JESU aatithirie ahurũke gĩthima-inĩ kũu Samaria. Arutwo ake maathiĩte itũũra-inĩ kũgũra irio. Mũtumia ũrĩa Jesu ararĩria okĩte gũtaha maĩ. Jesu akĩmwĩra atĩrĩ: ‘He maĩ nyue.’

Ũndũ ũyũ nĩwagegirie mũtumia ũcio mũno makĩria. Wee-rĩ, nĩ ũũĩ gĩtũmi nĩ kĩĩ? Tondũ Jesu nĩ Mũyahudi, na mũtumia nĩ Mũsamaria. Ayahudi aingĩ matiendete Asamaria. O na matingĩamatumũkire! Ĩndĩ Jesu eendete andũ a mĩthemba yothe. Nĩkĩo oigire atĩrĩ: ‘Ũngĩmenya ũyũ nũũ ũrakwĩra he maĩ nyue, nĩwe ũngĩamũhoya nake nĩangĩakũhe maĩ me muoyo.’

Mũtumia ũcio akĩmũcokeria, ‘Mũthuri ũyũ, irima nĩ iriku, na ndũrĩ na kĩndũ gĩa gũtaha nakĩo. Ũkĩrute kũ maĩ macio me muoyo?’

Jesu akĩmũcokeria atĩrĩ, ‘Mũndũ o wothe ũnyuĩte maĩ maya nĩarĩcoka kũnyota rĩngĩ. No maĩ marĩa ngũmũhe niĩ, no matũme mũndũ atũũre tene na tene.’

Mũtumia akĩmwĩra atĩtrĩ, ‘Mũthuri ũyũ, ta he maĩ macio! Na nĩguo ndigage kũnyota. O na ndigage gũũka gũkũ gũtaha.’

Mũtumia ũcio eeciragia atĩ Jesu aaragia ũhoro wa maĩ ma biũ. No we aaragia ũhoro wa ma ĩkoniĩ Ngai na ũthamaki wake. Ma ĩno nĩ ta maĩ ma muoyo. No ĩhe mũndũ muoyo wa tene na tene.

Rĩu Jesu akĩĩra mũtumia ũcio atĩrĩ: ‘Thiĩ ũgete mũthuriguo, mũũke nake.’

Nake mũtumia ũcio akĩmũcokeria atĩrĩ, ‘Ndirĩ na mũthuri wakwa niĩ.’

Nake Jesu akĩmwĩra atĩrĩ, ‘Nĩwoiga wega. Amu wanagĩa na athuri aku atano, na ũrĩa wĩ nake rĩu ti mũthuriguo.’

Mũtumia ũcio akĩgega, tondũ ũndũ ũcio waarĩ wa ma. Jesu aamenyete maũndũ maya atĩa? Ĩĩni, tondũ Jesu nĩwe waarĩ Ũrĩa Weeranĩirũo atũmĩtwo nĩ Ngai, na nĩaamenyithĩtio ũhoro wothe nĩ Ngai. O kahinda kau arutwo a Jesu magĩcoka, na makĩgega mũno maamũkora akĩaria na mũtumia Mũsamaria.

Tũkwĩruta kĩĩ kuuma ũhoro ũyũ wothe? Ũhoro ũyũ ũgũtũruta atĩ Jesu nĩendete andũ a mĩhĩrĩga yothe. O na ithuĩ twagĩrĩirũo nĩ kũmenda. Tũtiagĩrĩirũo nĩ gũtua atĩ andũ amwe nĩ oru atĩ tondũ o nĩ a iruka ingĩ. Jesu endaga andũ othe mamenye ma ĩrĩa ĩtongoragia muoyo-inĩ wa tene na tene. O na ithuĩ nĩ twagĩrĩirũo nĩ gũteithia andũ merute ma ĩyo.