TARORA ũrĩa kũrekĩka rĩu. Adamu na Hawa nĩ maraingatwo kuuma mũgũnda mũthaka wa Edeni. Gĩtũmi nĩ kĩĩ?

Tondũ nĩmekire ũndũ mũũru mũno. Nĩkĩo Jehova aramaherithia. We-rĩ, nĩ ũũĩ ũndũ ũcio mũũru Adamu na Hawa mekire?

Mekire ũndũ ũrĩa Ngai aamakanĩtie matigeke. Ngai nĩaamerĩte no marĩe irio kuuma mĩtĩ ĩrĩa yaarĩ mũgũnda-inĩ ũcio. No ha ũhoro wa mũtĩ ũmwe Ngai akiuga matikarĩe, kwaga ũguo no makue. Eigĩire mũtĩ ũcio ũrĩ wake. Na nĩ tũũĩ nĩ mahĩtia kuoya kĩndĩ kĩa mũndũ ũngĩ, kana tiguo? Gwatuĩkire atĩa?

Mũthenya ũmwe Hawa arĩ wiki mũgũnda-inĩ, nyoka ĩkĩmwarĩria. Ta wĩcirie ũguo! Yerire Hawa arĩe itunda rĩa mũtĩ ũrĩa Ngai aamerĩte matikarĩe. No atĩrĩ, rĩrĩa Jehova ombire nyoka-rĩ, ndaciũmbire irĩ cia kwaragia. Ũũ nĩ kuonania atĩ mũndũ ũngĩ nĩwe watũmaga nyoka yarie. Aarĩ ũũ?

Ti Adamu. No mũhaka akorũo akĩrĩ ũmwe wa andũ arĩa Jehova ombĩte o mbere mũno ya kũũmba thĩ. Andũ acio nĩ araika, na tũtingĩhota kũmona. Mũraika ũyũ ũmwe nĩ atuĩkĩte mwĩtĩi mũno. Akĩambĩrĩria gwĩciria atĩ no atuĩke mũthamaki ta Ngai. Eendaga andũ mamwathĩkĩre handũ ha gwathĩkĩra Jehova. Nĩwe mũraika ũrĩa watũmire nyoka yarie.

Mũraika ũcio nĩ ahotire kũhenia Hawa. Rĩrĩa aamwĩrire atĩ nĩ aangĩahananire na Ngai aarĩa itunda-rĩ, agĩgĩtĩkia. Kwoguo akĩrĩa, o ũndũ ũmwe na Adamu. Adamu na Hawa makiuna watho wa Ngai, na nĩkĩo meheririo mũgũnda-inĩ wao mũthaka.

No mũthenya ũmwe Ngai nĩ arĩtũma thĩ yothe ĩthakare o ta mũgũnda wa Edeni. Thutha-inĩ nĩ tũrĩkĩĩruta ũrĩa tũngĩgwatanĩra gũtũma ũũ ũhinge. No rĩu-rĩ, reke tũtuĩrie ũrĩa kwahaanire kũrĩ Adamu na Hawa.