ŨŨRĨA ũrũgamĩte harĩa nĩ mũtũmwo Petero, na aarĩa marũngiĩ thutha wake nĩ amwe a arata ake. Nĩ kĩĩ kĩratũma mũndũ ũcio aturĩrie Petero ndu? Nĩagĩrĩirũo nĩ gwĩka ũguo? Wee-rĩ, nĩ ũmũĩ?

Mũndũ ũcio nĩ Korinelio. Aarĩ mũnene wa mbũtũ ya Italia. Korinelio ndoĩ Petero, no ĩndĩ aathirũo amũgwate ũgeni gwake nyũmba. Ta reke tuone ũndũ ũyũ wekĩkire atĩa.

Arũmĩrĩri a mbere a Jesu maarĩ Ayahudi, no ĩndĩ Korinelio ndaarĩ Mũyahudi. O na kũrĩ ũguo nĩendete Ngai, akamũhoyaga, na ningĩ agekaga andũ ciĩko nyingĩ cia ũtugi. Rĩu-rĩ, mũthenya ũmwe mĩaraho akiumĩrĩrũo nĩ mũraika na akĩmwĩra atĩrĩ: ‘Ngai nĩakenetio nĩwe, na nĩegũgũcokeria mahoya maku. Tũma andũ mathiĩ marehe mũndũ wĩtagwo Petero. E Jopa nyũmba ya mũndũ wĩtagwo Simoni, ũikaraga rũhari-inĩ rwa iria.’

O rĩmwe, Korinelio agĩtũma andũ magacarie Petero. Mũthenya ũyũ ũngĩ, rĩrĩa andũ acio maakuhĩhĩirie Jopa-rĩ, Petero aarĩ igũrũ rĩa nyũmba ya Simoni. E hau Ngai agĩtũma Petero eciirie atĩ nĩonete gĩtama kĩnene kĩharũrũkĩte kuuma igũrũ. Gĩtama kĩu gĩgĩkorũo kĩrĩ na nyamũ cia mĩthemba yothe. Kũringana na watho wa Ngai, nyamũ icio itiarĩ theru cia kũrĩa, no ningĩ mũgambo wamwĩrire atĩrĩ: ‘Petero, ũkĩra. Thĩnja ũrĩe.’

‘Aca!’ Petero agĩcokia ũgũo. ‘Ndirĩ ndarĩa kĩndũ gĩtarĩ gĩtheru.’ No ĩndĩ mũgambo ũcio ũkĩĩra Petero atĩrĩ: ‘Tiga gwĩta kĩndũ kĩrĩa Ngai atheretie, atĩ tigĩtheru.’ Ũndũ ũyũ wekĩkire mahinda matatũ. Rĩrĩa Petero aathangaĩte gĩtũmi kĩa ũndũ ũcio nĩ kĩĩ, andũ arĩa mareketio nĩ Korinelio magĩtonya nyũmba na makĩũria Petero.

Petero akĩharũrũka kuuma nyũmba ya igũrũ na akiuga: ‘Niĩ nĩ niĩ mũndũ ũrĩa mũracaria. Mũkĩte nĩkĩ?’ Rĩrĩa andũ acio mataarĩirie atĩ mũraika nĩwe waathire Korinelio ete Petero gwake mũciĩ-rĩ, o rĩo Petero agĩĩtĩkĩra mathiĩ hamwe. Mũthenya ũyũ ũngĩ, Petero na arata ake magĩthiĩ gũcerera Korinelio kũu Kaisarea.

Korinelio onganĩtie hamwe andũ a nyũmba yake na arata a hakuhĩ. Rĩrĩa Petero aakinyire-rĩ, Korinelio agĩũka kũmũtũnga. Akĩgũithia thĩ magũrũ-inĩ ma Petero na akĩmũgooca, ta ũrĩa ũrona haha. No Petero akĩmũrũgamia na kũmwĩra atĩrĩ: ‘Rũgama, niĩ ndĩ o mũndũ tawe.’ Ĩĩni, Biblia yonanagia atĩ ti kĩhooto kũinamĩrĩra na gũthathaiya mũndũ. Twagĩrĩirũo nĩ gũthathaiya Jehova wiki tu.

Rĩu Petero akĩhunjĩria arĩa monganĩte kũu. Petero agĩkiuga atĩrĩ: ‘Ndĩ kuona atĩ Ngai etĩkagĩra andũ othe arĩa mendaga kũmũtungatĩra.’ Na rĩrĩa aaragia ũguo, Ngai agĩtũma roho wake mũtheru, na andũ acio makĩambĩrĩria kwaria na thiomi ng’eni. Ũhoro ũcio ũkĩgegia Ayahudi arutwo arĩa mokĩte na Petero, tondũ meciiragia atĩ Ngai aarũmbũyanagia o na Ayahudi oiki tu. Ũndũ ũcio ũkĩmaruta atĩ Ngai ndonaga andũ a rũrĩrĩ rũmwe ta marĩ ega kana me bata gũkĩra andũ a rũrĩrĩ rũngĩ. Na githĩ ũguo ti ũndũ mwega mũno wa kũririkanwo nĩ ithuĩ ithuothe?