Jehova eerire Musa ũũ: ‘Ambata kĩrĩma-inĩ ũũke kũrĩ niĩ. Nĩ ngwandĩka maathani makwa mahiga-inĩ na ngũnengere.’ Nĩ ũndũ ũcio, Musa akĩambata kĩrĩma-inĩ na agĩikara kuo matukũ 40. Jehova nĩ aandĩkire Maathani Ikũmi mahiga-inĩ merĩ na akĩmũnengera.

Thutha wa ihinda, Aisiraeli nĩ meeciririe atĩ Musa nĩ aamatiganĩirie na makĩra Haruni ũũ: ‘Tũthondekere ngai ũrĩa ũrĩtũtongoragia!’ Nake Haruni akĩmeera ũũ: ‘Nengerai thahabu cianyu.’ Nĩ aatwekũrire thahabu icio na akĩmathondekera mũhianano ũtariĩ ta njaũ. Aisiraeli moigire ũũ: ‘Ũyũ nĩwe Ngai ũrĩa watũrutire Misiri!’ Nĩ maambĩrĩirie kũhoya mũhianano ũcio na makĩũkũngũĩra. Hihi ũndũ ũcio nĩ wagĩrĩire? Aca ndwagĩrĩire tondũ nĩ meehĩtĩte gũtungatĩra Jehova tu. No rĩu nĩ maagire gũtũũra kũringana na ũrĩa moigĩte.

Jehova nĩ onire ũrĩa gwathiaga na mbere na akĩra Musa ũũ: ‘Ikũrũka ũthiĩ tondũ andũ nĩ moinĩte watho  wakwa na marahoya ngai ya mũhianano.’ Musa nĩ aaikũrũkire akuuĩte mahiga marĩa merĩ maarĩ na Watho.

Rĩrĩa Musa aakuhĩrĩirie kambĩ ya Aisiraeli, nĩ aaiguire makĩina. Aacokire akĩmona magĩthũngũtha makĩinamagĩrĩra mũhianano ũcio wa njaũ. Musa nĩ aarakarire mũno. Aaikirie mahiga marĩa maarĩ na Watho na makĩenyũkanga, agĩcoka akĩoya mũhianano ũcio o rĩo na akĩwananga. Aacokire akĩũria Haruni ũũ: ‘Nĩ ũndũ ũrĩkũ andũ aya magwĩkĩte nĩguo wĩtĩkĩre gwĩka ũũ?’ Nake Haruni akĩmwĩra: ‘Tiga kũrakara. We nĩ ũĩ ũrĩa andũ aya mahaana. Marendaga ngai ĩngĩmatongoria, na kwoguo ndĩratwekũra thahabu ciao na haroimĩra njaũ ĩno!’ Haruni ndaagĩrĩirũo nĩ gwĩka ũguo. Musa nĩ aacokire kĩrĩma-inĩ rĩngĩ gũthaitha Jehova nĩguo ohere Aisiraeli.

Jehova nĩ oheire arĩa meendaga kũmwathĩkĩra. Hihi nĩ wona ũrĩa ũngĩarĩ ũndũ wa bata harĩ Aisiraeli gwĩtĩkĩra kũrũmĩrĩra ũtongoria wa Musa?