TARORA matunda marĩa makuĩtwo nĩ andũ aya. One ũrĩa kĩmanjĩka kĩu gĩa thabibu gĩ kĩnene. No andũ erĩ tu maangĩhota gũgĩkua na kĩmũtĩ. Tarora ngũyũ na makomamanga. Matunda maya mathaka ũũ-rĩ, moimĩte kũ? Moimĩte bũrũri wa Kanaani. Ririkana, Kanaani nĩ kũrĩa Iburahimu, Isaaka na Jakubu maatũraga rĩmwe. No nĩ ũndũ wa ng’aragu ĩrĩa yaarĩ kuo-rĩ, Jakubu na famĩlĩ yake magĩthaamĩra Misiri. Na rĩu thutha wa mĩaka 216, Musa aratongoria Aisiraeli macoke Kanaani. Rĩu nĩakinyu werũ-inĩ handũ hetagwo Kadeshi.

Andũ oru maatũũraga bũrũri wa Kanaani. Nĩ ũndũ ũcio Musa agĩtũma athigani 12, na akĩmera: ‘Tuĩriai ũhoro wa andũ arĩa matũũraga kuo, na kana me na hinya. Tuĩriai kana mĩgũnda nĩ mĩnoru ya gũkũrio indo. Na mũtũrehere maciaro mamwe ma bũrũri ũcio.’

Rĩrĩa athigani maacokire kuuma Kadeshi-rĩ, makĩĩra Musa ũũ: ‘Nĩ bũrũri mwega mũno.’ Na nĩguo metĩkio-rĩ, makĩonia Musa mamwe ma matunda. No 10 a athigani acio makiuga: ‘Andũ arĩa matũũraga bũrũri ũcio nĩ anene na me hinya. Nĩ tũkũũragwo twageria gũtaha bũrũri.’

Aisiraeli maigua ũhoro ũcio makĩmaka makiuga atĩrĩ: ‘Na arĩ korũo nĩ gũkua twakuĩrĩire bũrũri wa Misiri o na kana werũ-inĩ. Tũũkũragĩrũo mbaara-inĩ, na atumia aitũ na ciana ciitũ no a gũtahwo. Rekei twĩthurĩre mũtongoria mwerũ handũ ha Musa, tũhũndũke Misiri!’

Ĩndĩ erĩ a athigani acio nĩmehokete Jehova, na makĩambĩrĩria kũhoreria andũ. Marĩĩtwa mao nĩ Joshua na Kalebu. Makiuga atĩrĩ: ‘Tigai gwĩtigĩra. Jehova eehamwe na ithuĩ. Nĩ ũndũ mũhũthũ kũnyita bũrũri ũcio.’ Ĩndĩ andũ matiigana gũthikĩrĩria. O na meendaga kũũraga Joshua na Kalebu.

Ũndũ ũcio nĩwarakaririe Jehova mũno, nake akĩĩra Musa ũũ: ‘Gũtirĩ mũndũ o na ũmwe kuuma ũkũrũ wa mĩaka 20 gũthiĩ na igũrũ ũgatonya bũrũri wa Kanaani. Nĩ meoneire ciama iria ndaaringire Misiri o na werũ-inĩ, na nĩmaregete kwĩĩhoka. Kwoguo mekũrũũra werũ-inĩ ihinda rĩa mĩaka 40 o nginya mũndũ wao wa mũthia akue. Joshua na Kalebu no o oiki tu magaatonya bũrũri wa Kanaani.’