NĨ ŨRONA ũrĩa kũrekĩka haha? Ici ciothe nĩ mbũtũ cia ita rĩa Isiraeli. Arũme aya mainamĩrĩire maranyua maĩ. Gideoni, Mũtuithania ciira nĩwe ũrũngiĩ hakuhĩ nao. Araarora ũrĩa maranyua maĩ.

Ta rora wega wone ũrĩa maranyua maĩ na njĩra ii ngũũrani. Amwe ao maturumithĩtie mothiũ mao maĩ-inĩ. Ĩndĩ ũmwe wao aranyua maĩ na moko make, nĩ getha ahote kwĩhũga. Ũyũ nĩ ũndũ wĩ bata tondũ, Jehova eerĩte Gideoni athure andũ arĩa oiki tu mangĩakorirũo makĩnyua maĩ o ũndũ ũmwe makĩhũgaga. Acio angĩ, Ngai akiuga, no mũhaka mainũke. Reke tuone gĩtũmi nĩ kĩĩ.

Aisiraeli nĩmetonyetie thĩna-inĩ rĩngĩ. Gĩtũmi nĩũndũ nĩ maaregire gwathĩkĩra Jehova. Amidiani nĩmaamatoretie na makamaturia. Rĩu Aisiraeli magĩkaĩra Jehova amateithie, na Jehova nĩ aiguire kĩrĩro kĩao.

Jehova agĩkĩĩra Gideoni oe njamba cia ita, nake Gideoni agĩcokanĩrĩria mbũtũ cia ita 32,000. No ĩndĩ he na mbũtũ ya ita ya 135,000 ĩrĩa ĩrahũrana na Isiraeli. O na kũrĩ ũguo-rĩ, Jehova agĩkĩĩra Gideoni atĩrĩ: ‘Andũ aya wĩ nao nĩ aingĩ mũno.’ Nĩ kĩ gĩatũmire Jehova oige ũguo?

Gĩtũmi nĩ tondũ Aisiraeli maangĩahotanire mbaara-rĩ, mangĩeciririe atĩ maahotana na ũndũ wa hinya wao. Mangĩeĩrire atĩ matiabatairio nĩ ũteithio wa Jehova nĩguo mahotane. Kwoguo Jehova akĩĩra Gideoni ũũ: ‘Mũndũ o wothe ũrĩa ũkũigua ta ekũinaina nĩ guoya nĩahũndũke.’ Rĩrĩa Gideoni eekire ũguo, gũgĩkĩhũndũka andũ a mbũtũ ciake 22,000. Agĩgĩtigĩrũo andũ 10,000 akũhũũrana na thigari icio ciothe 135,000.

Ĩndĩ, thikĩrĩria! Jehova oigire ũũ: ‘O na rĩu andũ no aingĩ mũno.’ Agĩkĩĩra Gideoni aikũrũkie andũ rũũĩ makanyue maĩ, nao arĩa magũturumithia mothiũ mao maĩ-inĩ makĩnyua, akiuga mahũndũrũo mũciĩ. Jehova akiuga atĩrĩ, ‘Ngũmũhonokia na ũndũ wa andũ acio 300 arĩa manyuire maĩ makĩĩhũgaga.’

Ihinda rĩa mbaara rĩgĩgĩkinya. Nake Gideoni agĩkĩbanga andũ ake 300 ikundi ithatũ. Akĩnengere o mũndũ coro, na nyũngũ ĩrĩ na gĩcinga thĩinĩ. Ta ũtukũ gatagatĩ, othe magĩthiũrũrũkĩria kambĩ ya thigari iria ciarĩ thũ ciao. Rĩu oro ihinda rĩmwe, othe makĩhuhanĩra macoro mao, na makĩũraga nyũngũ ciao, na makĩanĩrĩra makiuga atĩrĩ: ‘Nĩ rũhiũ rũa Jehova, o na rũa Gideoni!’ Thigari icio thũ ciao ciokĩra-rĩ, ikĩrigicũo na igĩtigĩra. Ciothe ikĩambĩrĩria kũũra, nao Aisiraeli makĩhotana mbaara.