INDO ciothe njega tũrĩ nacio ciumĩte kũrĩ Ngai. Ombire riũa rĩtũheeage ũtheri mũthenya, na mweri na njata itũheeage ũtheri mũna ũtukũ. Ningĩ Ngai agĩtũũmbĩra thĩ tũmĩtũũrage.

No riũa, mweri, njata na thĩ ticio indo cia mbere kũũmbwo nĩ Ngai. Nĩ ũũĩ nĩkĩĩ kĩarĩ kĩndũ kĩa mbere? Mbere Ngai ombire andũ mahaana take. Tũtingĩhota kuona andũ aya, o ta ũrĩa tũtangĩhota kuona Ngai. Thĩinĩ wa Biblia-rĩ, andũ aya metagwo araika. Ngai ombire araika matũũrage nake kũu igũrũ.

Mũraika wa mbere kũũmbwo aarĩ wa mwanya mũno. Aarĩ Mũrũ wa mbere wa Ngai, na aarutaga wĩra hamwe na Ithe. Nĩateithirie Ngai kũũmba indo iria ingĩ ciothe. Nĩateithirie Ngai kũũmba riũa, mweri, njata o na ningĩ thĩ ĩno iitũ.

Thĩ yahaanaga atĩa hĩndĩ ĩyo? Hau kĩambĩrĩria-rĩ, gũtirĩ mũndũ ũngĩatũũrire thĩ. Gũtiarĩ kĩndũ o na kĩ o tiga iria rĩmwe inene rĩa maaĩ igũrũ rĩa thĩ. Ĩndĩ Ngai eendaga andũ matũũre gũkũ thĩ. Akĩambĩrĩria kũharĩria ũtũũro witũ. Ekire atĩa?

Ũndũ wa mbere-rĩ, thĩ yabataraga ũtheri. Nĩ ũndũ ũcio Ngai agĩtũma ũtheri wa riũa warĩre thĩ. Aũthondekire nĩguo kũgĩage mahinda ma ũtukũ na ma mũthenya. Thutha-inĩ Ngai agĩtũma thĩ nyũmũ yumĩre igũrũ rĩa maĩ ma iria.

Mbere thĩ ndĩarĩ na kĩndũ o na kĩmwe. Yahaanaga ta mbica ĩno ũrona haha. Gũtiarĩ mahũa, mĩtĩ kana nyamũ. Thĩinĩ wa maria-rĩ, gũtiarĩ thamaki o na ĩmwe. Ngai aarĩ na wĩra mũingĩ mũno wagũthondeka thĩ ĩtuĩke ũtũũro mwagĩrĩru wa nyamũ na andũ.