Mũthamaki Beni-hadadi wa Suriata aaikaraga agĩtharĩkagĩra Isiraeli. No mũnabii Elisha nĩ aamenyithagia Mũthamaki wa Isiraeli, na kwoguo nĩ aahotaga kũũra. Nĩ ũndũ ũcio, Beni-hadadi nĩ eeciririe anyite Elisha. Rĩrĩa aamenyire atĩ Elisha aarĩ itũũra-inĩ rĩa Dothani, nĩ aatũmire thigari cia Suriata ithiĩ ikamũnyite.

Thigari cia Suriata nĩ ciathire Dothani ũtukũ. Mũthenya ũyũ ũngĩ rũcinĩ, ndungata ya Elisha nĩ yoimire nja na ĩkĩona itũũra rĩu rĩrigicĩirio nĩ thigari nyingĩ mũno. Nĩ yamakire mũno na ĩkĩanĩrĩra ũũ: ‘Elisha, tũgwĩka atĩa?’ Elisha aamĩrire ũũ: ‘Arĩa marĩ mwena witũ nĩ aingĩ gũkĩra arĩa marĩ mwena wao.’ Jehova nĩ aahingũrire ndungata ya Elisha maitho o hĩndĩ ĩyo, na ĩkĩona irĩma iria ciathiũrũrũkĩirie itũũra rĩu ciyũrĩte mbarathi na ngari cia mwaki.

Rĩrĩa thigari cia Suriata ciageririe kũnyita Elisha, aahoire ũũ: ‘Jehova, ndagũthaitha ũmahinge maitho matikone.’ O rĩmwe thigari icio nĩ ciarigirũo nĩ kũrĩa ciarĩ, o na gũtuĩka maitho ma cio no monaga. Elisha eerire thigari icio ũũ: ‘Itũũra rĩrĩa mũretha ti  rĩrĩ. Nũmĩrĩrai, na nĩ ngũmũtwara kũrĩ mũndũ ũrĩa mũracaria.’ Ciarũmĩrĩire Elisha nginya Samaria kũrĩa mũthamaki wa Isiraeli aaikaraga.

Ciacokire kũmenya kũrĩa ciarĩ thutha-inĩ. Mũthamaki wa Isiraeli oririe Elisha ũũ: ‘Nĩ ũkwenda ndĩmorage?’ Hihi Elisha nĩ aahũthĩrire mweke ũcio kwĩrĩhĩria harĩ andũ acio meendaga kũmwĩka ũũru? Aca. Elisha oigire ũũ: ‘Ndũkamorage. Mahe irio na ũcoke ũmeere mathiĩ.’ Nĩ ũndũ ũcio mũthamaki akĩmarugithĩria iruga inene, agĩcoka akĩmeera mainũke.