ŨŨI ĨIYA WAKWA Ĩ! Kaarĩ atĩa kũhanire? Kamwana kaarĩa gakomete harĩa thĩ-rĩ, hihi nĩ gatihie ũru? Ta rora! ũmwe wa andũ arĩa maroima nyũmba nĩ Paulo! Wahota kũona Timotheo o nake hau? Kamwana gaka-rĩ, kagũa kuuma ndirica-inĩ?

Ĩĩni, ũguo nĩ guo gwekĩkire. Paulo aheaga arutwo ũhoro kũu Teroa. Nĩ aamenyaga atĩ ndegũcoka kũmona rĩngĩ kwa ihinda iraihu tondũ aarĩ ahaice meri mũthenya ũcio ũngĩ. Kwoguo aathire na mbere kũmaarĩria o nginya ũtukũ gatagatĩ.

Rĩu-rĩ, kamwana kau getagwo Eutuko gaikarĩire ndirica-inĩ, na gakĩnyitwo nĩ toro. Kagũire thĩ, kũgerera ndirica-inĩ ĩyo, kuuma ngoroba ya gatatũ! No ũkĩone gĩtũmi kĩrĩa gĩtũmĩte andũ magĩe na kĩeha. Rĩrĩa andũ moire kamwana kau-rĩ, gwatuĩkire o taũrĩa meecirĩtie. Kaarĩ gakuũ!

Rĩrĩa Paulo onire kamwana nĩ gakuũ-rĩ, agĩgakomera na agĩkahĩmbĩria. Rĩu akiuga atĩrĩ: ‘Tigai gũtangĩka. Arĩ o muoyo!’ Kaĩ nĩ kĩama-ĩ! Paulo nĩ aamũcokia muoyo! Kĩrĩndĩ gĩkĩiyũrũo nĩ gĩkeno.

Othe makĩhaica nyũmba ya ngoroba na makĩrĩa irio. Paulo aathire na mbere na kwaria o nginya gũgĩkĩa. No ĩtĩkia atĩ Eutuko ndakomire rĩngĩ! Rĩu Paulo, Timotheo na arĩa maarĩ rũgendo-inĩ hamwe makĩhaica meri. Nĩ ũũĩ kũrĩa merekeire?

Paulo no hĩndĩ arĩkia rũgendo rũake rwa kũhunjia, na rĩu erekeire mũciĩ. Rũgendo-inĩ rũrũ Paulo aikarire mĩaka ĩtatũ itũũra-inĩ rĩa Efeso. Kwoguo rũrũ nĩ rũgendo rũraihu gũkĩra rũrĩa rũa kerĩ.

Thutha wa kuuma Teroa, meri ĩkĩrũgama Mileto gwa kahinda. Tondũ Efeso gũtiarĩ kũraya-rĩ, Paulo agĩtũmana athuri a gĩkundi moke Mileto nĩ getha amaarĩrie ihinda rĩake rĩa mũthia. Thũtha-inĩ, rĩrĩa rũgendo rwa meri rwakinyire-rĩ, kaĩ nĩ maiguire kĩeha mona Paulo agĩthiĩ!

Mũthia-inĩ meri ĩgĩkinya Kaisarea. Rĩrĩa Paulo aikaraga nyũmba ya mũrutwo Filipu, mũnabii Agabo akĩhe Paulo mũkaana. Oigire atĩ Paulo nĩ agaikio korokoro-inĩ akinya Jerusalemu. Na hatarĩ nganja ũguo nĩguo gwatuĩkire. Kwoguo-rĩ, aarĩkia gũikara korokoro-inĩ Kaisarea mĩaka ĩrĩ-rĩ, Paulo agĩtũmwo Roma agacirithĩrio kuo nĩ Kaisari. Reke tuone ũrĩa kwahanire e rũgendo-inĩ rwa gũthiĩ Roma.