Jehova Ngai nĩwe watũmbire. Ombire indo ciothe iria tuonaga na iria tũtonaga. Aambire kũũmba araika aingĩ mũno atanomba indo iria tuonaga. Hihi nĩ ũĩ araika nĩa? Nĩ ciũmbe cia roho iria Jehova ombire ihaana take. Tũtingĩhota kũmona o ta ũrĩa tũtangĩhota kuona Ngai. Mũraika wa mbere ũrĩa Jehova ombire, aatuĩkire mũteithia wake. Mũraika ũcio nĩ aateithĩrĩirie Jehova kũũmba njata, thĩ nyingĩ iria ikoragwo kuo, na indo iria ingĩ ciothe. Ĩmwe ya thĩ icio nĩ ĩno tũikaraga.

Jehova aacokire akĩhaarĩria thĩ nĩguo ĩikaragwo nĩ andũ na nyamũ. Ningĩ nĩ aatũmire riũa rĩarage gũkũ thĩ. Nĩ aatũmire kũgĩe na irĩma, maria manene, na njũũĩ.

Aacokire agĩka atĩa? Jehova oigire ũũ: ‘Nĩ ngũtũma kũgĩe nyeki, na tũhuti tuothe, na mĩtĩ.’ Gũkĩambĩrĩria kũgĩa na matunda ma mĩthemba mĩingĩ, mahuti ma mĩthemba yothe, na mahũa. Thutha ũcio Jehova nĩ ombire nyamũ cia mĩthemba yothe, iria ciũmbũkaga, cia maĩ-inĩ, iria itambaga thĩ, na iria ciĩnyogondaga. Ombire imwe irĩ nini ta mbũkũ, na iria ingĩ irĩ nene ta njogu. Nĩ nyamũ ĩrĩkũ wendete mũno?

Jehova aacokire akĩra mũraika ũrĩa aambire kũũmba ũũ: ‘Nĩtũũmbe andũ.’ Andũ mangĩombirũo marĩ ngũrani na nyamũ. Nĩ mangĩahotire gũthondeka indo, kwaria, gũtheka, na  kũhoya. Nĩ mangĩahotire kũmenyerera thĩ na nyamũ iria Ngai ombire. Hihi nĩ ũĩ mũndũ wa mbere kũũmbwo aarĩ ũ? Reke tuone.