NĨ ŨŨĨ nyũmba ĩno nĩ ĩrĩkũ? Nĩ hema ya mwanya ya kũhoyagĩrũo Jehova. No yo yetagwo hekarũ. Andũ maamĩrĩkirie gwaka mwaka ũmwe thutha wa kuuma Misiri. Wee-rĩ, nĩ ũũĩ rĩarĩ rĩĩciria rĩaũ kũmĩaka?

Rĩarĩ rĩĩciria rĩa Jehova. Rĩrĩa Musa aarĩ igũrũ rĩa Kĩrĩma kĩa Sinai, Jehova akĩmwĩra ũrĩa ekũmĩaka. Aamwĩrire yakwo ũũ atĩ no ĩrutanio icunjĩ icunjĩ. Na njĩra ĩno, icunjĩ nĩingĩakuĩkire itwarũo handũ hangĩ, na inyitithanio rĩngĩ. Kwoguo rĩrĩa Aisiraeli mathamathamaga werũ-inĩ, nĩ maakuaga hema ĩyo.

Ũngĩikia maitho mũthia-inĩ wa karumu kaarĩa kanini-rĩ, no wone ithandũkũ. Rĩrĩ rĩĩtagwo ithandũkũ rĩa kĩrĩkanĩro. Rĩarĩ na araika erĩ kana makerubi maathondeketwo na thahabu, mĩena yerĩ ũmwe mwena ũyũ na ũngĩ mwena ũyũ ũngĩ. O rĩngĩ Ngai akĩandĩka Maathani Ikũmi ihengere-inĩ igĩrĩ cia mahiga, tondũ Musa nĩahehenjete marĩa ma mbere. Na mahiga macio maigagwo thĩinĩ wa ithandũkũ rĩa kĩrĩkanĩro. O na ningĩ, nyũngũ ya mana ĩkĩigwo thĩinĩ wa rĩo. Wee-rĩ, no ũririkane mana nĩ kĩĩ?

Jehova aathurire mũrũ wa nyina na Musa Haruni atuĩke mũthĩnjĩri-Ngai ũrĩa mũnene. Nĩwe watongoragia andũ harĩ gũthathaiya Jehova. O na o ariũ ake maarĩ athĩnjĩri-Ngai.

Rĩu ta cũũthĩrĩria rumu ĩrĩa nene hema-inĩ. Nĩ nene maita merĩ gũkĩra ĩrĩa nini. Ĩ hihi-rĩ, wahota kuona ithandũkũ na ndogo ĩkiuma ho? Gĩkĩ nĩ kĩgongona harĩa athĩnjĩri-Ngai maacinagĩra ũbumba. Ningĩ nĩ harĩ mũtĩ wa gwĩkĩrũo matawa ũrĩa warĩ na matawa mũgwanja. Nakĩo kĩndũ gĩa gatatũ thĩinĩ wa rumu ĩyo nĩ metha. Igũrũ wayo hakaigwo mĩgate 12.

Nja ya hekarũ he mbakũri nene, ĩiyũire maĩ. Yaarĩ ya gwĩthambĩrũo nĩ athĩnjĩri-Ngai. Ningĩ nĩ haarĩ kĩgongona kĩnene. Haha nĩho nyamũ iria irĩkĩtie gũkua ciacinagwo irutĩrũo Jehova igongona. Hema yaarĩ gatagatĩ ga kambĩ, na Aisiraeli matũũraga hema-inĩ ciao mamĩthiũrũrũkĩirie.