Jesu na atũmwo maagereire Mũkuru wa Kidironi merekeire Kĩrĩma-inĩ kĩa Mĩtamaiyũ. Kwarĩ ũtukũ gatagatĩ na mweri warĩ mũnene. Rĩrĩa maakinyire mũgũnda-inĩ wa Gethisemane, Jesu aameerire ũũ: “Ikarai haha na mũikare mwĩiguĩte.” Jesu aacokire agĩthiĩ makinya maigana ũna mũgũnda-inĩ ũcio na agĩturia maru. Arĩ na mĩtangĩko mĩingĩ, aahoire Jehova ũũ: “Reke wendi waku wĩkĩke.” Thutha ũcio Jehova nĩ aatũmire mũraika nĩguo amũmĩrĩrie. Rĩrĩa Jesu aacokire harĩ atũmwo ake, aamakorire marĩ toro. Aamerire ũũ: ‘Ũkĩrai! Rĩrĩ tirĩo ihinda rĩa gũkoma! Ihinda rĩakwa rĩa kũneanwo kũrĩ thũ ciakwa nĩ ikinyu.’

O ihinda-inĩ rĩu, Judasi nĩ aakinyire atongoretie kĩrĩndĩ kĩnene kĩarĩ na hiũ cia njora na njũgũma. Nĩ aamenyaga kũrĩa angĩonire Jesu tondũ nĩ maathiaga mũgũnda-inĩ ũcio kaingĩ. Judasi nĩ eerĩte thigari atĩ nĩ angĩacionirie Jesu nĩ ũrĩkũ. Aathiire ĩmwe kwa ĩmwe harĩ Jesu na akĩmwĩra: ‘Mũrutani, geithĩka.’ Agĩcoka akĩmũmumunya. Nake Jesu akĩmwĩra ũũ: ‘Judasi, ũrangunyanĩra na njĩra ya kũmumunya?’

Jesu aakinyũkirie makinya maigana ũna mbere ya kĩrĩndĩ kĩu na akĩũria: “Nũ mũracaria?” Nao makĩmwĩra: “Nĩ Jesu ũrĩa Mũnazarini.” Nake Jesu akĩmacokeria: “Nĩ niĩ we.” Maacokire na thutha na makĩgwa thĩ. Jesu nĩ oririe kĩrĩndĩ kĩu o rĩngĩ: “Nũ mũracaria?” Nao makĩmũcokeria o rĩngĩ: “Nĩ Jesu ũrĩa Mũnazarini.” Jesu aamacokeirie ũũ: ‘Ndĩmwĩrire nĩ niĩ we. Rekereriai andũ aya angĩ.’

Rĩrĩa Petero aamenyire ũrĩa gwathiaga na mbere, aacomorire rũhiũ rwake rwa njora na agĩtinia Maliku gũtũ, ũrĩa warĩ ngombo ya mũthĩnjĩri-Ngai mũnene. No Jesu nĩ aahutirie gũtũ kwa mũndũ ũcio na akĩmũhonia. Aacokire akĩra Petero ũũ:  ‘Cokia rũhiũ rwaku. Warũa na rũhiũ, ũkooragwo o na rũhiũ.’ Thigari icio cianyitire Jesu na ikĩmuoha moko, nao atũmwo makĩũra. Kĩrĩndĩ kĩu gĩacokire gĩkĩmũtwara kũrĩ Anasi, ũrĩa warĩ mũthĩnjĩri-Ngai. Anasi nĩ aahũngire Jesu mahũri, agĩcoka akĩmũtũma kwa Mũthĩnjĩri-Ngai Mũnene wetagwo Kaiafa. No atũmwo meekire atĩa?