TARORA mĩnyororo yohetwo Paulo, na ũrore mũthigari ũũrĩa wa Roma ũmũrangĩire. Paulo nĩ mũohwo thĩinĩ wa Roma. Etereire o nginyagia rĩrĩa Kaisari wa Roma arĩmũtuĩra itua. Arĩ o mũohwo ũguo-rĩ, andũ nĩ metĩkĩrĩtio gũthiĩ kũmũcerera.

Matuku matatũ thutha wa Paulo gũkinya Roma nĩ aatũmanire atongoria amwe a Ayahudi moke mamuone. Na ta uumĩrĩro wa ũguo, Ayahudi aingĩ kũu Roma magĩũka kũmuona. Paulo agĩkĩmahunjĩria ũndũ wĩgiĩ Jesu na ũthamaki wa Ngai. Amwe nĩ metĩkirie na magĩtuĩka Akristiano, no angĩ matiigana gwĩtĩkia.

Nĩngĩ Paulo nĩ aahunjĩirie athigari mwanya mwanya arĩa maarĩ na wĩra wa kũmũrangĩra. Ihinda rĩa mĩaka ĩĩrĩ ĩrĩa aikĩtio korokoro-inĩ Paulo aahunjĩirie mũndũ o wothe angĩahotire. Na maciaro ma ũguo-rĩ, o na nyũmba ya Kaisari ĩkĩigua ũhoro ũcio mwega wa Ũthamaki, na amwe ao magĩtuĩka Akristiano.

Mũgeni ũyũ ũrandĩka arĩ metha-inĩ nũũ? No wĩgererie? Ĩĩni, nĩ Timotheo. Timotheo o nake nĩohetwo nĩ ũndũ wa kũhunjia ũhoro wa Ũthamaki, no rĩu nĩ muohore. Rĩu okĩte gũkũ gũteithia Paulo. No ũmenye kĩrĩa Timotheo araandĩka? Ta reke tuone.

Wahota kũririkana matũũra ma Filipi na Efeso thĩinĩ wa Rũgano rwa 110? Paulo nĩwe wateithĩrĩirie kwambĩrĩria ikundi cia Akristiano thĩinĩ wa matũũra macio. No rĩu, Paulo arĩ o kĩoho-inĩ-rĩ, nĩ aandĩkĩire Akristiano acio marũa. Marũa macio me thĩinĩ wa Biblia, na nĩ mo Aefeso na Afilipi. Paulo rĩu areera Timotheo ũrĩa ekwandĩkĩra arata ao Akristiano thĩinĩ wa Filipi.

Afilipi nĩ maatugĩte Paulo mũno. Nĩ maamũtũmĩire kĩheo e kũu korokoro-inĩ, na nĩũndũ ũcio rĩu Paulo aramacokeria ngatho. Epafara nĩwe waarehire kĩheo. Nĩ aarũarire hakuhĩ gũkua. Na rĩu nĩahonete na eharĩirie gũcoka mũciĩ. Nĩwe ũgũtwara marũa macio ma kuuma kwĩ Paulo na Timotheo agĩcoka kwao Filipi.

Rĩrĩa Paulo aarĩ o kũu kĩoho-inĩ, nĩ aandĩkire marũa mangĩ merĩ marĩa makoragwo thĩinĩ wa Biblia. Rĩmwe rĩa marũa rĩandĩkĩirũo Akristiano a itũũra rĩa Kolosai. Nĩ ũũĩ ũrĩa rĩĩtagwo? Nĩ Akolosai. Macio mangĩ maarĩ marũa ma mũndũ kĩũmbe kĩũmbe mũrata wake wetagwo Filemona ũrĩa watũũraga thĩinĩ wa Kolosai. Marũa macio ma Filemona megiĩ ũhoro wa ndungata yake ti Onesimo.

Onesimo orĩte kuuma kwa Filemona na agĩthiĩ Roma. Na njĩra ya mwanya Onesimo nĩ aamenyire ũhoro wa atĩ Paulo aarĩ muohe kũu. Onesimo agĩũka kũmũcerera, nake Paulo akĩmũhunjĩria. O na rua Onesimo agĩtuĩka Mũkristiano. Na rĩu Onesimo akĩĩricũkwo nĩ ũndũ nĩ orĩte. Kwoguo-rĩ, wee nĩ ũũĩ ũrĩa Paulo aandĩkĩire Filemona marũa-inĩ macio?

Paulo oririe Filemona ohere Onesimo. Paulo aandĩkire atĩ, ‘Nĩ ndamũcokia kũrĩ wee. Na rĩu ti atĩ no ngombo yaku tu. No rĩu nĩ Mũkristiano mwega mũrũ wa Ithe witũ.’ Rĩrĩa Onesimo aacokire kũu Kolosai nĩ aakuire marũa macio merĩ, rĩmwe rĩa Akolosai na rĩrĩa rĩngĩ rĩa Filemona. No twĩgererie ũrĩa Filemona aakenire rĩrĩa aamenyire atĩ ndungata yake nĩ ĩrĩkĩtie gũtuĩka Mũkristiano.

Rĩrĩa Paulo aandĩkĩire Afilipi na Filemona-rĩ, aarĩ na ũhoro mwega mũno. Paulo erire Afilipi atĩrĩ, ‘Nĩ ndĩramũtũmĩra Timotheo. No o na niĩ nĩngũmũcerera ica ikuhĩ.’ Nake kũrĩ Filemona aandĩkire: ‘Thondekera handũ ha gũikara.’

Rĩrĩa Paulo ohorirũo-rĩ, agĩcerera Akristiano arĩa maarĩ ariũ na aarĩ ake kũndũ kũingĩ kũingĩ. No thutha-inĩ Paulo agĩikio korokoro-inĩ rĩngĩ Roma. Ihinda rĩrĩ nĩ aamenyaga nĩ ekũragwo. Kwoguo akĩandĩkĩra Timotheo akĩmwĩra oke mĩtũkĩ. Akĩmwĩra atĩrĩ, ‘Nĩ ngoretwo ndĩ mwĩhokeku he Ngai, na Ngai nĩ akahee kĩheo.’ Mĩaka mĩnyinyi Paulo aarĩkia kũragũo, Jerusalemu ĩkĩanangwo rĩngĩ, ihinda rĩrĩ nĩ Aroma.

No ĩndĩ kũrĩ maũndũ mangĩ maingĩ thĩinĩ wa Biblia. Jehova Ngai aahotithirie mũtũmwo Johana aandĩke mabuku marĩo ma mũthia, o hamwe na ibuku rĩa Kũguũrĩrio. Ibuku rĩrĩ rĩa Biblia rĩaragia ũhoro wa ihinda rĩrĩa rĩũkĩte. Ta rekei twĩrũte rĩu kĩrĩa ihinda rĩu rĩũkĩte rĩtũigĩire.