NYOKA ĩrĩa yohereirũo mũtĩinĩ-rĩ, nĩĩroneka ta ĩrĩ ya biũ? Aca. Nyoka ĩno ĩthondeketwo na gĩcango. Jehova eerire Musa amĩcuurie igũrũ rĩa mũtĩ nĩ getha andũ mamĩrora matigakue. Ĩndĩ nyoka icio ingĩ ũrona hau thĩ nĩ cia biũ. Irũmĩte andũ na igatũma marũare. Nĩ ũũĩ gĩtũmi nĩ kĩĩ?

Gĩtũmi nĩ tondũ Aisiraeli nĩ maarĩtie maũndũ ma gũcambia Ngai o na Musa. Maatetire makiugaga atĩrĩ: ‘Mwatũrutire Misiri tũũke tũkuĩre gũkũ werũ-inĩ nĩkĩ? Gũkũ gũtirĩ irio, na gũtirĩ maĩ. Tũtingĩhota kũrĩa mana rĩngĩ nĩ ũndũ wa kĩnyiria.’

No ĩndĩ mana ciarĩ irio njega. Nĩ cio Jehova aamahete na njĩra ya kĩama. Ningĩ na njĩra ya kĩama no aamahete maĩ. No andũ acio matiarĩ na ngatho ya ũrĩa Ngai aamamenyereire. Nĩ ũndũ ũcio Jehova agĩgĩtũma nyoka cia thumu aherithie Aisiraeli. Nyoka ikĩmarũma, na aingĩ ao magĩkua.

Mũthia-inĩ andũ acio magĩthiĩ kwĩ Musa makĩmwĩra atĩrĩ: ‘Nĩtwĩhĩtie nĩ ũndũ nĩtũcambĩtie Jehova o nawe. Hoya Jehova, nĩ getha atũthengerie nyamũ ici cia thĩ.’

Nake Musa agĩkĩmahoera. Nake Jehova akĩĩra Musa athondeke nyamũ-ya-thĩ ya gĩcango. Akiuga ĩcurio mũtĩ igũrũ, na atĩ mũndũ o wothe ũrũmĩtwo akamĩrora. Musa agĩĩka o ũrĩa Ngai oigĩĩte. Nao andũ arĩa maarũmĩtwo marora nyamũ ĩyo ya gĩcango makahona.

Haha hena gĩthomo gĩa kwĩrutwo. Ithuothe na njĩra ĩngĩ, tũhaana ta Aisiraeli acio maarũmĩtwo nĩ nyoka. Tũrĩ mũikarĩre-inĩ wa gĩkuũ. Tathiũrũrũka wĩyonere ũrĩa andũ marakũra, makarũara, na magakua. Gĩtũmi nĩ tondũ Adamu na mũtumia wake Hawa, nĩ maahutatĩire Jehova, na ithuothe tũrĩ ciana ciao. Ĩndĩ Jehova nĩathondekete njĩra nĩguo tũtũũre tene na tene.

Jehova aatũmire Mũrũwe, Jesu Kristo, gũkũ thĩ. Jesu acuuririo mũtĩ-igũrũ, tondũ andũ aingĩ meeciririe atĩ aarĩ mũũru. No Jehova akĩheana Jesu atũhonokie. Tũngĩmũcũthĩrĩria na kũmũrũmĩrĩra, nĩtũkagĩa na muoyo wa tene na tene. Nĩ tũkwĩruta maũndũ macio thutha-inĩ.