Thutha wa ihinda Belishazaru nĩ aatuĩkire mũthamaki wa Babuloni. Ũtukũ ũmwe nĩ aahaarĩirie iruga na agĩta andũ aingĩ arĩa a bata kuuma bũrũri-inĩ wothe. Eerire ndungata ciake imatwarĩre ikombe cia thahabu iria Nebukadinezaru aarutĩte hekarũ-inĩ ya Jehova. Belishazaru na ageni ake maanyuĩrĩire ikombe icio makĩgoocaga ngai ciao. O hĩndĩ o ĩyo gũkiumĩra guoko kwa mũndũ na gũkĩambĩrĩria kwandĩka ciugo cia magegania rũthingo-inĩ rwa nyũmba ĩyo maarĩ.

Belishazaru nĩ aamakire mũno. Eetire andũ arĩa maamũtaũragĩra iroto na akĩmeera ũũ: ‘Ũrĩa ũkũndaũrĩra ciugo ici nĩ ngũmũtua mũndũ wa gatatũ kuuma harĩ niĩ gũkũ Babuloni.’ Othe nĩ maageririe kũmũtaũrĩra ũrĩa ciugo icio cioigĩte, no gũtirĩ wahotire. Nyina wa mũthamaki nĩ aaingĩrire kuo na akiuga ũũ: ‘Nĩ kũrĩ mũndũ wĩtagwo Danieli ũrĩa wataũragĩra Nebukadinezaru iroto. No agũtaũrĩre ciugo ici.’

Danieli nĩ aathiire kũrĩ mũthamaki na akĩrũo ũũ: ‘Angĩkorũo nĩ ũgũthoma ciugo ici na ũcitaũre, nĩ ngũkũhe mũgathĩ wa thahabu na njoke ngũtue mũndũ wa gatatũ kuuma harĩ niĩ gũkũ Babuloni.’ Danieli akĩmwĩra ũũ: ‘Ndikwenda iheo ciaku no nĩ ngũgũtaũrĩra ciugo icio. Baba wanyu Nebukadinezaru aarĩ na mwĩtĩo, no Jehova akĩmũnyihia. Nĩ ũĩ maũndũ marĩa mothe maamũkorire no nĩ ũraagĩra Jehova gĩtĩo nĩ ũndũ wa kũnyua ndibei na ikombe cia thahabu iria ciarutĩtwo nyũmba-inĩ yake. Nĩkĩo Ngai aandĩka ciugo: Mene, Mene, Tekel, na Parsin. Ciugo icio ciugĩte atĩ Amedia na Aperisia nĩ megũtooria Babuloni na ndũgũkorũo ũrĩ mũthamaki rĩngĩ.’

Hĩndĩ ĩyo kuonekanaga ta gũtarĩ mũndũ ũngĩatooririe Babuloni, tondũ rĩarĩ itũũra rĩarĩ na thingo nene na rĩathiũrũrũkĩirio nĩ rũũĩ rũriku. No ũtukũ o ũcio, Amedia na Aperisia nĩ maarĩtharĩkĩire.  Mũthamaki wa Perisia wetagwo Kurusu nĩ aaunithirie rũũĩ nĩguo thigari ciake ihote gũkinya ihingo-inĩ cia itũũra rĩu. Rĩrĩa ciakinyire kũu, ciakorire ihingo itarĩ hinge. Thigari icio ciatharĩkĩire itũũra rĩu na ikĩũraga mũthamaki, na thutha ũcio Kurusu akĩambĩrĩria gwathana Babuloni.

Thutha wa ihinda rĩa mwaka ũmwe, Kurusu nĩ oigire ũũ: ‘Jehova nĩ anjĩrĩte thiĩ ngaake hekarũ yake rĩngĩ ĩrĩa ĩrĩ Jerusalemu. Ndungata yake o yothe ĩngĩenda gũthiĩ gũteithia no ĩthiĩ.’ Nĩ ũndũ ũcio o ta ũrĩa Jehova eeranĩire, Ayahudi aingĩ nĩ maacokire kwao mũciĩ thutha wa mĩaka 70 kuuma Jerusalemu yanangwo. Kurusu nĩ aacokirie ikombe cia thahabu na betha o hamwe na indo iria Nebukadinezaru oete hekarũ-inĩ ya Jehova. Hihi nĩ wona ũrĩa Jehova aahũthĩrire Kurusu gũteithia andũ ake?