RĨRĨ nĩ ibuku rĩa ng’ano cia ma. Ciumĩte thĩinĩ wa Biblia, ibuku rĩrĩa rĩa bata mũno thĩinĩ wa thĩ. Ng’ano ici iheanĩte historia ya thĩ, kuuma rĩrĩa Ngai aambĩrĩirie ũũmbi nginyagia matukũ-inĩ maya maitũ. O na ningĩ nĩitwĩraga ũrĩa Ngai eeranĩire gwĩka ihinda-inĩ rĩrĩa rĩũkĩte.

Ibuku rĩrĩ rĩgũgũtaarĩria wega gĩtũmi kĩa Biblia nĩ kĩĩ. Rĩtwĩraga ũhoro wĩgiĩ andũ a Biblia na maũndũ marĩa meekire. O na ningĩ nĩrĩonanagia ũhoro wa mwĩrĩgĩrĩro mũnene wa muoyo wa tene na tene thĩinĩ wa paradiso ya thĩ, ĩrĩa Ngai ahete andũ.

Ibuku rĩrĩ rĩĩ na ng’ano 116. Na cio igayanĩtio thĩinĩ wa icunjĩ inyanya. O kĩambĩrĩria gĩa karatathi-rĩ, tũtaarĩirio ũhoro mũkuhĩ ũrĩa wĩ thĩinĩ wa gĩcunjĩ kĩu. Ng’ano ici ibangĩtwo kũringana na mũtaratara wa ũrĩa maũndũ meekĩkire thĩinĩ wa historia. Ũhoro ũyũ ũgũgũteithia kwĩruta njĩra ya kũringithania maũndũ mangĩ, marĩa meekĩkire thĩinĩ wa historia.

Ng’ano ici iheeanĩtwo na rũthiomi rũhũthũ. Aingĩ a inyuĩ ciana ici nyinyi nĩ mũkũhota gwĩthomera inyuĩ ene. Aciari na inyuĩ nĩmũrĩhota kwĩyonera atĩ ciana cianyu iria nyinyi nĩirĩkenagĩra gũthomerũo ng’ano ici rĩngĩ na rĩngĩ. Ningĩ nĩ mũrĩona atĩ ibuku rĩrĩ rĩna ũhoro wa gũkenia andũ ethĩ o na arĩa akũrũ.

Maandĩko ma Biblia monanĩtio mũthia-inĩ wa o rũgano. Ũkũũrio ũthome icunjĩ ici cia Biblia iria iheanĩte mũthingi wa ng’ano ici. Warĩkia gũthoma rũgano-rĩ, ta cokera ciũria cia wĩruti cia rũgano rũu iria irũmĩrĩire Rũgano rwa 116 na ũgerie kana wahota kũririkana macokio.