NUHU aarĩ na mũtumia na ariũ atatũ. Marĩĩtwa ma ariũ ake maarĩ Shemu, Hamu na Jafethu. Na ariũ acio maarĩ na atumia. Kwoguo famĩlĩ ya Nuhu yaarĩ ya andũ anana.

Rĩu Ngai agĩtũma Nuhu eke ũndũ wa magegania. Akĩmwĩra ake thabina nene. Thabina ĩyo yaarĩ nene ta meri, no ĩndĩ yonekaga ta ithandũkũ inene iraya. Ngai akiuga, ‘ũmĩthondeke ngoroba ithatũ,’ na ningĩ ‘ũmĩkĩre tũnyũmba.’ Tũnyũmba twarĩ twa Nuhu na famĩlĩ yake, nyamũ, na twa irio iria ciabatarainie.

Ningĩ Ngai akĩĩra Nuhu athondeke thabina ũũ atĩ gũtirĩ maĩ mangĩatonyire thĩinĩ. Ngai akiuga atĩrĩ: ‘Nĩ kũrehe ngũrehe mũiyũro wa maĩ nyanange thĩ yothe. Ũrĩa wothe ũtarĩ thĩinĩ wa thabina akue.’

Nuhu na ariũ ake magĩathĩkĩra Jehova na makĩambĩrĩria gwaka. Ĩndĩ andũ arĩa angĩ no kũmũthekerera. Maakĩrĩrĩirie o gũthũka. Gũtirĩ mũndũ o na ũmwe wetĩkagia Nuhu rĩrĩa aamerire ũrĩa Ngai akiriĩ gwĩka.

Gwaka thabina gwakuire ihinda iraihu tondũ yarĩ nene mũno. Thutha wa mĩaka mĩingĩ-rĩ, ĩkĩrĩĩka. Rĩu Ngai akĩĩra Nuhu aingĩrie nyamũ thĩinĩ wa thabina. Nyamũ cia mũthemba mũna-rĩ, Ngai akĩmwĩra aingĩrie igĩrĩ igĩrĩ, ya njamba na ya nga. Ĩndĩ nyamũ cia mĩthemba ĩngĩ-rĩ, Ngai erire Nuhu atonyie mũgwanja mũgwanja. Ningĩ Ngai akĩĩra Nuhu aingĩrie nyoni cia mĩthemba yothe. Nuhu noguo ekire.

Thutha-inĩ, Nuhu na famĩlĩ yake magĩtonya thĩinĩ wa thabina. Rĩu Ngai akĩhinga mũrango. Methĩinĩ-rĩ, Nuhu na famĩlĩ yake magĩgĩeterera. Tahũra mbica wĩ thĩinĩ wa thabina hamwe nao, mwetereire. Ĩĩ rĩu-rĩ, kĩguũ nĩkĩngĩokire ta ũrĩa Ngai oigĩĩte?