Rĩrĩa Saulu aakuire, Daudi nĩ aatuĩkire Mũthamaki arĩ na mĩaka 30. Thutha wa Daudi gũthamaka mĩaka ĩigana ũna, hwaĩ-inĩ ũmwe arĩ nyũmba igũrũ nĩ onire mũtumia mũthaka. Nĩ aamenyire atĩ eetagwo Bathi-Sheba na aahikĩtio nĩ mũthigari ũmwe wetagwo Uria. Aatũmanire mũtumia ũcio atwarũo nyũmba-inĩ yake, agĩkomania nake, na Bathi-Sheba akĩgĩa nda. Daudi nĩ aageririe kũhitha ũrĩa eekĩte. Eerire mũnene wa thigari atware Uria harĩa mbaara yacacĩire, macoke mamũtiganie nĩguo oragwo. Thutha wa Uria kũũragwo, Daudi nĩ aahikirie Bathi-Sheba.

Jehova nĩ onaga maũndũ macio mothe moru meekĩkaga. Hihi angĩekire atĩa? Nĩ aatũmire mũnabii Nathani kũrĩ Daudi. Nathani eerire Daudi ũũ: ‘Mũndũ ũmwe warĩ mũtongu nĩ aarĩ na ng’ondu nyingĩ, no nĩ kwarĩ na mũthĩni warĩ na kagondu kamwe tu endete mũno. Gĩtonga kĩu nĩ kĩoire kagondu kau ka mũthĩni ũcio.’ Daudi nĩ aarakarire mũno na akiuga: ‘Gĩtonga kĩu kĩagĩrĩirũo nĩ gũkua!’ Nathani eerire Daudi ũũ: ‘Wee nĩwe gĩtonga kĩu!’ Daudi nĩ aakuire ngoro mũno, na agĩtĩkĩra mahĩtia make. Eerire Nathani ũũ: ‘Nĩ njĩhĩirie Jehova.’ Mehia macio nĩ maatũmire Daudi na famĩlĩ yake macemanie na mathĩna maingĩ mũno. Jehova nĩ aaherithirie Daudi, no nĩ aamwĩtĩkĩririe athiĩ na mbere gũtũũra tondũ aarĩ mwĩnyihia na mwĩhokeku.

Daudi nĩ eendaga gwakĩra Jehova hekarũ, no Jehova agĩthuura mũrũwe Suleimani amwakĩre. Daudi nĩ aambĩrĩirie  kũharĩria indo iria Suleimani angĩahũthĩrire gwaka, na akiuga ũũ: ‘Hekarũ ya Jehova no mũhaka ĩkorũo ĩrĩ thaka. Suleimani no mũndũ mũnini, no nĩ ngũmũteithĩrĩria na njĩra ya kũhaarĩria indo cia gwaka.’ Mũthamaki Daudi nĩ aarutire mbeca nyingĩ cia gũteithĩrĩria wĩra-inĩ ũcio. Eethire andũ moĩ gwaka wega, agĩcokanĩrĩria thahabu na betha, na akĩrehithia mbaũ cia mĩtarakwa kuuma Turo na Sidoni. Daudi atanakua, nĩ aatarĩirie Suleimani ũrĩa angĩakire hekarũ. Oigire ũũ: ‘Jehova aanjĩrire nyandĩke maũndũ maya nĩ ũndũ waku na nĩ egũgũteithia. Ndũgetigĩre, gĩa na hinya na ũmĩrĩrie.’