MWANAKE ũyũ ũrona haha marĩ na mũtũmwo Paulo nĩ Timotheo. Timotheo atũũraga hamwe na famĩlĩ yake thĩinĩ wa Lusitera. Nyina eetagwo Eunike na cũwe Loisi.

Rĩrĩ nĩ ihinda rĩa gatatũ rĩa iceera rĩa Paulo kũu Lusitera. Mbere ta mwaka ũmwe ũguo, Paulo na Baranaba mokĩte riita rĩa mbere rũgendo-inĩ rũa kũhunjia. Na rĩu Paulo agĩcoka rĩngĩ me na Sila mũratawe.

Wee-rĩ, nĩ ũũĩ ũrĩa Paulo arera Timotheo? Aramũria atĩrĩ, ‘No wende gũtwarana na Sila hamwe na niĩ? No tũhote kũhũthĩra ũteithio waku kũhunjĩria andũ a kũndũ kũraya.’

Timotheo aacokirie akiuga, ‘Ĩĩni, no nyende gũthiĩ.’ Kwoguo ihinda rĩtarĩ rĩraihu Timotheo agĩtiga famĩlĩ yake na agĩtwarana na Paulo na Sila. No mbere ya kũmenya ũhoro wa rũgendo rwao-rĩ, ta reke tuone Paulo akoretwo akĩnyitwo nĩ maũndũ marĩkũ. Rĩu nĩ ta mĩaka 17 kuuma Jesu aamumĩrĩra barabara-inĩ erekeire Dameski.

Ta ririkana, Paulo okĩte Dameski kũnyarira arutwo a Jesu, no rĩu we mwene nĩ mũrutwo! Thutha-inĩ thũ imwe igĩthondeka njama ya kũũraga Paulo tondũ itiakenirio nĩ ũrĩa aarutanaga ũhoro wa Jesu. No ĩndĩ arutwo nĩ maateithĩrĩirie Paulo ethare. Maamwĩkĩrire gĩkabu makĩmũharũrũkĩria rũthingo-inĩ nja ya itũũra.

Thutha ũcio Paulo agĩthiĩ kũhunjia Antiokia. Na kũu nĩkuo arutwo maambire gwĩtwo Akristiano. Paulo na Baranaba magĩgĩtũmwo kuuma Antiokia mathiĩ rũgendo rwa kũhunjia mabũrũri ma kũraya. Rĩmwe rĩa matũũra marĩa maacereire nĩ Lusitera, mũciĩ gwaa Timotheo.

Rĩu-rĩ, thutha ta mwaka ũmwe, Paulo agĩcoka Lusitera e rũgendo-inĩ rwa kerĩ. Rĩrĩa Timotheo maatwaranire na Paulo na Sila-rĩ, no ũmenye kũrĩa maathire? Tarora mabu ĩno, na ũreke twĩrute marĩĩtwa ma kũndũ na kũndũ.

Mbere, maathire Ikonio, magĩcoka magĩthiĩ itũũra rĩa kerĩ rĩa Antiokia. Thutha ũcio magĩthiĩ Teroa, ningĩ Filipi, Thesalonike na Beroia. Wahota kuona Athene mabu-inĩ? O na kũu Paulo nĩ aahunjirie. Thutha ũcio maikarire mwaka na nuthu makĩhunjia Korintho. Mũthia-inĩ magĩtithia hanini thĩinĩ wa Efeso. Thutha ũcio makĩhaica meri nginya Kaisarea, kuuma hau magĩthiĩ Antiokia, kũrĩa Paulo aikaraga.

Nĩ ũndũ ũcio Timotheo nĩ aathire rũgendo rwa mairo magana maingĩ mũno agĩteithanagia na Paulo kũhunjia “ũhoro ũrĩa mwega” na kwambĩrĩria ikundi nyingĩ cia Akristiano. Wee wakũra-rĩ, nĩ ũgatuĩka ndungata ya Ngai ĩhoketwo ta Timotheo?

[Mapu]