WEE-RĨ, nĩ ũũĩ nũũ ũkomete haha thĩ? Ũyũ nĩ Saulu. Ta ririkana, ũyũ nĩwe ũrĩa waikarĩrĩirie nguo cia andũ arĩa maahũrire Stefano na mahiga. Ta rora ũtheri ũcio mũkengu! Kaĩ kũrekĩka atĩa?

Thutha wa Stefano kũũragwo-rĩ, Saulu aatongoririe kũhĩta arũmĩrĩri a Jesu amanyarire. Aathiaga nyũmba o nyũmba akĩmarutũrũraga na kũmaikithia korokoro-inĩ. Aingĩ a arutwo maahurunjũkĩire matũũra-inĩ mangĩ na magĩthiĩ na mbere kũhunjia “ũhoro mwega.” No ĩndĩ Saulu aathire matũũra-inĩ mangĩ gwetha arũmĩrĩri a Jesu. Rĩu e njĩra-inĩ erekeire Dameski. No rĩrĩ, e njĩra-inĩ agĩthiĩ, ũndũ wa magegania ũgĩkĩka:

O rĩmwe ũtheri kuuma igũrũ ũkĩarĩra Saulu mĩena yothe. Akĩgwa thĩ, ta ũrĩa tũrona haha. Rĩu akĩigua mũgambo woiga: ‘Saulu, Saulu! Ũnyariraga nĩkĩ?’ Andũ arĩa matwaranĩte na Saulu makĩona ũtheri na makĩigua mũgambo, no matiataũkĩirũo nĩ ũrĩa kweragwo.

‘Wee nĩwe ũ, Mwathani?’ Saulu akĩũria.

Mũgambo ũkiuga ũũ, ‘Nĩ niĩ Jesu ũrĩa ũnyariraga.’ Jesu oigire ũguo nĩũndũ rĩrĩa Saulu anyarira arũmĩrĩri a Jesu-rĩ, eiguaga ta arĩ we mwene ũranyarirũo.

Saulu agĩkĩũria atĩrĩ: ‘Ngũgĩĩka atĩa, Mwathani?’

Jesu agĩkiuga atĩrĩ, ‘Ũkĩra ũtonye Dameski. Kũu nĩkuo ũrĩmenyithio maũndũ marĩa mothe wathĩrĩirũo wĩkage.’ Rĩrĩa Saulu aarũgamire na kũhingũria maitho-rĩ, ndahotire kuona o na atĩa. Nĩ mũtumumu! Kwoguo andũ arĩa maarĩ nake makĩmũnyita guoko mamwerekeirie Dameski.

Rĩu Jesu akĩarĩria ũmwe wa arutwo ake kũu Dameski, akĩmwĩra: ‘Anania, ũkĩra. Ũthiĩ ũkinye njĩra ĩrĩa ĩĩtagwo Njĩra Nũngarũ. Nyũmba-inĩ ya Judasi ũrie mũndũ ũgwĩtwo Saulu. Ndĩmũthurĩte atuĩke ndũngata yakwa ya mwanya.’

Nake Anania agĩathĩka. Rĩrĩa agomanire na Saulu, akĩmũigĩrĩra moko na akiuga: ‘Mwathani nĩwe wandũma nĩ getha ũcoke kuona, na ũiyũrũo nĩ roho mũtheru.’ Na kahinda o kau tũnyamũ tũtariĩ ta ngaracũ tũkĩgũa kuuma maitho-inĩ ma Saulu, na agĩgĩcoka kuona rĩngĩ.

Saulu nĩahũthĩrirũo na njĩra nene mũno ahunjĩrie andũ a ndũrĩrĩ nyingĩ. Aacokire kũmenyekana ta mũtũmwo Paulo, ũrĩa tũkwĩruta ũhoro wake makĩria. Ĩndĩ mbere, reke tuone ũrĩa Ngai aatũmire Petero eke.