TARORA! Aisiraeli makĩringa Rũũĩ rwa Jorodani! Kaĩ maĩ marĩkũ? Tondũ mbura nyingĩ nĩ yuraga ihinda rĩrĩ rĩa mwaka-rĩ, rũũĩ rũkũiyũrĩte mũno kahinda kanini kahĩtũku. Na rĩu maĩ mothe nĩ mahũa! Aisiraeli mararingĩra thĩ nyũmũ o ta ũrĩa mekire Iria-inĩ Itune! Maĩ mothe mathire kũ? Reke tũone.

Hĩndĩ ĩrĩa ihinda rĩakinyire rĩa Aisiraeli kũringa Rũũĩ rwa Jorodani, ũũ nĩguo Jehova aathire Joshua eere andũ: ‘Athĩnjĩri-Ngai moe ithandũkũ rĩa kĩrĩkanĩro mathiĩ mbere ya andũ. Hĩndĩ ĩrĩa marĩtobokia magũrũ mao Rũũĩ-inĩ rwa Jorodani, maĩ nĩ marĩtinĩka.’

Kwoguo athĩnjĩri-Ngai magĩkĩoya ithandũkũ rĩa kĩrĩkanĩro, na makĩrĩkua marĩ mbere ya andũ acio. Rĩrĩa maakinyire hũgũrũrũ-inĩ cia Rũũĩ rwa Jorodani, athinjĩri-Ngai magĩtobokia magũrũ maĩ-inĩ. Rũũĩ nĩ rũiyũru na rũkarika. Na rĩrĩa magũrũ mao maatonyire maĩ-inĩ, rũũĩ rũgĩtiga gũtherera! Kaĩ nĩ kĩama-ĩ! Maĩ marĩa moimaga na rũgongo Jehova nĩ aamang’arĩtie akamomba hĩba. Kahinda o ro kau gũkĩaga maĩ rũũĩ!

Nao athĩnjĩri-Ngai arĩa makuuĩte ithandũkũ rĩa kĩrĩkanĩro makĩrũgama kũndũ kũũmũ gatagatĩ-inĩ ka rũũĩ. No ũmone mbica-inĩ ĩno? Marũngiĩ hau, Aisiraeli othe makĩringĩra thĩ nyũmũ harĩa harĩ Rũũĩ rwa Jorodani!

Hĩndĩ ĩrĩa andũ othe marĩkirie kũringa-rĩ, Jehova akĩĩra Joshua eoere andũ 12 me na hinya: ‘Thiĩi rũũĩ-inĩ harĩa athinjĩri-Ngai marũngiĩ na ithandũkũ rĩa kĩrĩkanĩro. Oyai mahiga 12, mũkamaige kĩraaro-inĩ kĩanyu harĩa mũrĩraara ũtuku ũyũ. Nĩ getha mahinda marĩa magoka, rĩrĩa ciana cianyu ikoria atĩrĩ, gĩtũmi kĩa mahiga maya nĩ kĩĩ, mũgakĩmera atĩrĩ, gĩtũmi kĩamo nĩ rĩrĩ maĩ ma Jorodani nĩ maatinĩkire hĩndĩ ĩrĩa ithandũkũ rĩa kĩrĩkanĩro kĩa Jehova rĩaringagio Rũũĩ rwa Jorodani. Namo mahiga maya marĩtuĩkaga kĩririkania gĩa kĩama gĩkĩ!’ O na ningĩ Joshua agĩkĩiga mahiga 12 harĩa athinjĩri-Ngai maarũgamĩte thĩinĩ wa rũũĩ.

Mũthia-inĩ akĩĩra athĩnjĩri-Ngai acio maakuĩte ithandũkũ rĩa kĩrĩkanĩro: ‘Kiumei rũũĩ-inĩ.’ Othe maarĩkia kuuma, rũũĩ rũkĩambĩrĩria gũtherera rĩngĩ.