OŨRĨA andũ maathire na mbere kuongerekeka thĩinĩ wa thĩ, aingĩ ao mekire maũndũ moru ta Kaini. No mũndũ ũmwe aarĩ na ngũũrani. Mũndũ ũyũ nĩwe wĩtagwo Enoku. Enoku aarĩ mũndũ njamba. Andũ arĩa maamũthiũrũrũkĩirie meekaga maũndũ moru mũno, ĩndĩ Enoku aathire na mbere gũtungatĩra Ngai.

Nĩ ũũĩ nĩkĩĩ gĩatũmire andũ acio a hau thutha meke maũndũ maingĩ moru? Ta wĩciirie, nũũ watũmire Adamu na Hawa maremere Ngai na kũrĩa itunda rĩrĩa Ngai aamerĩte matikanarĩe? Ĩĩni, aarĩ mũraika mũũru. Biblia ĩmwĩtaga Shaitani. Ageragia gũtũma andũ othe matuĩke oru.

Mũthenya ũmwe-rĩ, Jehova Ngai atũmire Enoku eere andũ ndeto matangĩendire kũigua. Ciarĩ ici: ‘Mũthenya ũmwe Ngai nĩarĩnina andũ othe arĩa oru.’ No gũkorũo andũ maarakarire mũno kũigua ũguo. O na hihi nĩmageretie kũũraga Enoku. Nĩ ũndũ ũcio Enoku aagĩrĩir̃ũo akorũo arĩ mũndũ mũũmĩrĩru nĩguo ere andũ ũrĩa Ngai aakiriĩ gwĩka.

Ngai ndetĩkĩrire Enoku atũũre ihinda inene gatagatĩ-inĩ ka andũ acio oru. Enoku aatũũrire mĩaka 365 iki tu. Nĩkĩĩ kĩratũma tuuge “mĩaka 365 iki tu”? Gĩtũmi nĩ ũndũ andũ a matukũ macio maarĩ na hinya mũno gũkĩra a matukũ maya na maatũũraga ihinda iraya. Ĩĩni, kaĩ Methusela mũrũ wa Enoku atatũũrire mĩaka 969!

Rĩu, thutha wa Enoku gũkua-rĩ, andũ maakĩrĩrĩirie gũtuĩka oru mũno makĩria. Biblia yuugaga atĩ ‘methugunda mothe ma meciria ma ngoro ciao maarĩ o moru hĩndĩ ciothe,’ na ningĩ ‘atĩ ũũru wa andũ warĩ mũingĩ mũno gũkũ thĩ.’

Nĩ ũũĩ gĩtũmi kĩmwe gĩatũmaga kũgĩe na mathĩna maingĩ mũno thĩinĩ wa thĩ matukũ-inĩ macio? Nĩ ũndũ Shaitani aarĩ na njĩra njerũ ya gũtũma andũ meke maũndũ moru. Nĩ tũkwĩruta ũũ thutha- inĩ.