Makĩria ma mĩaka 400 thutha wa thingo cia Jerusalemu gwakwo rĩngĩ, nĩ kwarĩ mũthĩnjĩri-Ngai ũmwe wetagwo Zekaria na mũtumia wake Elizabethi, arĩa maaikaraga hakuhĩ na itũũra rĩu. Maaikarĩte ihinda iraya mũno matarĩ magĩa mwana. Mũthenya ũmwe rĩrĩa Zekaria aacinaga ũbumba hekarũ-inĩ, nĩ oimĩrĩirũo nĩ mũraika Gaburieli. Zekaria nĩ aamakire, no Gaburieli akĩmwĩra ũũ: ‘Tiga gwĩtigĩra. Ndakũrehera ũhoro mwega kuuma kũrĩ Jehova. Mũtumia waku Elizabethi nĩ arĩgĩa kaana ga kahĩĩ na gagetwo Johana. Jehova nĩ athuurĩte Johana nĩguo akaaruta wĩra wa mwanya.’ Zekaria aamũririe ũũ: ‘Ingĩgwĩtĩkia atĩa? Niĩ na mũtumia wakwa nĩ tũkĩrĩtie mĩaka ya kũgĩa mwana.’ Gaburieli akĩmwĩra ũũ: ‘Ndũmĩtwo nĩ Ngai nĩguo ngũkinyĩrie ũhoro ũyũ mwega. No tondũ ndũnanjĩtĩkia, ũgũtuĩka bubu nginya rĩrĩa mwana ũcio agaciarũo.’

Zekaria nĩ aaikarire kĩgongona-inĩ gũkĩra ũrĩa aamenyerete. Rĩrĩa oimire nja andũ arĩa maamwetereire nĩ meendaga kũmenya ũrĩa gwathiaga na mbere. No Zekaria ndangĩaririe. Aaragia na ciĩko. Thutha ũcio andũ nĩ maamenyire atĩ Zekaria nĩ aahetwo ndũmĩrĩri kuuma kũrĩ Ngai.

Thutha wa ihinda, Elizabethi nĩ aagĩire nda na agĩciara kaana ga kahĩĩ o ta ũrĩa mũraika oigĩte. Arata na andũ a famĩlĩ yao nĩ mookire kuona kahĩĩ kau na magĩkena mũno. Elizabethi aamerire ũũ: ‘Karĩĩtagwo Johana.’ Nao makĩmwĩra ũũ: ‘Gũtirĩ mũndũ wĩtagwo Johana famĩlĩ-inĩ yanyu. Geete Zekaria o ta Ithe.’ No Zekaria akĩandĩka ũũ: ‘Karĩĩtagwo Johana.’ O ihinda-inĩ rĩu Zekaria nĩ aahotire kwaria rĩngĩ. Ũhoro wĩgiĩ mwana ũcio nĩ watheremire Judea guothe na andũ makĩambĩrĩria kwĩyũria ũũ: ‘Kaĩ mwana ũyũ aakũra agatuĩka mũndũ wa mũthemba ũrĩkũ?’

Zekaria aacokire akĩiyũrũo nĩ roho mũtheru. Aarathire ũũ: ‘Jehova arogoocwo. Nĩ eerĩte Iburahimu atĩ nĩ agaatũma mũhonokia na nĩwe Mesia, nĩguo  atũkũũre. Johana agaatuĩka mũnabii ũrĩa ũkaaharĩria njĩra nĩ ũndũ wa Mesia.’

Ningĩ harĩ ũndũ wa mwanya wahanĩkire harĩ Mariamu ũrĩa warĩ wa famĩlĩ ya Elizabethi. Rekei tuone nĩ ũndũ ũrĩkũ ũcio thĩinĩ wa gĩcunjĩ kĩrĩa kĩrũmĩrĩire.