RĨRĨA Aisiraeli maatonyaga thĩna-inĩ, maakayagĩra Jehova. Jehova aamacokagĩria na kũmahe atongoria omĩrĩru aakũmateithia. Biblia ĩĩtaga atongoria aya atuithania. Joshua nĩwe warĩ mũtuithania wa mbere, amwe a atuithania thutha wake maarĩ Othinieli, Ehudu na Shamigari. Angĩ a arĩa maateithirie Isiraeli maarĩ atumia ta Debora na Jaeli.

Debora aarĩ mũnabii mũndũ- wa-nja. Jehova aamũheaga ũhoro wa maũndũ marĩa magoka, nake akeera andũ ũrĩa Jehova oigĩte. Debora o nake aarĩ mũtuithania. Aikaraga gĩtina-inĩ kĩa mũkĩndũ mwena ũmwe wa irĩma bũrũri wĩ irĩma, nao andũ magathiaga harĩ we gũtuithanio cira.

Ihinda-inĩ rĩrĩ, Jabini nĩwe mũthamaki wa Kanaani. Aarĩ na ngari cia ita 900. Ita rĩake rĩarĩ na hinya ũ atĩ Aisiraeli aingĩ maatũmirũo matuĩke ndungata cia Jabini. Mũnene wa mbũtũ cia Mũthamaki Jabini eetagwo Sisera.

Mũthenya ũmwe Debora agĩtũmanĩra Baraka Mũtuithania cira, akĩmwĩra atĩrĩ: ‘Jehova oigĩte ũũ: “Thiĩ ũrorete Kĩrĩma kĩa Taboru, na woe andũ 10,000. Niĩ na niĩ nĩngũgucĩrĩria Sisera. Na nĩngũmũrekereria ndĩmũneane moko-inĩ maku.” ’

Baraka akĩĩra Debora atĩrĩ: ‘Wee wakorũo nĩũgũtwarana na niĩ-rĩ, o na niĩ nĩngũthiĩ.’ Debora agĩtwarana nake no ningĩ akĩĩra Baraka ũũ: ‘Tiwe ũkũgĩa na gĩtĩo nĩ ũndũ wa ũhotani nĩ gũkorũo Jehova nĩekũrekereria Sisera amũneane moko-inĩ ma mũndũ-wa-nja.’ Ũguo noguo gwatuĩkire.

Baraka agĩikũrũka kuuma Kĩrĩma kĩa Taboru agacemanie na mbũtũ cia Sisera. O rĩmwe Jehova agĩtũma kũgĩe kĩguũ, na thũ nyingĩ cia mbũtũ icio ikĩũrĩra maĩ-inĩ. Nake Sisera agĩkiuma ngari-inĩ yake akĩũra na magũrũ.

Kahinda kanini Sisera agĩkinya hema-inĩ ya Jaeli. Akĩmũnyita ũgeni na akĩmũhe iria. Sisera akĩambĩrĩria gũcũnga, na kahinda kanini agĩkoma biũ. Hĩndĩ ĩyo Jaeli agĩkĩoya higĩ ya hema akĩmĩgũthĩra thikĩrĩrio-inĩ ya mũndũ ũcio mũũru. Thutha-inĩ, rĩrĩa Baraka okire, akĩonio Sisera arĩ mũkuũ! Nĩ ũndũ ũcio no ũkĩone atĩ ũrĩa Debora akiugĩte ũguo nĩguo gwatuĩkire.

Mũthia-inĩ Mũthamaki Jabini nĩoragirũo, na Aisiraeli magĩkĩgĩa na thayũ rĩngĩ gwa kahinda.