ONE kamwana kanini gakĩaria na athuri aya akũrũ. Nĩ arutani thĩinĩ wa hekarũ ya Ngai kũu Jerusalemu. Kamwana kau nĩ Jesu. Rĩu nĩ akũrakũrĩte. Rĩu ena mĩaka 12.

Arutani acio nĩagegu mũno kuona atĩ Jesu nĩoĩ maũndũ maingĩ mũno igũrũ rĩa Ngai na marĩa maandĩkĩtwo Biblia-inĩ. No nĩkĩ kĩgirĩtie Jusufu na Mariamu makorũo haha? Me kũ? Ta reke tuone.

Mwaka o mwaka Jusufu nĩatwaraga famĩlĩ yake Jerusalemu gĩathĩ-inĩ kĩa mwanya gĩĩtagwo Bathaka. Nĩ rũgendo rũraya mũno kuuma Nazarethi nginya Jerusalemu. Gũtirĩ mũndũ wakoragwo na ngari, o na gũtiarĩ na mĩgithi. Matiarĩ nacio matukũ-inĩ macio. Andũ aingĩ maathiaga na magũrũ, na rũgendo rũu rũarĩ ta mĩthenya ĩtatũ gũkinya Jerusalemu.

Ihinda-inĩ rĩu Jusufu aarĩ na famĩlĩ nene. Na nĩ ũndũ ũcio nĩ haarĩ na ariũ na aarĩ a nyina na Jesu anyinyi akũrorũo. Gũkĩrĩ ũguo-rĩ, mwaka ũyũ Jusufu na Mariamu nĩ mohire rũgendo rũu rũraya gũcoka mũciĩ Nazarethi. Meciragia atĩ hihi Jesu aarĩ na agendi arĩa angĩ. No rĩrĩa maahurũkire hwaĩ-inĩ, matigana kuona Jesu. Makĩmũcaria harĩ andũ ao o hamwe na arata, ningĩ matigana kũmuona! Magĩgĩcoka Jerusalemu makamũcarie.

Mũthia-inĩ makĩona Jesu mena arutani. Aramathikĩrĩria akĩũragia ciũria. Nao andũ othe nĩ maagegetio nĩ ũũgĩ wa Jesu. No Mariamu nyina akĩmwĩra atĩrĩ: ‘Mũrũ wakwa, ũtwĩkĩte ũũ nĩkĩ? Rĩu-rĩ, ithuĩ na thoguo tũgũcarĩtie twĩ na kĩeha ma.’

Nake Jesu agĩcokia atĩrĩ, ‘Nĩ kĩ gĩtũmĩte mũnjarie? Kaĩ mũtoĩ atĩ ndirĩ hingo itarĩkoragwo nyũmba ya Baba?’

Ĩĩni, Jesu eendaga gũkorũo harĩa angĩĩruta igũrũ rĩa Ngai. Na githĩ tũtiagĩrĩirũo nĩ kwĩigua o ta ũguo? Kwao mũciĩ Nazarethi, Jesu aathiaga mĩcemanio-inĩ kiumia o kiumia. Na tondũ hingo ciothe nĩathikagĩrĩria, nĩerutire maũndũ maingĩ kuuma Biblia. Reke tũtuĩke ta Jesu twĩgerekanie nake.