Jusufu aarĩ ũmwe wa ariũ a Jakubu arĩa maarĩ anini. Ariũ a ithe arĩa maarĩ akũrũ nĩ monire atĩ Jusufu nĩwe wendetwo mũno nĩ ithe. Ũgwĩciria ũndũ ũcio watũmaga maigue atĩa? Nĩ maiguagĩra Jusufu ũiru na nĩ maamũmenete mũno. Hĩndĩ ĩrĩa Jusufu aarotire iroto cia magegania, nĩ aamamenyithirie. Meeciririe atĩ iroto icio cionanagia atĩ mũthenya ũmwe nĩ mangĩkamũinamĩrĩra. Ũndũ ũcio watũmire mamũmene o na makĩria.

Mũthenya ũmwe ariũ a ithe nĩ maathiire kũrĩithia ng’ondu hakuhĩ na itũũra rĩa Shekemu. Jakubu nĩ aatũmire Jusufu athiĩ akamarore. Nĩ mamuonire arĩ haraihu agĩũka na makĩĩrana ũũ: ‘Ta onei mũnene wa iroto nĩ oka! Rekei tũmũũrage!’ Nĩ ũndũ ũcio makĩmũnyita na makĩmũikia irima-inĩ rĩarĩ iriku. No ũmwe wao ũrĩa wetagwo Juda akĩmeera: ‘Mũtikamũũrage! Rekei tũmwendie agatuĩke ngombo.’ Nĩ ũndũ ũcio makĩendia Jusufu icunjĩ 20 cia betha kũrĩ Amidiani arĩa maathiaga Misiri.

Maacokire makĩhaka kagooti gake thakame ya mbũri, magĩcoka magĩtwarĩra ithe na makĩmwĩra: ‘Na githĩ kagooti gaka ti ka mũrũguo?’ Nĩ ũndũ ũcio Jakubu agĩciria atĩ Jusufu nĩ arĩĩtwo nĩ nyamũ. Agĩkua ngoro na akĩrega kũũmĩrĩrio nĩ mũndũ o na ũmwe.

Jusufu aakinya Misiri, eendirio arĩ ngombo kũrĩ mũnene wa thigari wetagwo Potifaru. Ĩndĩ Jehova aarĩ hamwe na Jusufu. Potifaru nĩ onire atĩ Jusufu nĩ aarutaga wĩra wega na aarĩ mũndũ wa kwĩhokeka. Thutha wa ihinda Jusufu nĩ aaheirũo wĩra wa kũroraga indo ciothe cia Potifaru.

 Mũtumia wa Potifaru nĩ onire atĩ Jusufu aarĩ mũthaka. Aatindaga akĩra Jusufu makomanie. Jusufu eekire atĩa? Aaregire na akĩmwĩra: ‘Aca! Ũguo ti wega. Mwathi wakwa nĩ anjĩhokete, na we ũrĩ mũtumia wake. Ndakoma nawe nĩ ngũhĩtĩria Ngai!’

Mũthenya ũmwe Mũtumia wa Potifaru nĩ aageririe kũmũtindĩkĩrĩria akomanie nake. Nĩ aamũnyitire nguo no Jusufu akĩũra. Rĩrĩa Potifaru aainũkire, mũtumia wake nĩ aamwĩrire atĩ Jusufu eendaga kũmũnyita kĩa hinya. No nĩ kũhenania aahenanagia. Potifaru nĩ aarakarire mũno na agĩikia Jusufu njera. No Jehova ndaariganĩirũo nĩ Jusufu.