TARORA Joshua. Aroiga: ‘Wee riũa, rũgama o ro ũguo!’ Narĩo riũa rĩkĩrũũgama o ro ũguo. Rĩgĩikara gatagatĩ-inĩ ka matu marĩa mairũ mũthenya mũgima. Jehova agĩtũma ũndũ ũcio wĩkĩke! Rekei tuone kĩrĩa kĩratũma Joshua ende riũa rĩrũgame.

Rĩrĩa athamaki arĩa atano oru a bũrũri wa Kanaani mokĩrĩire Agibeoni-rĩ, Agibeoni magĩtũmanĩra Joshua oke amateithie. Makĩmwĩra atĩrĩ. ‘Ambata na ihenya ũke ũtũhonakie! Nĩ gũkorũo athamaki othe arĩa matũũraga bũrũri ũrĩa ũrĩ irĩma monganĩte hamwe moke mahũre ndungata ciaku.’

Tondũ ũcio Joshua na andũ ake a ita magĩthiĩ o rĩo. Maaraire magĩthiĩ ũtukũ wothe. Rĩrĩa maakinyire Gibeoni, thigari cia athamaki acio atano igĩtigĩra mũno na ikĩambĩrĩria kũũra. Jehova akĩmagũithĩria mahiga manene ma mbura ya mbembe moimĩte igũrũ, na o arĩa maakuire nĩũndũ wa mahiga ma mbura ya mbembe maarĩ aingĩ gũkĩra arĩa moragirũo nĩ thigari cia Joshua.

Joshua nĩ onaga atĩ riũa nĩ rĩgũthũa o narua. Nĩgũgũtuka, na thigari nyingĩ cia athamaki arĩa atano oru nĩ ikũũra. Nĩkĩo gĩatũmire akaĩre Jehova akiuga: ‘Wee riũa, rũgama o ro ũguo.’ Na rĩrĩa riũa rĩathire na mbere kwara, Aisiraeli makĩhotana mbaara.

Nĩ kwarĩ na athamaki angĩ aingĩ oru thĩinĩ wa Kanaani arĩa maamenete andũ a Ngai. Rĩakuuire Joshua na andũ ake a ita ta mĩaka itandatũ gũtoria athamaki 31 a bũrũri ũcio. Ũguo warĩka gwĩkĩka, Joshua agĩkĩhota kũgayania bũrũri wa Kanaani kũrĩ mĩhĩrĩga ĩrĩa yabatairio nĩ gĩcunjĩ.

Mĩaka mĩingĩ ĩkĩhĩtũka, na Joshua mũthia-inĩ agĩkua arĩ na ũkũrũ wa mĩaka 110. Rĩrĩa we na arata ake maarĩ muoyo-rĩ, andũ nĩ maathĩkagĩra Jehova. No rĩrĩa andũ aya ega maakuire-rĩ, andũ makĩambĩrĩria gwĩka ũũru na makĩingĩra thĩna-inĩ. Kũna kũna rĩrĩ nĩrĩo ihinda rĩrĩa maabatairio nĩ ũteithio wa Ngai.