩ, na andũ arĩa aingĩ nĩyo mageraga; no mũromo nĩ mũceke na njĩra ĩrĩa ĩkinyagia andũ muoyo-inĩ nĩ ngunderu, na andũ arĩa mamĩonaga nĩ anini.” (Mathayo 7:13, 14) Njĩra ĩrĩa ngunderu, kana njĩra ĩrĩa yagĩrĩire ya gũthathaiya Ngai, ĩkinyagia andũ muoyo-inĩ wa tene na tene. Nayo njĩra ĩrĩa njaramu, kana njĩra ĩrĩa ĩtagĩrĩire ya gũthathaiya Ngai, ĩtwaraga andũ gĩkuũ-inĩ. No Jehova ndendaga mũndũ o na ũmwe akue. Nĩ aheete andũ othe mweke wa kwĩruta ũhoro wake.—2 Petero 3:9.

5. Ũngĩmenya atĩa arĩa mathathayagia Ngai na njĩra ĩrĩa yagĩrĩire?

⁵ Jesu ooigire atĩ no tũhote kũmenya arĩa mathathayagia Ngai na njĩra ĩrĩa yagĩrĩire. Tũngĩmamenya na njĩra ya gũthuthuria maũndũ marĩa metĩkĩtie na ciĩko ciao. Ooigire ũũ: “Nĩ mũrĩmamenyaga kũgerera maciaro mao.” Ningĩ agĩcoka akiuga ũũ: “Mũtĩ wothe mwega ũciaraga maciaro mega.” (Mathayo 7:16, 17) Ũguo ti kuuga atĩ arĩa mathathayagia Ngai nĩ akinyanĩru. O na kũrĩ ũguo, hĩndĩ ciothe ndungata cia Ngai nĩ ciĩrutanagĩria gwĩka ũrĩa kwagĩrĩire. Reke rĩu tuone maũndũ marĩa mangĩtũteithia kũmenya arĩa mathathayagia Ngai na njĩra ĩrĩa yagĩrĩire.

6, 7. Ũthathaiya wa ma wagĩrĩirũo gũkorũo uumanĩte na Bibilia nĩkĩ? Kĩonereria kĩa Jesu gĩtũrutaga atĩa?

⁶ Ũthathaiya witũ wagĩrĩirũo gũkorũo uumanĩte na Bibilia. Bibilia yugaga ũũ: “Rĩandĩko o rĩothe, rĩtongoretio nĩ roho wa Ngai na rĩrĩ ũguni harĩ kũrutana, gũkaanania, kũrũnga maũndũ, na kũherithia na njĩra ya ũthingu, nĩgetha mũndũ wa Ngai akoragwo arĩ mwagĩrĩru kũna, ahaarĩirio biũ nĩ ũndũ wa wĩra wothe mwega.” (2 Timotheo 3:16, 17) Mũtũmwo Paulo aandĩkĩire Akristiano ũũ: “Rĩrĩa mwaamũkĩrire kiugo kĩa Ngai, kĩrĩa  mwaiguire kuuma kũrĩ ithuĩ, mũtiagĩtĩkĩrire ta arĩ kiugo kĩa andũ, ĩndĩ mwagĩtĩkĩrire o ta ũrĩa gĩtariĩ na ma, kĩrĩ kiugo kĩa Ngai.” (1 Athesalonike 2:13) Ũthathaiya wa ma wagĩrĩirũo gũkorũo uumanĩte na Kiugo kĩa Ngai, Bibilia. Ndwagĩrĩirũo gũkorũo uumanĩte na meciria ma andũ, ũndũire, kana ũndũ ũngĩ o wothe.

⁷ Maũndũ marĩa mothe Jesu aarutanaga mooimaga Kiugo-inĩ kĩa Ngai. (Thoma Johana 17:17.) Kaingĩ nĩ aagwetaga maũndũ marĩ Maandĩko-inĩ. (Mathayo 4:4, 7, 10) Athathaiya a ma a Ngai marũmagĩrĩra kĩonereria kĩa Jesu na maũndũ mothe marĩa marutanaga moimaga Bibilia-inĩ.

8. Nĩ ũndũ ũrĩkũ Jesu aatũrutire wĩgiĩ gũthathaiya Jehova?

⁸ Twagĩrĩirũo gũthathaiya Jehova wiki. Thaburi 83:18 yugaga ũũ: “Wee, o wee wĩtagwo Jehova, wee wiki nowe Ũrĩa ũrĩ Igũrũ Mũno, igũrũ rĩa thĩ yothe.” Jesu nĩ eendaga andũ mamenye Ngai wa ma kũna nũũ, na nĩ aarutaga andũ rĩĩtwa rĩa Ngai. (Thoma Johana 17:6.) Ooigire: “Wagĩrĩirũo gũthathaiya Jehova Ngai waku, na nowe wiki wagĩrĩirũo kũrutĩra ũtungata mũtheru.” (Mathayo 4:10) Kwoguo, tondũ tũrĩ ndungata cia Ngai, tũrũmagĩrĩra kĩonereria kĩa Jesu. Tũthathayagia o Jehova wiki, tũkahũthĩra rĩĩtwa rĩake, tũkaruta andũ arĩa angĩ rĩĩtwa rĩa Ngai na maũndũ marĩa agaatwĩkĩra.

9, 10. Tuonanagia wendo atĩa gatagatĩ-inĩ gaitũ?

⁹ Twagĩrĩirũo kwenda andũ kuuma ngoro. Jesu aarutire arutwo ake mendanage. (Thoma Johana 13:35.) Gũtiramakania kũrĩa tuumĩte, ũndũire witũ, o na kana tũrĩ atongu kana tũrĩ athĩni. Wendo ũrĩa tũkoragwo naguo gatagatĩ-inĩ gaitũ wagĩrĩirũo gũtũnyitithania ta ciana cia nyina ũmwe. (Akolosai 3:14) Nĩ ũndũ ũcio, tũtithiaga mbaara-inĩ na tũtiũraganaga. Bibilia yugaga ũũ:  “Ciana cia Ngai na ciana cia Mũcukani imenyekaga na ũndũ ũyũ: Mũndũ o wothe ũtamenyerete gwĩka maũndũ ma ũthingu ndoimanĩte na Ngai, o na kana mũndũ ũrĩa ũtendete mũrũ wa Ithe.” Ĩcokete ĩkoiga ũũ: “Twagĩrĩirũo kwendana; ti ta Kaini, ũrĩa woimanĩte na ũrĩa mũũru na akĩũraga mũrũ wa nyina.”—1 Johana 3:10-12; 4:20, 21.

¹⁰ Tũhũthagĩra mahinda, hinya, na indo citũ gũteithania na gwĩkĩrana ngoro. (Ahibirania 10:24, 25) ‘Twĩkaga andũ othe wega.’—Agalatia 6:10.

11. Nĩ kĩĩ gĩtũmaga twĩtĩkĩre atĩ Jesu nĩwe njĩra ya gũtũkinyia harĩ Ngai?

¹¹ Twagĩrĩirũo gwathĩkĩra Jesu tondũ nĩwe njĩra ya gũtũkinyia harĩ Ngai. Bibilia yugaga ũũ: “Ũhonokio ndũngĩoneka harĩ mũndũ ũngĩ o na ũrĩkũ, tondũ gũtirĩ rĩĩtwa rĩngĩ mũhuro wa riũa rĩheetwo andũ tũngĩhonokio kũgerera harĩ rĩo.” (Atũmwo 4:12) Thĩinĩ wa Gĩcunjĩ gĩa 5 kĩa ibuku rĩrĩ, nĩ twerutire atĩ Jehova nĩ aatũmire Jesu gũkũ thĩ nĩguo arute muoyo wake nĩ ũndũ wa gũkũũra andũ arĩa athĩki. (Mathayo 20:28) Jehova nĩ athuurĩte Jesu athane arĩ Mũthamaki igũrũ rĩa thĩ. Nĩkĩo Bibilia ĩtwĩraga atĩ no mũhaka twathĩkĩre Jesu angĩkorũo nĩ tũkwenda gũgaatũũra tene na tene.—Thoma Johana 3:36.

12. Twagaga kwĩingĩria ũteti-inĩ nĩkĩ?

¹² Tũtiagĩrĩirũo kwĩingĩria ũteti-inĩ. Jesu ndeeingĩragia ũteti-inĩ. Rĩrĩa aaciirithagio, eerire mũtongoria Mũroma wetagwo Pilato ũũ: “Ũthamaki wakwa ti wa thĩ ĩno.” (Thoma Johana 18:36.) Tũkoragwo tũrĩ ehokeku harĩ Ũthamaki wa Ngai o ta Jesu, na nĩkĩo tũteingĩragia ũteti-inĩ gũtekũmakania kũrĩa tũikaraga. O na kũrĩ ũguo, Bibilia nĩ ĩtwathĩte twathĩkagĩre “athani arĩa anene,” na nĩo thirikari. (Aroma 13:1) Nĩ twathĩkagĩra mawatho ma  bũrũri ũrĩa tũikaraga. Ĩndĩ watho wa bũrũri ũngĩregana na watho wa Ngai, twĩgerekanagia na atũmwo arĩa mooigire ũũ: “No mũhaka twathĩkĩre Ngai arĩ we mũtongoria, no ti andũ.”—Atũmwo 5:29; Mariko 12:17.

13. Nĩ ũndũ ũrĩkũ tũhunjagia wĩgiĩ Ũthamaki wa Ngai?

¹³ Twĩtĩkĩtie atĩ Ũthamaki wa Ngai noguo ũkaaniina mathĩna marĩa marĩ thĩinĩ wa thĩ. Jesu ooigire atĩ ‘ũhoro ũrĩa mwega wa Ũthamaki’ nĩ ũngĩkahunjio thĩinĩ wa thĩ yothe. (Thoma Mathayo 24:14.) Gũtirĩ thirikari ĩthondeketwo nĩ andũ ĩngĩhota gwĩka maũndũ marĩa Ũthamaki wa Ngai ũgaatwĩkĩra. (Thaburi 146:3) Jesu aatũrutire tũhoyage igũrũ rĩgiĩ Ũthamaki wa Ngai rĩrĩa ooigire ũũ: “Ũthamaki waku nĩ ũũke. Wendi waku nĩ wĩkwo gũkũ thĩ o ta kũu igũrũ.” (Mathayo 6:10) Bibilia ĩtwĩraga atĩ Ũthamaki wa Ngai nĩ ũkaaniina thirikari ciothe cia andũ na atĩ “noguo wiki ũgaatũũra wĩhandĩte tene na tene.”—Danieli 2:44.

14. Wĩtĩkĩtie nĩa mathathayagia Ngai na njĩra ĩrĩa yagĩrĩire?

¹⁴ Thutha wa gũthoma maũndũ macio, wĩyũrie ũũ: ‘Nĩa morutani mao makoragwo moimĩte Bibilia-inĩ? Nĩa mamenyithagia arĩa angĩ rĩĩtwa rĩa Ngai? Nĩa makoragwo na wendo wa ma gatagatĩ-inĩ kao na magetĩkia atĩ Ngai nĩ aatũmire Jesu nĩguo atũhonokie? Nĩa mateingĩragia ũteti-inĩ? Na nĩa mahunjagia atĩ no Ũthamaki wa Ngai ũngĩtũniinĩra mathĩna?’ No Aira a Jehova oiki.—Isaia 43:10-12.

15. Nĩ atĩa arĩ o mũhaka twĩke nĩguo Ngai etĩkĩre ũthathaiya witũ?

¹⁵ Gwĩtĩkia tu atĩ Ngai arĩ kuo ti kũiganu. O na ndaimono nĩ ciĩtĩkĩtie atĩ Ngai arĩ kuo, no itimwathĩkagĩra. (Jakubu 2:19) Angĩkorũo nĩ tũkwenda Ngai etĩkĩre ũthathaiya witũ, no mũhaka twĩtĩkie atĩ arĩ kuo, na twĩke ũrĩa atwĩraga twĩke.

16. Twagĩrĩirũo gwĩthema ndini ya maheeni nĩkĩ?

 ¹⁶ Nĩguo Ngai etĩkĩre ũthathaiya witũ, no mũhaka tũregane na ndini ya maheeni. Mũnabii Isaia aandĩkire ũũ: “Umai thĩinĩ wake, ikarai mũrĩ atheru.” (Isaia 52:11; 2 Akorintho 6:17) Nĩkĩo tũrabatara gwĩthema ũndũ o wothe ũhutanĩtie na ũthathaiya wa maheeni.

17, 18. “Babuloni Ũrĩa Mũnene” nĩ kĩĩ, na ũrabatara kuuma kuo na ihenya nĩkĩ?

¹⁷ Ndini ya maheeni nĩ ĩrĩkũ? Nĩ ndini o yothe ĩrĩa ĩrutaga andũ gũthathaiya Ngai na njĩra ĩtaratwarana na Kiugo gĩake. Bibilia ĩtaga ndini ciothe cia maheeni “Babuloni Ũrĩa Mũnene.” (Kũguũrĩrio 17:5) Ĩciĩtaga ũguo nĩkĩ? Thutha wa Mũiyũro wa hĩndĩ ya Nuhu, morutani maingĩ ma ndini cia maheeni nĩ maambĩrĩirie itũũra-inĩ rĩa Babuloni. Morutani macio ma maheeni maacokire magĩtherema thĩinĩ wa thĩ yothe. Kwa ngerekano, andũ arĩa maatũũraga Babuloni maathathayagia ikundi cia ngai ithatũ. O na matukũ-inĩ maya, ndini nyingĩ irutanaga atĩ Ngai nĩ Ũtatũ, no Bibilia ĩrutanaga wega atĩ gũkoragwo na Ngai ũmwe tu wa ma, Jehova, na Jesu nĩ Mũrũ wake. (Johana 17:3) Andũ arĩa maatũũraga Babuloni ningĩ nĩ meetĩkĩtie atĩ nĩ kũrĩ kĩndũ thĩinĩ wa mũndũ gĩthiaga na mbere gũtũũra mwĩrĩ wakua na kĩndũ kĩu no kĩherithio mwaki-inĩ wa icua. No ũcio ti ũhoro wa ma.—Rora Kohoro ga 14, 17, na 18 Mũico-inĩ wa Ibuku.

¹⁸ Ngai nĩ aarathire atĩ ica ikuhĩ ndini ciothe cia maheeni nĩ ikũniinwo. (Kũguũrĩrio 18:8) Hihi nĩ wona kĩrĩa kĩratũma mũndũ abatare kuuma ndini-inĩ ya maheeni o na ihenya? Jehova arenda wĩke ũguo na ihenya o ũrĩa kwahoteka.—Kũguũrĩrio 18:4.

19. Jehova egũkũrũmbũiya atĩa watua itua rĩa kũmũtungatĩra?

¹⁹ Watua itua rĩa kuuma ndini-inĩ ya maheeni nĩguo  ũtungatĩre Jehova, arata na andũ amwe a famĩlĩ no mage gũtaũkĩrũo nĩ itua rĩaku na no magũkararie, magũconorithie, o na kana mage kũnyitanagĩra nawe. No Jehova ndarĩ hingo agaagũtiganĩria. Ũkũingĩra thĩinĩ wa famĩlĩ ĩrĩ na andũ milioni nyingĩ mendanĩte biũ thĩinĩ wa thĩ yothe, na nĩ ũkũgĩa na kĩĩrĩgĩrĩro gĩa gũgaatũũra tene na tene thĩinĩ wa thĩ njerũ ya Ngai. (Mariko 10:28-30) No kũhoteke arata amwe na andũ a famĩlĩ arĩa makararagia itua rĩaku rĩa gũtungatĩra Jehova nĩ marĩcoka merute Bibilia.

20. Nĩkĩ harĩ bata gũthathaiya Ngai na njĩra ĩrĩa yagĩrĩire?

²⁰ Ica ikuhĩ Ngai nĩ ekũniina waganu wothe na Ũthamaki wake wathane thĩinĩ wa thĩ. (2 Petero 3:9, 13) Rĩu rĩgaakorũo rĩrĩ ihinda rĩega mũno! Andũ othe magaathathaiya Jehova na njĩra ĩrĩa we endaga. Kwoguo nĩ harĩ bata woe ikinya rĩa gũthathaiya Ngai na njĩra ĩrĩa yagĩrĩire o rĩu.