TARORA ndutura ĩĩrĩa ĩroka kũũmba mũtwe wa mũndũ ũyũ. Mũndũ ũyũ nĩ Jesu. Rĩu nĩ wa mĩaka ta 30. Nake mũndũ ũcio me hamwe nake nĩ Johana. Nĩ tũrĩkĩtie kwĩruta ũndũ mũna igũrũ rĩake. No ũririkane hĩndĩ Mariamu aathire gũcerera Elizabethi, na kaana karĩa kaarĩ nda ya Elizabethi gakĩambarũrũka nĩ gĩkeno? Mwana ũcio warĩ nda nĩ Johana. No rĩu-rĩ Johana na Jesu mareka atĩa?

Johana no hĩndĩ arinda Jesu maĩ-inĩ ma Rũũĩ rwa Jorodani. Ũguo nĩguo mũndũ abatithagio. Mbere, ambaga kũrindwo maĩ-inĩ, rĩu ningĩ agacoka agokĩrio. Na tondũ ũguo nĩguo Johana eekaga andũ, etagwo Johana Mũbatithania. Johana aabatithirie Jesu nĩkĩ?

Ĩĩni, Johana eekire ũguo tondũ Jesu nĩwe waathire akĩũria Johana amũbatithie. Johana aabatithagia andũ arĩa meendaga kuonania atĩ nĩ merirĩte igũrũ rĩa maũndũ marĩa moru mekĩte. No ĩndĩ-rĩ, Jesu nĩ eekĩte ũndũ mũru wa kwĩrira? Aca, Jesu ndaigana kwĩhia, tondũ nĩ Mũrũ wa Ngai kuuma igũrũ. Nĩ ũndũ ũcio eerire Johana amũbatithie tondũ wa gĩtũmi kĩngĩ. Ta reke tuone gĩtũmi kĩu kĩarĩ kĩrĩkũ.

Mbere ya Jesu gũkora Johana, aarĩ mũtheremara. Mũtheremara nĩ mũndũ ũrĩa ũthondekaga indo cia mbaũ, ta metha na itĩ na indo ingĩ ta icio. Jusufu mũthuri wa Mariamu aarĩ mũtheremara, na nĩ aarutire Jesu o nake atuĩke take. No Jehova ndaatũmire mũrũwe gũkũ thĩ atuĩke mũtheremara. Aarĩ na wĩra wa mwanya endaga eke, na rĩu ihinda nĩrĩakinyire Jesu aambĩrĩrie wĩra ũcio. Na nĩguo onanie atĩ rĩu okĩte gwĩka wendi wa Ithe-rĩ, Jesu agĩkĩũria Johana amũbatithie. Hihi-rĩ, Ngai nĩ aakenirio nĩ ũndũ ũyũ?

Ĩĩni, tondũ thutha wa Jesu kuumĩra maĩ-inĩ, mũgambo nĩ woimire igũrũ ũkiuga ũũ: ‘Ũyũ nĩwe Mũrũ wakwa nyendete mũno, ngenaga nĩũndũ wake.’ Ningĩ, gũkuonekana atĩ igũrũ nĩrĩahingũkire na ndutura ĩyo ĩkĩũmba igũrũ rĩa Jesu. No ningĩ ndĩarĩ ndutura ya kĩa biũ. No yaarĩ ya mũhaano. Kũna kũna waarĩ roho wa Ngai.

Rĩu Jesu aarĩ na maũndũ maingĩ mũno ma gũcũũrania, na nĩkĩo aathire handũ hatarĩ mũndũ ũngĩ matukũ 40. Arĩ hau Shaitani akĩmũkora. Mahinda matatũ Shaitani nĩ aageririe Jesu oine watho wa Ngai. No ĩndĩ Jesu ndetĩkĩrire.

Thutha wa ũguo, Jesu agĩcoka na agĩtũngana na andũ arĩa maacokire gũtuĩka arũmĩrĩri ake a mbere, kana arutwo. Mamwe ma marĩĩtwa mao nĩ Andarea, Petero (ningĩ nĩ eetagwo Simoni), Filipu na Nathanaeli (ningĩ eetagwo Baritholomayo). Jesu na arutwo acio ake erũ magĩthiĩ merekeire Galili. Kũu Galili nĩ maarũgamire Kana mũciĩ kwa Nathanaeli. Me kũu Jesu nĩ aathire iruga-inĩ rĩa ũhiki, na akĩringa kĩama gĩake kĩa mbere. Nĩ ũũĩ nĩ kĩrĩkũ? Agarũrire maĩ magĩtuĩka ndibei.