Ibuku rĩrĩ rĩa Maandĩko Megiĩ Ũtũũro wa Gĩkristiano nĩ rĩgũgũteithia kuona na njĩra hũthũ mĩhari ya Bibilia na ngʼano cia Bibilia iria ingĩgũteithia kũhiũrania na moritũ marĩa ũracemania namo. Ningĩ nĩ rĩgũgũteithia kuona mĩhari ĩrĩa yagĩrĩire ya Bibilia ĩrĩa ũngĩhũthĩra gwĩkĩra arĩa angĩ ngoro na kũmateithia gũtua matua mangĩtĩithia Jehova. Thuura kĩongo kĩrĩa ũrenda gũthuthuria. O rungu rwa kĩongo harĩ na ciũria cia gũgũteithia, na ũhoro mũkuhĩ wa rũgano rwa Bibilia. (Rora gathandũkũ “ Ũrĩa Ũngĩhũthĩra Ibuku Rĩrĩ.”) Wathoma nĩ ũkuona maandĩko mangĩkũũmĩrĩria na makũhe ũtaaro na ũtongoria ũrĩa ũrabatara. Ningĩ nĩ ũkuona motaaro ũngĩhũthĩra gũteithia arĩa angĩ na kũmekĩra ngoro.

Ibuku rĩrĩ rĩtionanĩtie maandĩko mothe marĩa marĩrĩirie kĩongo kĩna. Ĩndĩ no rĩgũteithie kuona maandĩko marĩa ma bata mũno megiĩ kĩongo kĩu, marĩa ũngĩhũthĩra gwĩka ũthuthuria mabuku-inĩ mangĩ kũngĩbatarania. (Thi 2:1-6) Nĩguo ũthuthurie makĩria, no ũhũthĩre maandĩko ma gwathĩrĩra o na kana maũndũ ma kwĩruta marĩa marĩ thĩinĩ wa Bibilia ya Wĩruti ya New World Translation of the Holy Scriptures. Nĩguo wĩrute ũhoro makĩria wĩgiĩ mũhari mũna na ũrĩa ũngĩũhũthĩra, no ũthuthurie makĩria thĩinĩ wa ibuku rĩa Ũteithio wa Ũthuthuria Harĩ Aira a Jehova kana rĩa Fahirisi. Rora ũhoro ũrĩa wĩkĩrĩtwo ica ikuhĩ mabuku-inĩ macio, nĩguo ũgĩe na ũtaũku wa ica ikuhĩ biũ wĩgiĩ mũhari ũrĩa ũrathuthuria.

Reke ibuku rĩrĩ rĩa Maandĩko Megiĩ Ũtũũro wa Gĩkristiano rĩgũteithie kuona ũũgĩ, ũmenyo, na ũtaũku ũrĩa ũrĩ thĩinĩ wa Maandĩko Matheru. O ũrĩa ũrahũthĩra ibuku rĩrĩ, noguo ũgũkorũo na ma atĩ “kiugo kĩa Ngai kĩrĩ muoyo na nĩ kĩrĩ hinya.”—Ahi 4:12.