WĨRORERE thĩ haha! Kaĩ indo ciothe nĩ thaka-ĩ! Tarora nyeki na mĩtĩ, mahũa na nyamũ ciothe. Wahota kuorota njogu na mĩrũthi?

Mũgũnda ũyũ mũthaka ũũ-rĩ, woimire kũ? Tareke tuone ũrĩa Ngai aathondekire thĩ nĩ ũndũ witũ.

Mbere, Ngai ombire nyeki nduru ĩhumbĩre thĩ. Na agĩtũma kũgĩe na mĩthemba yothe ya mĩmera mĩnini na ihinga na mĩtĩ. Mĩmera ĩyo ĩkũraga ĩtũmaga thĩ ĩthakare. Makĩria ma ũguo-rĩ, mĩmera mĩingĩ nĩ ĩtũheaga irio irĩ na cama mwega mũno.

Thutha ũcio Ngai akĩũmba thamaki ithambagĩre maĩ-inĩ na nyoni ciũmbũkage rĩera-inĩ. Akĩũmba ngui, nyau, na mbarathi; nyamũ nene na nyinyi. Nĩ nyamũ irĩkũ ikoragwo hakuhĩ na mũciĩ kwanyu? Githĩ to tũgagĩkena tondũ Ngai nĩaatũmbĩire indo ici ciothe?

Mũthiainĩ-rĩ, Ngai agĩthondeka gĩcunjĩ kĩmwe gĩa thĩ gĩ kĩa mwanya mũno. Eetire gĩcunjĩ gĩkĩ mũgũnda wa Edeni. Waarĩ mũkinyanĩru biũ. Indo ciothe ciaguo ciarĩ thaka. Ngai endete thĩ yothe ĩtuĩke thaka o ta mũgũnda ũcio aathondekete.

No ningĩ ta rora mbica ya mũgũnda ũyũ rĩngĩ. Nĩ ũũĩ kĩrĩa Ngai aarorire akĩona gĩtarĩ ho? Tareke tuone.