TARORA Jesu aikarĩte haha thĩ. Araruta andũ aya othe e kĩrĩma-inĩ kĩmwe thĩinĩ wa Galili. Acio maikaire hakuhĩ nake nĩ arutwo ake. Athurĩte 12 matuĩke atũmwo ake. Atũmwo maarĩ arutwo a mwanya a Jesu. Nĩ ũũĩ marĩĩtwa mao.

Harĩ na Simoni Petero na mũrũ wa nyina Andarea. Na ningĩ Jakubu na Johana arĩa maarĩ ariũ a nyina. Mũtũmwo ũngĩ o nake eetagwo Jakubu, na ningĩ o ũngĩ agetwo Simoni. Atũmwo erĩ meetagwo Judasi. Ũmwe wao aarĩ Judasi Mũisikariota, na Judasi ũrĩa ũngĩ nĩ oĩkaine na rĩĩtwa rĩngĩ ta Thadayo. Ningĩ nĩ haarĩ na Filipu na Nathanieli (na nowe wetagwo Baritholomayo), na Mathayo na Toma.

Aarĩkia kuuma Samaria-rĩ, Jesu akĩambĩrĩria kũhunjia ihinda rĩa mbere akiuga: ‘Ũthamaki wa igũrũ nĩ ũkuhĩhĩirie.’ Wee nĩ ũũĩ ũthamaki ũcio nĩ kĩĩ? Nĩ thirikari ya biũ ya Ngai. Jesu nĩwe mũthamaki wayo. Agaathanaga kuuma igũrũ na arehe thayũ thĩinĩ wa thĩ. Thĩ yothe ĩkagarũrwo na ĩtuĩke paradiso thaka mũno rungu rwa ũthamaki wa Ngai.

Haha Jesu araruta andũ ũhoro wa ũthamaki akameera, ‘Mwagĩrĩirũo nĩ kũhoya ũũ, Ithe witũ wĩ igũrũ, rĩĩtwa rĩaku nĩ rĩamũrũo. Ũthamaki waku ũũke. Ũrĩa wendete wee nĩwĩkagwo gũkũ thĩ o ta ũrĩa wĩkagwo kũu igũrũ.’ Andũ aingĩ meetaga ihoya rĩrĩ, ‘Ihoya rĩa Mwathani.’ Angĩ marĩĩtaga ‘Ithe Witũ.’ Wee no ũcokere ihoya rĩu rĩothe?

Jesu ningĩ nĩ araruta andũ ũrĩa maagĩrĩirũo nĩ gwĩka andũ arĩa angĩ akamera ũũ: ‘Ĩkagai andũ arĩa angĩ o ta ũrĩa mũngĩenda mamwĩkage.’ Wee nĩ ũkenaga rĩrĩa andũ arĩa angĩ magũtuga na njĩra njega? Kwoguo, Jesu aroiga atĩ, twagĩrĩirũo nĩ gũtuga andũ arĩa angĩ na njĩra njega. Na githĩ ndũgakorũo ũrĩ ũndũ mwega mũno thĩinĩ wa paradiso rĩrĩa andũ othe magekaga ũguo?