ŨRĨ waigua ndigiri yanaria? Wahota kuuga, ‘Aca, nyamũ itingĩhota kwaria.’ Ĩndĩ Biblia ĩtwĩĩraga ũhoro wa ndigiri yaaririe. Ta reke tuone gwekĩkire atĩa.

Aisiraeli me hakuhĩ mũno gũtonya bũrũri wa Kanaani. Balaki, mũthamaki wa Amoabi, nĩ areetigĩra Aisiraeli. Kwoguo agĩtũmanĩra mũndũ ũmwe mũũgĩ wetagwo Balaamu oke arume Aisiraeli. Balaki akĩĩrĩra Balaamu mbeca nyingĩ mũno, na rĩu Balaamu akĩhaica ndigiri yake magakĩonane na Balaki.

Jehova ndarenda Balaamu arume andũ Ake. Nĩ ũndũ ũcio agĩgĩtũma mũraika na rũhiũ rũraihu rwa njora arũgame njĩra-inĩ agirie Balaamu ahĩtũke. Balaamu ndonaga mũraika, no ĩndĩ ndigiri yake nĩyaamwonaga. Ndigiri nĩ yageririe mũno kweherera mũraika, na mũthia-inĩ ĩgĩkoma njĩra. Balaamu akĩrakara mũno, akĩambĩrĩria kũhũũra ndigiri yake na mũtĩ.

Tondũ ũcio Jehova agĩtũma Balaamu aigue ndigiri yake ĩkĩaria. Ndigiri ĩkĩmũria atĩrĩ, ‘Kaĩ ngwĩkĩte atĩa atĩ nĩkĩo ũkũngũtha?’

Nake Balaamu akĩmĩĩra atĩrĩ, ‘Nĩ ũningĩte itherũ ihunyũku. Na ingiuma na rũhiũ rwa njora nĩingĩkũũragĩte rĩu!’

Ndigiri ĩkĩmũria atĩrĩ, ‘Ndĩ ndamenyera gũgwĩka ũguo, o na rĩ?’

Balaamu akiuga, ‘Aca.’

Rĩu Jehova akĩhingũra Balaamu maitho one mũraika arũngamĩte njĩra-inĩ anyitĩte rũhiũ rwa njora. Mũraika akĩmũũria atĩrĩ, ‘Wagũtha ndigiri yaku nĩ ũndũ kĩ? Njũkĩte gũkũgiria ũhĩtũke, tondũ ndwagĩrĩirũo nĩ gũthiĩ kũruma Aisiraeli. Korũo ndigiri yaku ndĩnakerũra ĩnjeherere-rĩ, ti-itherũ rĩu nĩingĩkũũragĩte, nayo ndĩmĩhonokie ndĩmĩtige ĩrĩ muoyo.’

Balaamu akiuga atĩrĩ: ‘Nĩnjĩhĩtie. Nĩ ũndũ ndikũũĩ atĩ nĩũrũgamĩte njĩra-inĩ.’ Mũraika agĩgĩtĩkĩria Balaamu athiĩ one Balaki. No aathire na mbere kũgeria kũruma Isiraeli, ĩndĩ handũ ha ũguo-rĩ, Jehova atũũmire amarathime mahinda matatũ.