Hihi nĩ kĩĩ gĩtũmaga Shaitani na ndaimono ciake merutanĩrie mũno kũheenia andũ? Tondũ mendaga tũnyitanĩre nao harĩ ũremi. Mendaga tũmathathaiye. Mendaga twĩtĩkie maheeni mao na twĩke maũndũ marĩa Jehova atendete. Maingĩ ma maũndũ macio nĩ marĩa mahutanĩtie na andũ akuũ.

Gĩkuũ kĩa mũndũ twendete no kĩrehe ruo rwa ngoro na nĩ ũndũ wa ndũire na ti ũũru gũkorũo na kĩeha. Jesu nĩ ‘aaitire maithori’ thutha wa mũrata wake Lazaro gũkua.—Johana 11:35.

Nĩ kũrĩ mĩtugo mĩingĩ ya ũndũire ĩkoragwo ĩhutanĩtie na gĩkuũ, na ĩkoragwo ĩrĩ ngũrani kũndũ guothe thĩinĩ wa thĩ. Mĩtugo mĩingĩ harĩ ĩyo ndĩreganaga na motaaro ma Bibilia. O na kũrĩ ũguo-rĩ, ĩmwe yayo ĩkoragwo yumanĩte na wĩtĩkio atĩ andũ arĩa makuĩte marĩ muoyo na no mahote kuona arĩa maratũũra gũkũ thĩ. Kũrara nja, gũcakaya gũkĩrĩtie gĩthimi, na mambura ma mathiko makĩrĩtie njano, mothe moimanaga na gwĩtigĩra kũrakaria maroho ma akuũ. No tondũ andũ arĩa makuĩte “gũtirĩ ũndũ moĩ,” andũ arĩa mekaga maũndũ ta macio magaathagĩrĩria maheeni ma Shaitani.—Kohelethu 9:5.

 Mĩtugo ĩngĩ kana mambura yumanaga na wĩtĩkio wa atĩ andũ arĩa makuĩte nĩ marabatara gũteithio nĩ arĩa me muoyo na no meke andũ arĩa marĩ muoyo ũũru mangĩaga kũhoorerio. Thĩinĩ wa mabũrũri mamwe gũkoragwo na ndĩa na magongona thutha wa thikũ 40 kana mwaka ũmwe kuuma mũndũ akua. Ũndũ ũcio gũtuĩkaga atĩ nĩ wa gũteithia mũndũ ũcio ũkuĩte ‘athiĩ’ ciikaro-inĩ cia kĩĩroho. Mũtugo ũngĩ wĩkagwo kaingĩ nĩ kũigĩra andũ maakuire irio kana kĩndũ gĩa kũnyua.

Maũndũ macio nĩ mooru tondũ magaathagĩrĩria maheeni ma Shaitani megiĩ andũ arĩa makuĩte. Hihi Jehova no akenio nĩ ithuĩ tũngĩĩingĩria mĩtugo-inĩ ĩrĩ na morutani ma ndaimono? Aca!—2 Akorintho 6:14-18.

Ndungata cia Ngai ũrĩa wa ma itinyitanagĩra o na hanini na mĩtugo ĩrĩa ĩnyitaga mbaru maheeni ma Shaitani. Ithenya rĩa ũguo-rĩ, mageragia mũno na njĩra ya wendo gũteithia arĩa marĩ muoyo na kũmomĩrĩria. Nĩ mamenyaga atĩ mũndũ akua, no Jehova wiki ũngĩhota kũmũteithia.—Ayubu 14:14, 15.

Andũ amwe maranagĩria na ndaimono na njĩra ya ĩmwe kwa ĩmwe kana kũgerera kũrĩ mũndũ mũgo. Ũcio nĩguo wĩtagwo ũgo na ũragũri. Gũtuĩria nyoni ya mũndũ, kũhũthĩra ithitũ, kwaranĩria na andũ arĩa maakuire, na kũragũria, nĩ mĩthemba ya ũgo na ũragũri.

Bibilia nĩ ĩkaananĩtie maũndũ macio, tondũ yugaga ũũ: “Thĩinĩ wanyu gũtikanoneke mũndũ o wothe . . . wĩingĩragia maũndũ-inĩ ma ũragũri, mũndũ o wothe wĩingĩragia maũndũ-inĩ ma ũgo, mũndũ o wothe ũtuĩragia ũhoro kũgerera imenyithia cia ũragũri, kana mũrogi, mũndũ o wothe wohaga andũ arĩa angĩ na mahinya moru, mũndũ o wothe waragia na maroho kana mũndũ ũrathaga mohoro, kana mũndũ o wothe ũtuĩragia ũhoro harĩ andũ arĩa akuũ. Nĩ gũkorũo mũndũ o wothe wĩkaga maũndũ macio nĩ kĩndũ kĩrĩ magigi harĩ Jehova.”—Gũcokerithia Maathani 18:10-12.

Nĩ kĩĩ gĩtũmaga Jehova atũkaanie mĩtugo ĩyo na hinya ũguo?

 Jehova atũkaanagia mĩthemba yothe ya ũgo na ũragũri nĩgetha tũgunĩke. Nĩ endete na nĩ arũmbũyagia andũ, na nĩ amenyaga atĩ arĩa manyitanagĩra na ndaimono no mũhaka mone ũũru.

Nilda, ũrĩa warĩ mũndũ mũgo bũrũri-inĩ wa Brazil nĩ ũmwe wa andũ ta acio. Ndaimono nĩ ciatũmire mũtũũrĩre wake ũkorũo na mathĩna maingĩ mũno. Ooigire ũũ: “Maroho macio . . . maanjathaga ũrĩa mekwenda. Maatũmaga rĩmwe na rĩmwe ngorũo itekwĩigua, na ngĩgĩa na mũrimũ wa meciria. Ndaimono icio nĩ cianyaririre mũno o nginya igĩthũkia ciĩga imwe ciakwa. Ngĩambĩrĩria kũhũthagĩra ndawa cia kũhooreria meciria na kũnyua thigara na njohi. Ũndũ ũcio wathiire na mbere kwa ihinda rĩa mĩaka mĩingĩ.”

Thutha wa ihinda, Nilda nĩ aateithĩrĩirio nĩ Jehova o hamwe na Aira a Jehova, agĩtigana na maũndũ ma ndaimono na rĩu atũũraga mũtũũrĩre mwega ũrĩ na gĩkeno. Ooigire ũũ: “Ngwenda kwĩra andũ othe atĩ, matikaneingĩranie o na rĩ na maroho [moru].”