RĨU-RĨ, tarora Kaini na Habili. Erĩ nĩ andũ agima. Kaini atuĩkĩte mũrĩmi. Akũragia hĩndĩ, matunda na mboga.

Habili nake atuĩkĩte mũrĩithi wa ng’ondu. Nĩ akenagio nĩ gũtungata tũgondu tũrĩa tũnini. Tũkũraga tũgatuĩka ng’ondu ng’ima, na kahinda gatarĩ coho rĩu Habili arĩ na rũru rũnene rũa kũrĩithia.

Mũthenya ũmwe-rĩ, Kaini na Habili nĩ matwarĩire Ngai kĩheo. Kaini akĩrehe irio iria akũrĩtie. Nake Habili agĩkĩrehe ng’ondu ĩrĩa njega mũno. Jehova nĩ aakenirio nĩ Habili o na kĩheo gĩake. No ĩndĩ ndakenirio nĩ Kaini o hamwe na kĩheo gĩake. Nĩ ũũĩ gĩtũmi nĩ kĩĩ?

No tigũtuĩka atĩ kĩheo kĩa Habili kĩarĩ kĩega gũkĩra gĩa Kaini. Gĩtũmi nĩ atĩ Habili arĩ mũndũ mwega. Nĩ eendete Jehova na mũrũ wa nyina. Ĩndĩ Kaini nĩ mũũru; nĩ aathũire mũrũ wa nyina.

Nĩũndũ ũcio Ngai nĩ eeraga Kaini atĩ nĩ aagĩrĩirũo nĩ kũgarũrĩra mĩthiĩre yake. No Kaini ndaathikĩrĩirie. Nĩ mũrakaru mũno tondũ Ngai nĩ eendete Habili. Rĩu Kaini akĩra Habili ‘Reke tũthiĩ na haarĩa mũgũnda.’ Makinya, Kaini akĩgũtha mũrũ wa nyina Habili. Akĩmũgũtha mũno na akĩmũraga. Na githĩ Kaini ndekire ũũru mũno?

O na gũtuĩka Habili nĩakuire-rĩ, Ngai no amũririkanaga. Habili arĩ mwega, na Jehova ndariganagĩrũo o na atĩa nĩ mũndũ wa mũthemba ta ũcio. Nĩũndũ ũcio Jehova Ngai nĩarĩcokia Habili muoyo rĩngĩ. Hĩndĩ ĩyo Habili ndagakua rĩngĩ. Nĩakahota gũtũũra gũkũ thĩ tene na tene. Githĩ gũtigakorũo arĩ wega kũmenyana na andũ ta Habili?

Ngai ndakenagio nĩ andũ a mũthemba ta wa Kaini. Thutha wa Kaini kũraga mũrũ wa nyina, Ngai akĩmũherithia na ũndũ wa kũmũtigithania kũraya mũno na famĩlĩ yao. Hĩndĩ ĩrĩa Kaini aathire gũtũũra mwena ũngĩ wa bũrũri-rĩ, nĩ oire ũmwe wa aarĩ a nyina, na agĩgĩtuĩka mũtumia wake.

Maikaranga-rĩ, Kaini na mũtumia wake makĩambĩrĩria kũgĩa na ciana. Aariũ na aarĩ angĩ a Adamu na Hawa makĩhikania, o nao makĩgĩa na ciana. Kahinda gatarĩ coho gũkĩgĩa andũ aingĩ thĩinĩ wa thĩ. Ta reke twĩrute ũhoro wa amwe ao.