TARORA! kaĩ marikabu ĩno ĩkĩrĩ na thĩnaĩ! Nĩ kũhehenjeka ĩrahehenjeka tũcunjĩ! Nĩ ũrona andũ marũgĩte magatonya maĩ-inĩ? Amwe ao nĩmambĩrĩirie gũkinya hũgũrũrũ-inĩ. Ũũrĩa-rĩ, nĩ Paulo? Reke tuone akoretwo akĩnyitwo nĩ maũndũ marĩkũ.

Ririkana, ihinda rĩa mĩaka ĩĩrĩ Paulo aarĩ muohe thĩinĩ wa Kaisarea. Na rĩu we na mĩgwate ĩngĩ magĩĩkĩrũo marikabu-inĩ, makĩnyita rũgendo merekeire Roma. Hĩndĩ ĩrĩa maahĩtũkagĩra hakuhĩ na gĩthama gĩa Kirete, kĩhuhũkanio kĩnene mũno gĩkĩmagũtha. Rũhuho rwahuhũkanire mũno ũũ atĩ andũ makĩremwo nĩ gũtwarithia marikabu. Matingĩahotire kuona riũa mũthenya kana njata ũtukũ. Mũthia-inĩ, thutha wa matukũ maingĩ, arĩa othe maarĩ marikabu-inĩ makĩũrũo nĩ mwĩhoko wa muoyo.

Hĩndĩ ĩo Paulo akĩrũgama gatagatĩ-inĩ kao akĩmera atĩrĩ: ‘Gũtirĩ mũndũ o na ũmwe wanyu ũgũkua; no marikabu ĩkũũra. Tondũ ũtukũ o ũyũ nĩnyumĩrĩirũo nĩ mũraika wa Ngai na aranjĩra atĩrĩ, “Tiga gwĩtigĩra, Paulo! Ndũrĩ hingo ũtakarũgama mbere ya Kaisari. Na Ngai nĩ ekũhonokia arĩa othe mwĩ rũgendo-inĩ nao.” ’

Ta ũtukũ gatagatĩ mũthenya wa 14 thutha wa kĩhuhũkanio kwambĩrĩria-rĩ, atwarithia a marikabu makĩona atĩ maĩ nĩ maambĩrĩirie kũhwa! Tondũ wa gwĩtigĩra matikaringe rũaro ũtukũ-rĩ, makĩgũithia nanga. Mũthenya ũyũ ũngĩ makĩona thĩ nyũmũ. Magĩĩciria matwarithie marikabu o nginya hũgũrũrũ-inĩ.

Na rĩu, rĩrĩa maakuhĩhĩirie hũgũrũrũ-inĩ, marikabu ĩkĩgũtha mũthanga ĩgĩtonyerera. Thutha ũcio makũmbĩ ma maĩ makĩhehenja marikabu ĩyo icunjĩ icunjĩ. Mũnene wa thigari agĩkiuga atĩrĩ: ‘Arĩa mekũhota gũthambĩra meikie iria-inĩ mambe makinye thĩ hũgũrũrũ-inĩ. Na inyuĩ aya angĩ-rĩ, mwĩgwatĩre icunjĩ imwe cia marikabu mwĩnyitĩrĩre.’ Na ũguo nĩguo mekire. Na andũ othe 276 arĩa maarĩ thĩinĩ wa marikabu makĩhota gũkinya hũgũrũrũ-inĩ me muoyo, o ta ũrĩa mũraika eranĩire

Gĩthama kĩu gĩetagwo Malita. Andũ akuo maarĩ atugi mũno, na nĩ maatungatĩire arĩa maarĩ marikabu-inĩ. Hĩndĩ ĩrĩa rĩera rĩagĩrire-rĩ, Paulo agĩkĩrĩo thĩinĩ wa marikabu ĩngĩ agĩtwarũo Roma.