NĨ HARĨ ũndũ mũũru mũno wĩkĩkĩte. Johana Mũbatithania no hĩndĩ oragwo. Herodia, mũtumia wa mũthamaki, ndamwendete. Na nĩ ahotire gũtũma mũthamaki arengithie mũtwe wa Johana.

Rĩrĩa Jesu aiguire ũhoro ũcio akĩnyitwo nĩ kĩeha mũno. Agĩthiĩ handũ hatarĩ andũ angĩ e wiki. No andũ makĩmũrũmĩrĩra. Rĩrĩa Jesu onire kĩrĩndĩ agĩkĩiguĩra tha. Agĩitĩka kũmahe ũhoro wa ũthamaki wa Ngai, na akĩhonia arũaru ao.

Hwaĩ-inĩ ũcio arutwo ake magĩũka kũrĩ we makĩmwĩra atĩrĩ: ‘Gũkiriĩ gũtuka, na gũkũ nĩ werũ-inĩ. Ĩra kĩrĩndĩ gĩthiĩ, gĩkinye mĩciĩ-inĩ gĩkegũrĩre irio.’

Jesu akĩmera, ‘Hatirĩ gĩtũmi gĩa gũtũma mathiĩ. Mahei irio arĩ inyuĩ.’ Jesu akĩhũgũkĩra Filipu akĩmwĩra atĩrĩ: ‘Tũkũgũra mĩgate kũ andũ aya makĩrĩe?’

Filipu akĩmũcokeria atĩrĩ, ‘Mĩgate ya ciringi magana merĩ ndĩngĩmaigana, atĩ nĩguo o mũndũ one kanini.’ Andarea akiuga atĩrĩ: ‘Kahĩĩ gaka, karĩa gakuĩte irio ciitũ, kena mĩgate ĩtano na ciũngũyũ igĩrĩ. No ndĩngĩhota kĩigana andũ aya othe.’

Jesu akiuga, ‘Ĩra andũ maikare thĩ nyeki-inĩ.’ Agĩcokeria Ngai ngatho nĩ ũndũ wa irio, na akĩambĩrĩria kwenyũranga mĩgate. Thutha ũcio, arũtwo ake makĩhe andũ othe mĩgate na ciũngũyũ. Kwarĩ na arũme 5,000, na ngiri ingĩ nyingĩ cia atumia na ciana. Othe makĩrĩa na makĩhũna. Na rĩrĩa arutwo maacokanĩrĩirie matigari, makĩũngania ikabu 12 njiũru!

Jesu akĩĩra arutwo ake matonye merikabu maringe mũrĩmo ũũrĩa wa Iria rĩa Galili. Ũtukũ gũkĩgĩa makũmbĩ manene, na marikebu ĩgĩcũgio mwena ũyũ na ũyũ ũngĩ. Arutwo ake magĩĩtigĩra mũno. Na utukũ gatagatĩ, makĩona mũndũ ũmerekeire agereire igũrũ rĩa maĩ. Magĩkaya nĩ gũoya, tondũ matiamenyaga nĩ kĩĩ marona.

Jesu akĩmera, ‘Tigai gwĩtigĩra. Nĩ niĩ!’ Ĩndĩ matietĩkirie. Nake Petero akiuga ũũ: ‘Mwathani akorũo nĩwe, njĩra njũke harĩ wee ngĩkinyaga maĩ igũrũ.’ Jesu agĩcokia: ‘Ũka!’ Na Petero akiuma agĩthiĩ akinyite maĩ igũrũ! Agĩgĩtigĩra akĩambĩrĩria kũhorokera, no Jesu akĩmũhonokia.

O rĩngĩ, Jesu nĩ aahũnirie andũ ngiri nyingĩ. Ihinda rĩrĩ aatũmĩrire mĩgate mũgwanja na ciũngũyũ nyinyi. O ta hĩndĩ ĩrĩa ĩngĩ nĩ kwarĩ na irio nyingĩ cia andũ othe. Githĩ ti ũndũ wa magegania ũrĩa Jesu amenyagĩrĩra andũ ake? Rĩrĩa agathana arĩ mũthamaki wa Ngai, gũtirĩ kĩndũ o na kĩmwe gĩgatũmakia!