MŨTHENYA ũmwe Jesu nĩ eerire mũndũ mũna atĩ nĩaagĩrĩirũo nĩ kwenda mũndũ wa itũũra rĩake. Nake mũndũ ũcio akĩũria Jesu atĩrĩ: ‘Mũndũ wa itũũra nũũ?’ Ĩĩni, Jesu nĩaamenyaga ũrĩa mũndũ ũcio eeciragia. Mũndũ ũcio eeciragia atĩ no andũ oiki tu a kĩruka gĩake kana a ndini yake mangĩkorũo marĩ a itũũra. Kwoguo reke tuone ũrĩa Jesu aamwĩrire.

Rĩmwe na rĩmwe Jesu aarutanaga na njĩra ya kũheana rũgano. Ũũ nĩguo areka rĩu. Aheanire rũgano rwa Mũyahudi na Mũsamaria. Nĩtũrĩkĩtie kwĩruta atĩ Ayahudi aingĩ nĩmaathũire Asamaria. Ĩĩni, rũrũ nĩruo rũgano rwa Jesu:

Mũthenya ũmwe-rĩ, kwarĩ Mũyahudi waikũrũkaga kĩrĩma erekeire Jeriko. No ĩndĩ imaramari ikĩmũrũnda. Makĩmũiya mbia na makĩmũhũra hakuhĩ gũtumbũka.

Thutha ũcio, mũthĩnjĩri-Ngai Mũyahudi akĩhĩtũkĩra hau. Akĩona mũndũ ũcio waarĩ mũhũre mũno. Ũgĩciria eekire atĩa? Ũũi, aakĩrire mũkĩra ũrĩa ũngĩ wa njĩra na akĩnyita rũgendo rũake. Rĩu ningĩ mũndũ ũngĩ mũndini mũno akĩhĩtũkĩra o ho. Aarĩ Mũlawii. Ĩĩ hihi nĩarũgamire? Aca, ndaigana kũrũgama ateithie mũndũ ũcio wahũrĩtwo kĩũrago. Mbica-inĩ wahota kuona mũthĩnjĩri-Ngai na Mũlawii me haraya me rũgendo-inĩ rwao.

No rĩu-rĩ, rora wone nũũ wĩna mũndũ ũyũ mũhũũre. Kaĩ atarĩ Mũsamaria. Na ningĩ arateithia Mũyahudi. Aramũhaka ndawa ironda-inĩ. Thutha ũcio, agĩtwara Mũyahudi ũcio handũ harĩa angĩahoneirio.

Aarĩkia rũgano rwake-rĩ, Jesu nĩoririe mũndũ ũrĩa worĩtie kĩũria atĩrĩ: ‘Ũgwĩciria nĩ ũrĩkũ wa andũ acio atatũ watuĩkire nĩwe mũndũ wa itũũra harĩ mũndũ ũyũ wahũũrĩtwo? Nĩ mũthĩnjĩri-Ngai-ĩ, Mũlawii kana nĩ Mũsamaria?’

Mũndũ ũcio aamũcokeirie akiuga: ‘Nĩ Mũsamaria. Nĩwe waiguĩrĩire mũndũ ũrĩa wahũũrĩtwo kĩũrago tha.’

Jesu oigire atĩrĩ: ‘Woiga ma. Rĩu gĩthiĩ ũgekanage o ta ũguo.’

Na githĩ ndũgĩkenagio nĩ njĩra ĩrĩa Jesu arutanaga nayo? No twĩrute maũndũ maingĩ mũno, ma bata angĩkorũo nĩtũgũthikĩrĩria ũrĩa Jesu oigĩte Biblia-inĩ, kana tiguo?