NA GITHĨ kahĩĩ gaka ti gathaka mũno? Getagwo Samueli. Na mũndũ ũrĩa ũkaigĩrĩire guoko mũtwe nĩ mũthĩnjĩri-Ngai ũrĩa mũnene wa Isiraeli wĩtagwo Eli. Ũũrĩa nĩ Elikana na Hana ithe na nyina wa Samueli, arĩa maramũrehe kũrĩ Eli.

Samueli e na ũkũrũ wa mĩaka ĩna kana ĩtano. Rĩu egũtũũra hekarũ-inĩ ya Jehova me hamwe na Eli na athĩnjĩri-Ngai arĩa angĩ. Nĩ kĩĩ gĩgũtũma Elikana na Hana maheane kamũndũ kanini ũgũo ta Samueli gatungatĩre Jehova hekarũ-inĩ? Ta reke tuone.

No mĩaka mĩnyinyi tu mĩhĩtũku hĩndĩ ĩrĩa Hana aarĩ na kĩeha kĩingĩ mũno. Gĩtũmi nĩ ũndũ aarĩ thata, na nĩendaga kũgĩa na kaana mũno makĩria. Mũthenya ũmwe rĩrĩa Hana aathiĩte hekarũ-inĩ ya Jehova-rĩ, akĩhoya ũũ: ‘Wee Jehova, ũngĩtĩkĩra ũndirakane, wage kũriganĩrũo nĩ niĩ! Ũngĩhe kahĩĩ-rĩ, niĩ na niĩ nĩngakahee Jehova matukũ mothe ma muoyo wako.’

Jehova nĩ aacokirie mahoya ma Hana, na thutha wa mĩeri ĩigana ũna agĩciara Samueli. Hana nĩendete kahĩĩ gake, na akĩambĩrĩria gũkaruta ũhoro wa Jehova karĩ o gakenge. Agĩkĩĩra mũthuri wake atĩrĩ: ‘Samueli akũra kũra atige kuonga, ngamũtwara hekarũ-inĩ atungatĩre Jehova kuo.’

Mbica-inĩ tũrona Hana na Elikana mamũtwarĩte. Na tondũ Samueli nĩ aarutĩtũo wega mũno nĩ aciari ake-rĩ, nĩ aakenirio nĩ gũtungatĩra Jehova hema-inĩ yake. O mwaka Hana na Elikana nĩ mokaga gũthathaiya hema-inĩ ĩyo ya mwanya, na gũcerera kamwana kau kao. O mwaka Hana nĩatwaragĩra Samueli gakanjũ kerũ.

O ũrĩa mĩaka yahĩtũkaga na mbere, Samueli aathire o na mbere gũtungatĩra Jehova hekarũ-inĩ yake, na agĩkĩendeka nĩ Jehova o hamwe na andũ. No ĩndĩ Hofini na Finehasi ariũ a mũthinjĩri-Ngai Eli-rĩ, maarĩ oru. Mekaga maũndũ maingĩ maganu, na magatũma andũ angĩ maremere Jehova. Eli aagĩrĩirũo nĩ kũmeheria matige gũtuĩka athinjĩri-Ngai, ĩndĩ ndaigana gwĩka ũguo.

Kamwana kau ti Samuel gatietĩkĩririe maũndũ macio moru maathiaga na mbere hekarũ-inĩ magirie gatige gũtungatĩra Jehova. No nĩũndũ nĩ andũ anyinyi mũno meendete Jehova kũna kũna-rĩ, nĩ kwahĩtũkĩte ihinda iraihu mũno kuuma rĩrĩa Jehova aarĩirie mũndũ. No rĩu rĩrĩa Samueli akũrakũrire gwatuĩkire ũũ:

Samueli aarĩ toro hekarũ-inĩ rĩrĩa mũgambo wamũkĩririe. Agĩcokia atĩrĩ: ‘Niĩ ũyũ haha.’ Agĩgĩteng’era kwĩ Eli, akiuga atĩrĩ: ‘Niĩ ũyũ haha tondũ nĩwanjĩta.’

Nake Eli akiuga atĩrĩ: ‘Ndiĩtanĩte; coka ũgakome.’ Rĩu Samueli agĩcoka toro.

Rĩu ningĩ agĩĩtwo rĩa kerĩ: ‘Samueli!’ Nake Samueli agĩkĩarahũka, agĩthiĩ kwĩ Eli. Akiuga atĩrĩ, ‘Niĩ ũyũ haha, tondũ nĩwanjĩta.’ No Eli agĩcokia atĩrĩ: ‘Ndiĩtanĩte, mũrũ wakwa; coka ũgakome.’ Rĩu Samueli agĩcoka toro.

Mũgambo ũgĩĩtana hĩndĩ ya gatarũ, ‘Samueli!’ Ningĩ Samueli agĩteng’era kwĩ Eli o rĩngĩ akĩmwĩra, ‘Niĩ ũyũ haha, tondũ nĩwanjĩta.’ Eli agĩkĩmenya atĩ nĩ Jehova wamwĩtaga. Tondũ ũcio agĩkĩĩra Samueli atĩrĩ: ‘Thiĩ ũgakome, na gũgakinya atĩrĩ, atĩ aagwĩta, uuge atĩrĩ, “Aria, Jehova; nĩ ũndũ ndungata yaku nĩĩraigua.’ ”

Ũũ nĩguo Samueli oigire Jehova eetana rĩngĩ. Jehova akĩĩra Samueli atĩ nĩekũherithia Eli na ariũ ake. Thutha ũcio Hofini na Finehasi magĩkua makĩrũa na Afilisiti, nake Eli aigua ũrĩa gwekĩkire, akĩgũa na ngara akiunĩka ngingo na agĩkua. Kwoguo kiugo kĩa Jehova gĩkĩhinga.

Samueli agĩgĩkũra, na agĩtuĩka mũtuaniri cira wa mũthia wa Isiraeli. Hĩndĩ ĩrĩa aakũrire-rĩ, andũ magĩthiĩ kũrĩ we makĩmwĩra atĩrĩ: ‘Tũhe mũthamaki atwathage.’ Samueli ndendaga gwĩka ũguo tondũ Jehova nĩwe waarĩ mũthamaki wao. No ĩndĩ Jehova akĩmwĩra etĩkĩre uuge wa andũ acio.