Johana aakoretwo akĩhunjia ũũ: ‘Nĩ kũrĩ mũndũ ũngĩ mũnene kũngĩra ũroka.’ Jesu arĩ na mĩaka ta 30 ũguo, nĩ oimire Galili agĩthiĩ Rũũĩ-inĩ rwa Jorodani harĩa Johana aabatithagĩria andũ. Jesu eendaga Johana amũbatithie, no nake akĩmwĩra ũũ: ‘Niĩ ndiagĩrĩirũo nĩ gũkũbatithia. Wee nĩwe wagĩrĩirũo nĩ kũbatithia.’ Jesu eerire Johana ũũ: ‘Jehova arenda ũbatithie.’ Nĩ ũndũ ũcio magĩtonya Rũũĩ rwa Jorodani, na Johana akĩrinda Jesu maĩ-inĩ thĩinĩ.

Jesu oimĩra maĩ-inĩ nĩ aahoire. Ihinda-inĩ o rĩu igũrũ nĩ rĩahingũkire, na roho wa Ngai ũgĩikũrũka igũrũ rĩake ũhaana ta ndutura. Jehova aacokire akĩaria arĩ igũrũ akiuga ũũ: “Ũyũ nĩ Mũrũ wakwa, ũrĩa nyendete mũno, na nĩ ndĩmwĩtĩkĩrĩte.”

Rĩrĩa roho wa Jehova waikũrũkire igũrũ rĩa Jesu, nĩrĩo aatuĩkire Kristo, kana Mesia. Hĩndĩ ĩyo, nĩ angĩambĩrĩirie wĩra ũrĩa Jehova aamũheete oke arute gũkũ thĩ.

Jesu arĩkia kũbatithio o ũguo, nĩ aathiire werũ-inĩ na agĩikara kuo thikũ 40. Rĩrĩa oimire kuo, nĩ aathiire kũrĩ Johana. Johana aamuona agĩthiĩ kũrĩ we, oigire ũũ: ‘Gaka nĩko Gatũrũme ka Ngai karĩa gakeheria mehia ma andũ.’ Rĩrĩa Johana oigaga ũguo, nĩ aamenyithirie andũ atĩ Jesu nĩwe warĩ Mesia. Hihi nĩ ũĩ nĩ atĩa kwahanĩkire rĩrĩa Jesu aarĩ werũ-inĩ? Reke tuone.