WEE-RĨ, nĩ ũũĩ rĩĩtwa rĩa mũndũ ũrĩa waarĩ na hinya makĩria na wanatũũra? Aarĩ mũtuithania cira wetagwo Samusoni. Jehova nĩwe waaheire Samusoni hinya. O na mbere ya Samusoni gũciarũo-rĩ, Jehova eerire nyina atĩrĩ: ‘Nĩũkũgĩa ihu, ũciare kahĩĩ. Nĩko gakaambĩrĩria kũhonokia Isiraeli, kamarute moko-inĩ ma Afilisiti.’

Afilisiti maarĩ andũ oru maatũũraga Kanaani. Maarĩ na arũme aingĩ maarũaga, na nĩ mahinyagĩrĩria Aisiraeli mũno. Hĩndĩ ĩmwe, rĩrĩa Samusoni aarĩ njĩra-inĩ erekeire kũrĩa Afilisiti maatũũraga-rĩ, mũrũthi mũnene ũkĩmwerekera ũmũraramĩire. No Samusoni oragire mũrũthi ũcio e moko matheri. Ningĩ nĩoragire magana maingĩ ma Afilisiti oru.

Thutha ũcio Samusoni akĩenda mũndũ-wa-nja wetagwo Delila. Anene a Afilisiti makĩĩhĩta atĩ o ũmwe ũmwe wao nĩekũhe Delila icunjĩ cia betha 1,100 angĩkorũo nĩekũmera kĩrĩa gĩtũmaga Samusoni agĩe na hinya mũnene. Delila nĩendire mbeca icio ciothe. Ndaarĩ mũrata wa ma wa Samusoni, o na kana andũ a Ngai. Kwoguo aathire na mbere kũũria Samusoni kĩrĩa gĩtũmaga agĩe na hinya.

Mũthia-inĩ, Delila nĩatũmire Samusoni amumbũrĩre hitho ya hinya wake. Akĩmwĩra atĩrĩ, ‘Ndirĩ ndahĩtũkĩrũo nĩ rũenji mũtwe wakwa. Nĩ ũndũ ndũire ndĩ Mũnaziri wamũrĩirũo Ngai gwata hĩndĩ ĩrĩa ndoimire nda ya maitũ. No rĩrĩ, ingĩenjwo-rĩ, hinya wakwa no ũthire.’

Ĩĩni, rĩrĩa Delila aamenyire ũguo-rĩ, agĩtũma Samusoni akomere maru make na agĩkoma toro biũ. Riũ agĩĩta mũndũ oke amwenje njuĩrĩ yake. Rĩrĩa Samusoni okĩrire-rĩ, hinya wake nĩwathirĩte. Afilisiti magĩgĩũka na makĩmũnyita. Makĩmũkũũra maitho merĩ, na makĩmũtua ngombo yao.

Mũthenya ũmwe Afilisiti maarĩ na igongona inene rĩa gũthathaiya ngai wao Dagoni, na makĩrehe Samusoni kuuma korokoro-inĩ nĩguo mamũnyũrũrie. Rĩu ihinda-inĩ rĩrĩ njuĩrĩ ya Samusoni nĩyaakũrĩte rĩngĩ. Samusoni agĩkĩĩra kamwana karĩa kaamũnyitaga guoko atĩrĩ: ‘Ta reka hutie itugĩ ici itiirĩte nyũmba ĩno.’ Hĩndĩ ĩyo Samusoni akĩhoya Jehova amũhe hinya, na akĩnyita itugĩ icio. Samusoni akĩanĩrĩra atĩrĩ: Ndĩrokuanĩra na Afilisiti aya.’ Kwarĩ na Afilisiti 3,000 iruga-inĩ rĩu, na rĩrĩa Samusoni ainamĩrĩire anyitĩte itugĩ-rĩ, nyũmba yothe ĩkĩmomoka na andũ acio othe oru magĩkua.